Read Khoekhoegowab Jesajab 30 Bible Online

Jesajab 30 - Khoekhoegowab bible

Jesajab 30

¹Tsūba ǁnā ǀgôan, hîa ra ǁnāǁgôana tib ra ǃKhūba mî, ǀape-en nî ǀapeǀapega, xawe tita xu tama, tsî ǃgaeǀhao-en nî dīga, xawe ti gagaba xu tama, nē ǁoreban nî nau ǁoreba dīǀarose.

²ǁNān, hîa khâi tsî Egipteb ǃoa ra ǁgôana, ti amsa dî tama i tsî; Faraob di ǀgaib ǀkhan nî ǀgaiǀgaisenga, tsî ǁhaiǁhân nîga Egipteb di sommi ǃnâ.

³Xawe ǀgaib Faraob dib xa du ge taotaosase nîra ībahe, tsî Egipteb di sommi ǃnâ ǁhaiǁhâs xa ǃharaxū ǃkhaise.

⁴Gaosagu âb ga Soans ǃnâ hâ, tsî sîsabegu âb ga Hanes ǁga ǀgūse sīo;

⁵ǁîn hoanab ge ǁîba nîra taotao, ǁnā ǁaes, hîa harebe ǁoas tsî hui ǁoas, tsî harebesa dī ǁoas, xawe taob tsî ǃharab ase nîra īs ǀkha.

⁶ǂHôas ǀgurun ǃkhawagas xa hâs: ǁNā ǃhūb ǁgâiǀāb tsî ǂōǂōb tsîkha dib ǀgaisa xammi tsî kaira xammi, tsî basiliski tsî ǀaexa ǁkhana ra draki tsîn, ǁîb ǃnâ hâb, ǃoan ra xūn âna tanisī ǂkhamgu eseln digu di ǃgâb ai, tsî ǁuigu âna ǃnaidi di ubub ai, ǁnā ǁaes, hîa harebesa hā-ū ǁoas ǁga.

⁷Egipteb di huib nîra ǁau xui-ao. ǁNā-amaga ta ge tita ǁîba: Kai amǃnâts, ǂkhîse ǂnôats, ti nîra ǂgai.

⁸ǁNā-amaga hā îts ǁî ǃkhaisa ǁîna xoa-aixūs ai xoaba, îts ǁî ǃkhaisa ǂkhani-i ǃnâ xoaǂgā, îs ǀunitsēs kōse hâ hugaǀgui ǀamosib kōse.

⁹ǁÎn ge a mâǃoaxa ǁae, tsîn ge a ǂhumiǃnâ ǀgôa, ǃKhūb di ǂhanuba ǁnâu ǂgao taman,

¹⁰mû-aogu ǃoa ra mîna: Tā mû! tsî kēbo-aogu ǃoa: Tā kēboba da ǂhanuna! ǀNamǀnamsana ǃhoa-ū da, î gāxaǃnâsina kēbo.

¹¹ǂGō daoba xu, î go ǃganna xu ǁgôaxa, ab ǃAnub Israeli diba sida ǀkha ǀû, ti ra mîna.

¹²ǁNā-amagab ra ǃAnub Israeli diba nēti mî: Sadu nē mîsa ra aoxū tsî ǁgâiǀāb tsî ǂkhabasib tsîkha ai du ǂgomaiǂnûi tsî ǁî ǃkhais ai ra ǃgâsen amaga,

¹³ǁnā-amagas ge nē dīsāsa ǂapab, ǁnā rab, ǀgapi ǂnubiǂgaob ǃnâ ǃaugabǀî ǂōsen hâb, ǃkhoms âb ǃhaese ǀgui mûsǀapirob ǀguib ǃnâ a hā ǁkhāb khami nîra ība du.

¹⁴Ā, ǁîb ge ǁîba nîra khôa, sūǂnubi-aob di soas ra khôahe xase; ǂkhūs âb ǃnâb ge ǁîba sâu tide, ǂkhūs â-i xa i ge ǀgui sūǃâro-i, ǁî-i ǀkhats nî ǀaesa ǀaekhorosa xu ū-e, ǁgam-ets nî tsaus ǃnâ xuri-ū-e xare-i hōhe tides kōse.

¹⁵Nētib ra ǃKhūba mî xui-ao, ǃKhūb Israeli di ǃAnuba: ǃHobasens tsî sâb tsîra xu du ga ǀgai hâ; ǃnōsase hâs tsî ǂgomaiǂnûis tsîra ǃnâ du ga ǀgai hâ. Xawe du ge ǂgao tama ge i.

¹⁶Tsî du ge: Hî-î, a da hān ai ǁhâ ti ra mî; ǁnā-amaga ǁhâ ǁnâi! Tsî du: ǃHae hān ai, a da ǃgapi ti ra mî. ǁNā-amaga an sadu di ǃgôaǃgonaon ona ǃhae!

¹⁷ǀOadisise du ge nîra ǃhū, ǀgui khoeb ǀguib di ǃaub xa; tsî korogu di ǃaub xa du nîra ǁhâ ǃhommi di ǂaob ai mâ haib, ǃnoms ai mâ ǃkhaub khami du nîra ǃgaus kōse.

¹⁸Tsî ǁnā-amagab ge ǃKhūba nîra ǃâu sadob nî ǁîba ǀkhomga, tsî ǁnā-amagab ge ǁîba nîra ǀgapiǀgapihe, sadob nî ǁîba ǀkhomse, ǃKhūb a ǀgoraǃgâs di Elo xui-ao: ǃGâiǃōn ge ǁnān ǁîba ra ǃâun hoana.

