Read Khoekhoegowab Jesajab 25 Bible Online

Jesajab 25 - Khoekhoegowab bible

Jesajab 25

¹ǃKhūtse, sats ge a ti Elo; satsa ta ge nî kaikai, sa ǀonsa ta ge nî koa, sats ge buruxa dīna gere dī xui-ao, sa ǀapeǀape-aidi ge hugasa xu ama tsî a ǁaposa.

²Sats ge ǃāsa ge ǀuiǁkhopo kai, ǁaposa ǃāsa ge ǂkhū hâ ǁkhobo kai, î-ommi ǃhao khoen dibats ge ǀkhai a ǃkhai kai; ǀamosib kōseb ǂnubihe tidese.

³ǁNā-amagas ge ǀgaisa ǁaesa satsa nîra ǃgôa; ǃādi tiranǁaedi didi ge satsa nîra ǃao.

⁴Sats ge ǀgâsaba ǀgaise ge ība xui-ao, ǀgaise ǂhâ hâba, ǃaob hâ hîa, ǁhaiǁhâse tūǀnanudâus ǃnâ, somse ǀgammi ǃnâ, tirangu di ǀgûs ǂnubiǂgoaba ra dâunari dâus khami ī.

⁵ǀGammi ǂnâsa ǃhūb ǃnâ ī khamits ge satsa ǃhao khoen di ǂkhupiba ra ǁgâiǁgui, ǀgammi ǁau ǀnanu-i di sommi xa ra kara kaihes ǁkhās xases ge ǁnaes tirangu disa nîra ǃgamǃgamhe.

⁶Tsî ǃKhūb ǂnubidi dib ge nē ǃhommi ai ǁaedi hoade kausa ǂûǁae-e nîra dība, ǂûǁae-i ǃanu ǂauxûib di-e, ǂgaexa kaub di-e, ǃanu ǂauxûib ǃūmûb di-e.

⁷Tsî ǁîb ge nē ǃhommi ai ǁnā ǃgū-aiǃkhaib, ǁaedi hoadi ǁîb ǀkha ǃgū-aihe hâba nîra hîkākā, tsî ǂganais, ǃhaodi hoadi ǁîs ǀkha ǂganaihe hâsa;

⁸ǁîb ge ǁōba nîra hapu dans ǃoa, tsî ǃKhūb ge ǁgamroga aidi hoade xu nîra ǀombē, tsî ǁîb ge ǃharaxūb ǁîb ǁaes diba ǃhūbaib hoaba xu nîra ūbē: ǃKhūb ge ǁî ǃkhaisa mî xui-ao.

⁹On ge ǁnātsē nîra mî: Mû, nēb ge a sida di Elo; sida ge ǁîb ai ge ǂgomaiǂnûi, tsî ǁîb ge sida nîra ǃgâiǃō kai. Nēb ge ǁnā ǃKhūb, ǁîb ai da ge ǂgomaiǂnûiba; î da dâ, î da ǃgâiaǂgao ǁîb di ǃgâiǃōb ǃnâ.

¹⁰ǃKhūb ǃommi nî nē ǃhommi ai sâ xuige; xawe Moab ge ǁîb ǃnaga nîra dāǃgâhe, ǃhoroǃgaodan ra ǀaruxa ǃkhai-i ǃnâ dāǃgâhe khami.

¹¹Tsîb ge ǁîn ǁaegu ǃomkha âba nîra khoraǃā, tsâ-aob ra ǁîkha khoraǃā xase, xawe ǁîb ge ǃgurib âna nîra ǃgamǃgam, ǃomkha âb di ǁôakha ǀkha.

¹²Tsî ǁîb ge ǁaposa ǃkhaidi sa ǀgapi ǂnubiǂgoagu dide nîra ǃgamǃgam, ā, ǁîb ge ǁîde tsarab kōse nîra sī kai.