Read Khoekhoegowab Jesajab 23 Bible Online

Jesajab 23 - Khoekhoegowab bible

Jesajab 23

¹ǂHôas Tires xa hâs: Ā re Tarsis di doe-omgo! ǁÎs ge hîǀhuruhe hâ xuige, om-i xare-i a ǀkhais kōse, khoe-i xare-i ǂgâ tamas kōse. Siprus di ǃhūba xus ge ǁî ǃkhaisa ǁîna ge ǂansaba.

²ǃNō re, sadu ǃnāǃnuis di ǁansabedo, sadu Sidons di gao-aogu, huriba ra ǃgâugu xa ge ǀoaǀoahedo.

³Tsî kai ǁgamgu tawab ge ǃkhommi Sihori diba, Nylǃāb ǃgaos di xūba, ǁîs di hōǂgābasenxū ge i, tsî ǁîs ge ǁaedi di ǁamaguǃkhai ge i.

⁴Tao, Sidonse, hurib ra ǃhoa, ā, ǁaposasib hurib dib ra ǃhoa, mî raǃâ: Tita ge ǁoratsû-i xare-e ūhâ tama ge hâ i, tsî ta ǁkhāti ǁora tama hâ; tsî ta ǂkhamkhoega kaikai tama tsî ǂkhamkhoede kaikai tama.

⁵ǂHôas Egipteb dis ge ī i xasen ge ǁkhāti tsûb ǃnâ hâ, Tires xan ga ǁnâuo.

⁶ǃGâu Tarsis ǃoa, ā re, sadu ǃnāǃnuis di ǁansabedo.

⁷Nēsa kha sadu di dâxa ǃāsa, hugakam tsēde xu ge hâ isa, ǁîs di ǂaira ǂûra ge ǁîsa ǃnūse nîra tanibē ǃhao khoeses nî hâga?

⁸Tari-e ǁîsa ge ǂâibasenū Tires, ǁnā krons ǃādi disa, ǁîs di ǁama-aogu gaosa ge isa, tsî māgu-aogu âs hoan xa ǂkhaisa ge isa ǃhūb ǃnâ?

⁹ǃKhūb ǂnubidi dib ge ǁîsa ge ǂâibasen, anra ǃguriǂgaoxasib hoabab nî ǀuriǀuriga, tsî hoan xa ǂkhaisan ǃhūbaib dinab nî ǃgamǃgamga.

¹⁰Dâuǃganu sa ǃhūba Nylǃāb khami, sas Tarsis ôase, ǃgaesen-i xare-i ge a ǀkhai.

¹¹ǁÎb ge ǃommi âba ge ǀhōǂui hurib ǂama, ǁîb ge gaoside ge gongonǃnâ, ǃKhūb ge mîmāsa ge mā Kanaanni ǃoagu, ǁaposa ǃkhaidi âb nî hîkākāhe, ti.

¹²Tsî ǁîb ge ge mî: Sas ge ǃaruǀî dâ tide, ǁgâiǀāhesa ǃgās, Sidons ôase: Khâi îs Siprus ǃoa ǃgâu; xawes ge ǁkhāti ǁnāpa sâ-e ūhâ tide.

¹³Kō, Xaldeaǁîn di ǃhūba: ǁNās ge ǁaes ǀkhai ge isa, Asiriab ge ǁnān ǃgaroǃhūb ǃnâ ǁan hâna ge ǃgaoǃgaoba, ǁîn ge ǁaposa ǃkhaidi âna ge ǂnûikhâi tsî î-omgu âna ge ǂnubi, xawe ǁîb ge ǁîna ge hîǀhuru.

¹⁴Ā re, sago Tarsis di doe-omgo, sago di ǁaposa ǃkhais hîkākāhe hâ xuige.

¹⁵Tsî i ge ǁnātsē nîra ī, Tires nîra ǀuruhe ǃkhaisa, hûdisi kurigu kōse, ǀgui gao-aob di tsēdi ī khami, xawe hûdisi kurigu di ǀunis ais ge Tiresa ǁnā ǀai-aoǁnaetsanase nîra ī:

¹⁶Harpsa ū îs ǃāsa ǃgûǂnamipe, sas ǀuruhe hâ ǀai-aose; ǃgâise ǀkhō îs ǀoasa amde ǁnae, în sas xa ǂâi.

¹⁷Ī i nîra xuige, ǁnā hûdisi kurigu di ǀunis ai ǃKhūb nîra Tiresa ôaǃnâ ǃkhaisa, os ge ǁîs di amǃnâs ǀai-aosis dis ǃoa nîra oa tsîs ge nîra ǀai gaosidi ǃhūbaib didi, ǃhūbaib ai hâdi hoadi ǀkha.

¹⁸Tsî ǁamas âs tsî ǀai-ao-amǃnâs âs ge ǃKhūba nîra ǃanuba, ǁîs ge ǁuise ǀhaoǀhaohe tsî ǂganamhe tide, tsî ǁamas âs ge ǁnān ǃKhūb aiǃâ ǁan hâna nîra hâba, ǂûǁân nîga, tsî ǃgomǀgausa saranan nî ūhâga.