¹⁹ǁAes ge Sions ǃnâ nîra ǁan, Jerusalems tawa, tā ǃaruǀî ā. ǁÎb ge ǂanǂansase satsa nîra ǀkhom xuige, sa ǂgais di dommi ai. ǁNâub ka ǃnubaib ge ǁnātimîsi nî ǃeream tsi.

²⁰ǃKhūb ge sado pereb ǂōǂōsib dib tsî ǁgammi ǁgâiǀāb diba nîra mā, xawe ǁkhāǁkhā-aogu âdu ge ǃaruǀî ǁgabogu ǀkhas axase ǁkhanabē tide; tsî mûdi âdu ge sadu di ǁkhāǁkhā-aoga nîra mû.

²¹Tsî ǂgaedi âdu ge nîra ǁnâu mîs sadu khaoǃgâ hâb disa: Nēb ge daoba, ǃgû re ǁîb ai, tā ǂgō amǀkhāb ais kas, ǁareǀkhāb ais kas hoasa ti ra mîsa.

²²Tsî du ge nîra ǀhaiǀuriǂganais sadu di ǀhaiǀuri ǃgaohesa īgu disa tsî ǃkhûǃgâs sadu di ǃhuniǀuriǂnâhesa īgu disa; ǀurisa ǃkhain khami du ge ǁîna nîra aoxū tsî mâ-i hoa-i ân ǃoa: ǃAugab ǃoa, ti nîra mî.

²³ǃNubaib ge ǁîba sa ǃkhommi, ǃhūbats tsoro-ai hâba, ǀapiba nîra mā tsî pereba ǃhūb di hōǂgābasense, tsî ǁîb ge nî ǃgâi tsî nî kau, sa ǀgoan ge ǁnātsē hara ǃhū-ai-i ai nîra ǃû.

²⁴Tsî gomagu tsî ǂkham eselgu ǃhūba ra sîsengu ge ǃanu ǂûxūna nîra ǂû ǃkhāxūs tsî ǂoaruxūs tsîra ǀkha ǀkhaiǀkhaihe hâna.

²⁵Tsî mâ ǀgapi ǃhommi hoab ai tsî mâ ǀgapi ǃnoms hoas ai gu ge ǃārogu tsî dâu ra ǁgamgu tsîga nîra hâ ǁnā tsēs kai ǂāb dis ai, ǂgō-omgu ga ǁnāǃnubai.

²⁶Ob ge ǃnâb ǁkhâb diba sores dib khami nîra ī, tsî sores di ǃnâb ge hûǃnâguse nîra ǃnâ hû tsēdi di ǃnâb ǁkhāb xase, ǃKhūb ge ǂkhôas ǁaes âb disa nîra ǃgae-ai, ǀhapis âsab ga ǂuruǂuru ǃnubai.

²⁷Mû, ǀons ǃKhūb dis ge ǃnūseba xu nîra hā, khau hâ ǁaib ǀkha tsî ǃgom ǀnanudi ǀkha; amǁgaugu âb ge ǁgôasib xa ǀoa hâ, tsî nams âb ge hapu ra ǀae-i khami nîra ī.

²⁸Tsî ǀommi âb dâu-īǂam ra ǃārob khami, ǃaob kōse ra sība, ǀūbeǁaedeb nî ǂgubiǂgubise ǂgubib ǁausib dib ǀkha; tsî ǂgaeǂhapu ra ǂgā-amǃnâxū-i khami ǁaedi di ǃnanigu ǃnâ.

²⁹Koaǁnaetsana-i ge sadu tawa nîra hâ, ǁnā tsuxub kaitsēs ǁîs ǃnâ ra khaiheb dib khami ī-e; tsî ǃgâiaǂgaob ǂgaob dib ge nîra hâ, ǀguib ǂnunixūs ǀkha ra ǂnunib dib khami ība, ǃhommi ǃKhūb dib ǃoab nî sīga, ǃhaob Israeli dib ǃoa.

³⁰Ob ge ǃKhūba ǂkhaisa dommi âba nîra ǁnâu kai, tsî ǁgôa kais ǁîb ǁôab disa nîra mû kai, ǁgôasib ǁîb ǁaib dib ǀkha tsî ǁhabub hapu ra ǀaes dib ǀkha, napagu tsî dâus tsî ǃnareb tsîn ǀkha.

³¹Dommi ǃKhūb dib ǀkhab ge Asiriaba nîra ǂkhūǂkhūhe haib ǀkha gere ǂnauba.

³²Tsî i ge nîra ī, ǁnā ǃgaoǃgaoǁapoǁapohe hâ haib ga ǃgûǃganu, tsî ǃKhūb ga ǁîsa ǁî-i ai sâ kai ǃkhai-i tawa, ǁnāpan ǃkhomǃkharurudi tsî harpdi tsîn ǀkha nîra hâ ǃkhaisa, gongon ra ǃkhamaidi ǀkhab ǁîba ǁîna nîra ǃkhamū xui-ao.

³³Tofeti ge ǁarisa xu ǂhomihe hâ; gao-aob onab ge ǂhomibahe hâ, ǁîb ge ǁîba ge ǃgam tsî ge hara kai, khauǃkhais âb di ǀaes tsî ǀaen tsîn ge a ǂgui. ǀOms ǃKhūb dis ge ǁîna nîra ǂhubi sulfurdâu-i khami.