Read Khoekhoegowab Jesajab 32 Bible Online

Jesajab 32 - Khoekhoegowab bible

Jesajab 32

¹Mû, gao-aob ge ǂhanu-aisib ǃnâ nîra gaosîsen, tsî gaosagu ge ǂhanub ǃoa nîra gao.

²Ob ge ǁnā aoba ǂoab xats ǁî-i ǃnâ ra sâusen ǃnabaǃkhai-i khami nîra ī, tsî dâus xats ra gaugausen ǃkhai-i khami nîra ī, ǂnâsa ǃkhai-i tawa ra dâu ǁgamgu khami, kai ǃhaob di sommi khami ǁgâ ǃhū-i ǃnâ.

³Tsî mûdi ǁnān hîa ra mûn didi ge ǂgīkaisen tide, tsî ǂgaedi ǁnān hîa ra ǁnâun didi ge nîra ǃgaoǃgâ.

⁴Tsî ǂgaob ǂâion dib ge ǂansa nîra ǁnâuǃā, tsî nams aikhomse ra ǃhoan dis ge nîra ôasa, ǂhanuses nî ǃhoase.

⁵Gâreb ge ǃaruǀî tsamtsiǃnâse ra māts ti ǂgaihe tide, tsî xūǃgunuxab ge tsamsa ti ǂgaihe tide.

⁶Gâreb ra gâresiba ǃhoa xui-ao, tsî ǂgaob âb ra ǂhanuoǃnâsiba dī xui-ao: Hînaxaǃnâsibab nî dīga, tsî kāǁhapubab nî ǃKhūb ǃoagu ǃhoaga, ǃâ hâb di ǀomsab nî ǀkhaiǃnâse ǁnāxū, tsî ǁgâ hâbab nî āxūb xa tôasi kaise.

⁷Tsî xūǃgunuxab di sîsenni hoab ge a ǂkhaba: ǁÎb ra taotaosa ǂâide ǂâiǂui, ǀkhomǀkhomsabenab nî ǂkhaba mîdi ǀkha hîkākāse, tsî ǂhanub ona ǀgâsab ga ǃhoa ǃnubai.

⁸Xawe tsamtsiǃnâse ra māb ge tsamsasigu xa ra ǂâi, tsîb ra mâ tsamsasigu ai.

⁹Khâi saso, sâsase hâ taraso, ǁnâu ti domma; saso ǀgôaso ǂkhîse hâso, ti mîde ǁnâuǃā so re!

¹⁰Kurib di tsēdi ǃnā hâse so ge nî gongonǃnâhe hâse hâ; saso ǂkhîse hâ ǀgôaso, ǂauxûiǂûǃoras nîra ǀkhai tsî ǀhaoǀhaobasens nîra kā xui-ao.

¹¹ǀKhū, saso ǂkhîse ǂnôaso; ǀhū, saso ǃao tamase ǂnôaso, ǂoa î so ǂgaeǂuinǀkhā, î so saso di kamanaba ǃgae.

¹²ǃGaehe i ge nîra samdi ǂama, tsî ǃgâi ǃhanagu ǂama, ǂûtanixa ǂauxûiǂûhaidi ǂama.

¹³ǃHanab ti ǁaes dib ain ge ǁkhūn tsî ǀgamin tsîna nîra ǁhao, ā, dâ-omga ǃgâiaǂgaoxase ra dâ ǃās ǃnâ.

¹⁴Î-ommi ge nîra ǁnāxūhe, tsî ǂkhupib ǃās dib nîra ǀû xui-ao; Ofeli tsî ǃûiǂgō-omgu tsîgu ge ǁhāse nîra hâ ǀamosib kōse, ǃgâiaǂgaob ǃgoren dib ase tsî ǀgoan di ǃû-aise,

¹⁵Gagab ǀgapiseb diba da nîra ǁhōǂamhes kōse; ǃnubaib ge ǃgaroǃhūba nîra ǂûtanixa ǃau kai, tsî ǂûtanixa ǃaub ge ǁoese nîra ǃgôahe.

¹⁶Ob ge ǂhanuba ǃgaroǃhūb ǃnâ nîra ǁan, ob ge ǂhanu-aisiba ǂûtanixa ǃaub ai nîra hâhâ.

¹⁷Ob ge sîsenni ǂhanu-aisib diba ǂkhîb ase nîra ī; os ge ǃoabas ǂhanu-aisib disa sâ tsî ǂkhîse hâb ase nîra ī ǀamosib kōse.

¹⁸Os ge ti ǁaesa ǁanǃkhais ǂkhîb dis ǃnâ nîra ǁan, tsî ǂgomaiǂnûisa ǁanǃkhaidi ǃnâ tsî sâsa tsî ǂkhî ǃādi ǃnâ.

¹⁹Xaweb ge ǃnareba nîra ǁnā haiǀgoms ǃoats ra ǁgôa ǃkhais tawa, tsî ǃās ge nîra ǁgôa ǃgammi ǃnâ.

²⁰ǃGâiǃō du ge sadu ǁgamgu hoagu amǃgâ ra tsoro do, sadu gomab tsî eseli tsîkha di ǂaisa ǁnāǀî ra sîdo.