Read Khoekhoegowab Jesajab 3 Bible Online

Jesajab 3 - Khoekhoegowab bible

Jesajab 3

¹Mû, ǃKhūb ǂnubidi di ǃKhūb ge Jerusalems tsî Judab tsîra xu hais tsî ǁgâibasenhais tsîra nîra ūbē, mâ ǁgâibasenhais pereb dis kas, mâ ǁgâibasenhais ǁgammi dis kas,

²ǁē-aob tsî toro-aob kas, ǂhanuǂhanu-aob tsî kēbo-aob kas, aimûǀgaru-aob kas, kaikhoeb kas,

³korodisigu di ǂamkhoeb kas, ǀgapiǃgôasab kas, sîsenaogu ǃnâ a gā-aib kas tsî gowab ǃnâ a gā-aib kas hoasa.

⁴Tita ge ǀgôaga nîra ǁîn di gao-ao kai, ǀgôase gu nî ǁîna gaoǂamse.

⁵Os ge ǁaesa nîra ǁgarihe, ob ge nēba naub ǃoagu nîra hâ, tsî mâb hoaba ǀgūkhoeb âb ǃoagu. ǀGôab ge ǁgaogonxase kairaba nîra mâǃoa, tsî ǃharaxūhesaba ǂhauǃnâb ǃoagu.

⁶Khoeb ga ǃgâsab âba ǁgûb di oms ǃnâ ǃkhō tsî: Sats ge sara-e ūhâ, xuige sida di ǂamkhoe kai, îs nē ǁgonǁgonǂgaosa sa mûǂams ǃnaga hâ, ti mîo.

⁷Ob ge ǁîba ǁnātsē nū tsî nîra mî: Tita ge ǂgauǂgau-ao kai ǁoa. Tsî ti oms ǃnâ i ge ǁkhāti pere-i tsî sara-i tsîna a ǀkhai, xuige tā ǁaes di ǂamkhoese mâi te re.

⁸Jerusalems ge ge ǃnôa tsî Judab ge ge ǁnā; ǁîn nams tsî dīgu tsîn ge ǃKhūb ǃoagu hâ i amaga, mûra ǁîb ǂkhaisib diran nî ǂoeǂoese.

⁹Īsib ǁîn ais dib ra ǁîn ǃoagu ǀhûǀguitimî; tsî ǁoren ân xan ra ǂhauǂgarose ǃhoa Sodoms xase; tsîn ge ǁîna gaugau tama hâ. Tsūba ǁîn di ǀomsa! ǁÎ-aitsaman ra tsūdīsen amaga.

¹⁰ǂHanu-aiba mîba, ǁîb nîra ǃgâibahe ǃkhaisa, ǁîn ǂûtanib, ǁîn sîsengu diban nîra ǂû ǃkhaisa.

¹¹Tsūba eloxoresaba, ǂkhabaseb nîra hāǂamhe! Mādawa-ams ǁîb ǃomkha dis xab nîra hāǂamhe xui-ao.

¹²Doeǁga-aogu ti ǁaes digu ge a ǀgôa, tsî taradi ge ǁîna ra gaoǂam. Ae, ti ǁaese! Sado ra ǂgaeǂgui gu ge ra ǂgaeǂhapu du, tsî daob sadu ǃgangu diba gu ge ra ǀhomaǀhoma.

¹³ǃKhūb ra khâima, ǂhanuǂhanub nîga tsî ǁaedeb nî ǀgoraǃgâga.

¹⁴ǃKhūb ra ǀgoraǃgâs ǃoa hā, ǁaes di kaigu tsî ǁîs di gaosagu ǃoagu: Sadu ge nē ǂauxûiǂûǃhanaba hapu xui-ao; ǁkhâuǁnâs ǀgâsab dis ge sadu di omdi ǃnâ hâ.

¹⁵Tare-e du ra ǁnâi ǂâibasen, o du ti ǁaesa ra dāǃgâ, o du ǀkhomǀkhomsan di aisa ra ǂkhūǂkhū? tib ra ǃKhūb ǂnubidi di ǃKhūba mî.

¹⁶ǃAruǀîb ra ǃKhūba mî: ǀGôadi Sions didi ra ǀgapiǀgapisen amaga, tsî ǂgōǂgōhe hâ ǃaogu ǀkha di ǃgû tsî ra tsapima, ǃgû tsî ra ǀkhereǃâ ǂaidi âdi ǃganuhe hā xū-i khami.

¹⁷ǁNā-amagab ge ǃKhūba danaǂkhōdi Sions ǀgôadi dide nîra ǀgoroxa kai; tsî ǃKhūb ge taotaosaǃkhais âde nîra ǀkhaiǀkhā kai.

¹⁸ǁNā tsēs ǁkhās aib ge ǃKhūba nîra ūbē, ǀnūǂgāǃhâugu di anixūn tsî ǂhamrodi tsî ǁkhârogu,

¹⁹ǂgaeran, ǃganun, ǂkhaisa saran,

²⁰ǀgapas danas dis, ǃganudi, ǃgaexūdi, ǃgâixūdi, ǃgâihamǃgaerodi, ǃgaerodi, ǃgaidīxūn,

²¹ǀkhunuǂnûidadi, ǂguis anixūn,

²²anaǃkhunisaran, ǂamsararon, ǀgaparodi, ǁgarurodi,

²³mûsenxūdi, ǀui lineǃkhaigu, ǃgū-aiǃkhaigu tsî ais di ǃgū-aidi tsîna.

²⁴Tsî i ge nîra ī, ǀōb ǃgâihamxūb di amǃnâs ai nîra hâ ǃkhaisa; tsî xoresensa ǃgaesenni di amǃnâs ai, ǃgoradanasiba ǀûn di ǂgoma-aidi ǃnâ; ǁhō-e ǃgaesa hara sarab di amǃnâs ai; tsî khau hâ aisa îsasib di amǃnâs ai.

²⁵Saso di aogu ge gôab xa nîra ǁnā, tsî saso di ǁē-aoga ǃkhamgub ǃnâ.

²⁶Tsî ǁîs di ǁāgu ge ǃoa tsî nîra ǃgae; os ge ǀkhaiǀkhā hâǃâ ǃhūb ai nîra ǂnû.