Read Khoekhoegowab Jesajab 24 Bible Online

Jesajab 24 - Khoekhoegowab bible

Jesajab 24

¹Mû, ǃKhūb ra ǃhūba ǀkhaiǃnâ kai, tsîb ra ǁîba ǃū-aisa kai; tsî ǁîb ra īsib âba dawaǃkhupu tsîb ra ǁansaben âba ǀgaruǀgaru.

²Tsî ǁaes īs ǁkhās khamib ge pristera nîra ī, ǃgāb khami ǁnāti ǀhonkhoeb âba, ǃgās khami ǁnāti ǀhonkhoes âsa, ǁama rab khami ǁnāti ǁamaxū raba, ǀkhupi rab khami ǁnāti ǀkhupi-aoba, surude-aob khami, ǁnāti ǁnāb surudemā-aoba.

³ǃHūbaib ge ǀkhaiǃnâ kaihe tsî nîra ǀâǀhanaǃarihe, ǃKhūb go nē mîsa ǃhoa xui-ao.

⁴ǃHūbaib ra ǃoa, ǁîb ra ǃū, ǃhūbaib ra kā tsî ra ǃū, ǀgapikhoen ǃhūbaib ǁaes din ra kā.

⁵ǃHūbaib ge ǂnaoǂnaosen hâ ǁansaben âb xa; ǂhanugan ra ǃûǂam, ǂnûiǂgāden ra ǀkharaǀkhara, ǀamo ǃgaeǀhaosan ra ǁauǁau xui-ao.

⁶ǁNā-amagab ra ǀâxareba ǃhūbaiba hapu tsî ǁnān ǁîb ǃnâ ǁan hân ge nîra hîǀhuruhe. ǁNā-amagan ge ǁansaben ǃhūbaib dina nîra khauǃkhūhe, tsî ǀoro khoeron ǀguin ge nîra ǃgau.

⁷ǂKhon ǂauxûib ra ǃoa, ǂauxûiǂûhais ra ǃū, ǃgâiaǂgao ge hâ in hoan ra ǀhâimâinǀom.

⁸ǃGâiaǂgaob ǃkhomǃkharurudi dib ra sâ, ǀōb dâ ran dib ra toa, ǃgâiaǂgaob harps dib ra sâ.

⁹ǁÎn ge ǁnaen ra hîa ǂauxûiba ā tide; ǀgaisa xûib ge ǁnān ǁîba ga āna nîra auba.

¹⁰ǃŪ-aisa ǃās ge khôaǂkhūhe hâ; omdi hoadi ge a ǀkhaiǃnâ, khoe-i xare-i a ǂgâ ǁoas kōse.

¹¹Tsûsa ǂgai-i ge daogu ai hâ ǂauxûib ǃaroma, ǃgâiaǂgaob a ǀkhai, dâb ǃhūb dib go kā.

¹²Hîǀhurus ǀguis ge ǃās ǃnâ go ǃgau, tsî ǀō raseb ra ǁāba khôaǂkhūǂkhūhe.

¹³ǃHūbaib di ǃnāb ǃnâ nē ǁaedi di ǁaegub ǃnâ i ge ǀgamǁnās ǀkheraǂûn dis xase nîra ī. ǁHoras khami, ǂauxûiǂûhais ǂûn di ǃoras ra toa ǃnubai.

¹⁴Nēn ge dommi âna nîra ǃhâkhâi, ǁîn ge dâxase nîra ǁnae; ǂkhaisib ǃKhūb dib xan ge huriba xu nîra dâ.

¹⁵ǁNā-amaga ǃKhūba ǃkhōǀkhā soreǃhūgu ǃnâ, î du ǃnāǃnuidi hurib didi ǃnâ ǀons ǃKhūb Israeli Elob disa koa.

¹⁶ǀKhâuǀams ǃhūbaib disa xu da ge psalmde ra ǁnâu: ǃKhōǀkhā re ǂHanu-aiba, ti. O ta ge tita ra mî: ǂGaba ta ra, ǂgaba ta ra, ae, tita-e! Îǂhôaoǃnân ra ǂgomǂgomsa tamase sîsen, tsî ǂgomǂgomsa tamasen ra îǂhôaoǃnâna îǂhôaoǃnâse sîsen!

¹⁷ǃAob tsî āb tsî ǁnoab tsîna an sadu ǂama hā, ǃhūbaib di ǁansabedo.

¹⁸Tsî i ge nîra ī, ǃaub di dommi xa ga ǁhâ-i, ǁnā-i āb ǃnâ nîra ǁnā ǃkhaisa; tsî āba xu ga ǂoaxa-i, ǁnā-i ǁnoa-i ǃnâ nîra ǃkhōhe ǃkhaisa. Mûǂuidaodi ǀgapiseb didi ǁkhowa-amsen hâ, tsî ǃgaoǃgaodi ǃhūbaib didi ge nîra ǀkhū xui-ao.

¹⁹ǃHūbaib ge hoaragase nîra khôahe, ǃhūbaib ge hoaragase nîra ǂariǃā, ǃhūbaib ge hoaragase nîra gongonǃnâhe.

²⁰ǃHūbaib ge hoaragase nîra ǂhapusen āǃgâu hâ khoe-i ǁkhā-i xase, tsîb ge nîra gongonmahe, tsuxu-oms ǁkhās xase; tsî ǃûǂams âb ge ǃgomse ǁîb ai nîra ǁgoe, tsîb ge nîra ǁnā tsî ǁkhawa khâi tide.

²¹Tsî i ge ǁnātsē nîra ī, ǃKhūb nî ôaǃnâsa ǂnubidi ǀgapib didi ǂama ǀgapiseb ǃnâ, tsî ǃhūbaib di gao-aogu ǂama ǃhūbaib ai.

²²Tsîn ge nîra ǃkhōǀhaoǀhaohe ā-i ǃnâ ǃkhōsan khami; tsîn ge ǃkhō-oms ǃnâ nîra ǂganamhe, xawen ge ǀoasa tsēdi khaoǃgâ ǁkhawa nîra ôahe.

²³Tsî ǁkhâb ge nîra ǀapa taob xa, tsî sores ge nîra tao, ǃKhūb ǂnubidi dib ga gaosîseno ǃhommi Sionni ai, tsî Jerusalems tawa, tsî kaigu âb aiǃâb ge ǂkhaisiba nîra hâ.