Read Khoekhoegowab Jesajab 29 Bible Online

Jesajab 29 - Khoekhoegowab bible

Jesajab 29

¹Tsūba Ariels, Ariels, ǁnā ǃās Davib ge ǁîs ǃnâ ǁgoe isa! Kuri-e kuri-i ǀkha dīǀaro, kaitsēǁguibade an ǂā.

²Xawe ta ge tita Arielsa nîra ǂōǂō; o ra ge ǃoab tsî ǃgaes tsîra nîra hâ, os ge ǃāsa tita Ariels khami nîra ība.

³Tita toroǂnubi-i ǀkha nîra xāǂgā si xui-ao; tsî tita ge nîra ǃnamiǂgā si ǀgaisa ǁâxūn ǀkha, tsî tita ge ǁkhuiga nîra aokhâi sa ǃoa-ai.

⁴ǃNubais ge nîra ǃgamǃgamhe, os ge ǃhūbaiba xu nîra ǃhoa, os ge ǃhoas âsa ǃhūba xu ǃgaidī-aob dis axase nîra hā; os ge ǃhoas âsa tsaraba xu nîra ā.

⁵Ob ge ǂguib khākhoen âts diba ǀui tsarab khami nîra ī, tsî ǂguib tirangu diba ǃgomīhe ra ǀapon khami, tsîs ge ǁî ǃkhaisa ǀgui mûsǀapiros ǃnâs axase ǃhaese nîra ī.

⁶Os ge sasa ǃKhūb ǂnubidi dib xa nîra ôaǃnâhe ǃgurub ǀkha, tsî ǃhūǂgubib ǀkha tsî ǃgari ǀōb ǀkha tsî sareb ǀkha, tsî tūǀnanub ǀkha tsî ǁhabub hapu ra ǀaes dib ǀkha.

⁷Tsî ǁhapob tsuxu-ais dib īs ǁkhās xaseb ge ǂguib ǁnā ǁaedi Arielsa nî ǃkhamūdi hoadi diba nîra ī, tsî ǁnān, ǁîs tsî ǁîs di ǁaposa ǃkhaide nîra ǃkhamūn tsî ǁîsa nîra ǂōǂōn hoan on diba.

⁸Tsî i ge ǃâ hâ-i ǂû i ra ǃkhaisa ra ǁhapo-i khami nîra ī; xawe ǃnoaǂkhai i kao, mû, os ge ǀoms â-e a ǀkhaiǃnâ; tsî ǁgâ hâ-i ga ǁhapo khami, ā i ra ǃkhaisa, xawe ǃnoaǂkhai i kao, mû, o i ge ganupe ǁgâ hâ tsî ǀoms â-i ra ǁkhore, ǁnās ǁkhās xaseb ge ǂguib ǁnā ǁaedi ǃhommi Sionna ra ǃkhamūdi hoadi diba nîra ī.

⁹Mâ î du burugâ, ǂgī î du ǂgīǃari; ǁîn ge āǁō hâ, ǂauxûib xa tamas a xawe; ǁîn ra ǂhapusen, ǀgaisa xûib xa tamas a xawe.

¹⁰ǃKhūb ge ǁîn ǂama gagas ǃgam ǂoms disa ǁhōǂui xui-ao; tsî ǁîb mûdi âdo ge ǂganam xui-ao; kēbo-aogu tsî sadu di danakhoegu tsî mû-aogu tsînab ge ǁîba ge ǂgī kai.

¹¹ǁNā-amaga du ge mâ ais hoasa mîdi, ǂganamǀgaiǀgaihe hâ ǂkhanis didi, khoeb hîa khomai ǁkhābats ra mā tsî: Dī ǁoa ta a, ǂganamǀgaiǀgaihes kom hâo, ti mîs didi khami ībahe xui-ao.

¹²Tsî ǂkhanis ga ǀguib khomai ǁoaba māhe mî raǃâ: Nēsa khomai re, tsîb ga ǁîba: Khomai ǁoa ta a, ti mî.

¹³ǃKhūb ge mî xui-ao: ǁNā-amaga nē ǁaes ra ams ân ǀkha tita ǀgū, tsî amǁgaugu ân ǀkhan ra tita ǃgôa, xawe ǂgaob ânan ra tita xu ǃnūse dībē amaga, tsî ǃaoǃgâb ân hîan ǁkhāǁkhāhe hâb a khoen di mîmā ǀgui amaga:

¹⁴ǁNā-amaga mû, tita ge ǃaruǀîǀgui buruburuxase nē ǁaesa nîra sîsenū, buruxase tsî buruburuxase: Gā-aisib ǁîn di gā-ain dib ge nîra kā, tsî ǁnâuǃāb ǁîn di ǁnâuǃāxan dib nîra gaugausen xui-ao.

¹⁵Tsūba ǁnān, ǀapes âna ǃKhūb aiǃâ ǃgamse gaugau ǂgao hân, sîsengu ân ǃkhaenab ǃnâ ra īn tsî: Tari-e ra mû da? tsî: Tari-e a ǂan da? ti ra mîna.

¹⁶Matikōse du a ǂkhaba! Sūǂnubi-aoba kha ǂgoab ǀkha ǀguiti-ī kaiheb ra? O i kurusabe-e kuru-aob â-i ǃoa: ǁÎb ge tita dī tama hâ, ti mî, tsî ǂnubihe hâ soa-e ǂnubi-aob xa: ǁÎb ge ǂan tama hâ ti mî ǁkhā?

¹⁷ǂKhari ǁaerob ge, ob ge Libanonna nîra ǂûǂûxa ǃau kaihe, tsî ǂûǂûxa ǃaub ge ǁoese nîra ūhe.

¹⁸Tsî ǁnātsēn ge ǂganǂgaena mîdi ǂkhanis dide nîra ǁnâu, tsî ǂgīn di mûdi ge ǃkhaenab tsî ǃkhaeba xu nîra mû.

¹⁹Tsî tsamtsiǃnân ge ǃgâiaǂgaoba ǃgâiaǂgaob ama nîra ūhâ ǃKhūb ǃnâ; tsî ǂhâsaben khoen din ge ǃAnub Israeli dib ǃnâ nîra dâ,

²⁰tiranni ga toao, tsî ǃhō-aob ga ǀkhaio, tsî ǂhanuoǃnâsiba ra ǃûin hoan ga ǃhūǃnomaheo,

²¹ǁnān, sats khoetsa ǀgui mîs ǀguis ǃaroma ra ǀhapixa kain, tsî ǁnāb ǁîna ǁāb ǃnâ ra ǂgōǀauna, ǁnoaga ra ǁguibana tsî ǂhanu-aiba ra doeǁgaǂuina ǃgaroǃkhais ǁga.

²²ǁNā-amagab ra ǃKhūb, Abrahamma ge oreba, Jakob ommi ǃoa nēti mî: Jakob ge ǃaruǀî taotaohe tide; tsî ais âb ge ǃaruǀî ǀnoro kaihe tide.

²³ǁÎb ga ǁîb ôan, ǃomkha âtakha ge dīna, ǁîb ǁaegu mûo, on ge ti ǀonsa nîra khai, on ge Elob Israeli diba nîra ǃao.

²⁴Tsî ǁnān ǁhapusa gagasa ūhân ge nîra ǁnâuǃāxa; tsî ǁnān hîa ra ǀaran ge ǁkhāǁkhāsa nîra ǃkhōǃoa.