Read Khoekhoegowab Jesajab 33 Bible Online

Jesajab 33 - Khoekhoegowab bible

Jesajab 33

¹Tsūba tsi, sats hîǀhuru-aots, sats ǂûts hîǀhuruhe tamats tsî gāxaǃnâse ra sîsenūts, tsî gāxaǃnâse sîsenūhe tamatsa! Hîǀhurutoats ka ǃnubaits ge satsa nîra hîǀhuruhe; gāxaǃnâsets ga sîsenūtoa ǃnubaits ge satsa gāxaǃnâse nîra sîsenūhe.

²ǃKhūtse, ǀkhom da re; satsa da ra ǃâubasen xuige, îts ǁîn di ǁôase ī, mâ ǁgoas hoas ai, îts sida sâuǃkhaise ī, ǂōǂōsib ǁaeb ai.

³ǀŌb ǂkhupib dib xa di ge ǁaede nîra ǁhâbē; sa ǀgapiǀgapis xa di ge ǁaede nîra ǀgaruǀgaruhe.

⁴ǃNubain ge sadu di ǁkhâuǁnâxūna nîra ǀhaoǀhaohe, ǃnomdi ra ǀhaoǀhaohes ǁkhās xase, ǂhoms ra ǃkhoema khamin ra ǁnāpa ǃkhoema.

⁵ǃKhūb ge a ǀgapi, ǁîb ge ǀgapiseb ǃnâ ǁan hâba; ǁîb ge Sionsa ǂhanub tsî ǂhanu-aisib tsîkha ǀkha ge ǀoaǀoaba.

⁶Tsî i ge nîra ī, ǁaposasib sa ǁaegu dib, ǀgaib sa sâus dib gā-aisib tsî ǂans tsîra ase nîra ī ǃkhaisa, ǃaoǃgâb ǃKhūb dib ge ǁîb di ǁuise nîra ī.

⁷Mû, hoan xa ǀgaisan ân ge ǁnāpa ǃauga ra ǃau; sîsabegu ǂkhîb digu ge ause ra ā.

⁸ǂHauǂhauhe hâ daogu ge hîkākāhe hâ, ǁnā daoga-ū ra ǃgûn ge a ǀkhai. ǁÎb ra ǃgaeǀhaosa khôa, ǁîb ra ǃāde ǃharaxū, ǁîb ge khoe-i xare-e ǃgôa tama hâ.

⁹ǃHūb ra ǃoa, ǁîb ra tsanaǁkhui, Libanonni ge tao hâ, ǁîb ra ǃū; Saronǃhūb ge ǃgaroǃhū kai hâ, Basanni tsî Karmeli tsîkha ǂnaren on ge ǀgabiǁnâhe hâ.

¹⁰Tita ge nēsi nî khâi tib ra ǃKhūba mî, î ta nēsi ǀgapi, î ta nēsi kai.

¹¹Sadu ge ǃhoroǃgaodana ǀgamǀkhā hâ, o du ge ǃhoroǃgaodana nîra ǁora; os ge sadu di gagasa ǀae-i khami nîra hapu.

¹²Tsî ǁaedi ge khauhe ra ǃkhoroǀuidi khami nîra ī; ǁhāǁnâhe hâ ǁkhūdi khami di ge ǀaes ǀkha nîra khauǃkhūhe.

¹³ǁNâu re sadu hîa ǃnūse hâdo tita ge dīna; î du sadu hîa ǀgūse hâdo mûǂan ti ǀgaiba!

¹⁴ǁOre-aon Sions tawa hân ge ǃhuri hâ; ǀkhūb xan ge hînaxaǃnâna ǃkhōhe hâ, ǁnān hîa ra mîna: Tari-e hâ sada ǃnâ hapu ra ǀae-i ǀkha ǁan ǂgao hâ-e? Tari-e hâ sada ǁaegu ǀamose khauǀae-i ǀkha hâ ǂgao hâ-e?

¹⁵ǁNāb ǂhanu-aisigu ǃnâ ga ǃgûb tsî ǂhauǃnâsiga ga ǃhoab, ǁgâiǀāgu di hōbasensa ga aoxūb, ǃomkha âba ga ǀkhaiǀkhaib, ǀkhaexū-i xare-e kha ūhâ tidega, ǂgaera âba ga ǂganammi, ǀaoǀhapina ra ǁnâu tidega, tsî mûra âba ga ǂganammi, ǂkhababa ra kōǀî tidega,

¹⁶ǁîb ge ǀgapiseb ǃnâ nîra ǁan, ǀgaisa hâǃkhaidi ǃhaogu didi ge ǁîb di ǀgapi sâuǃkhaise nîra ī, ǁîb di pere-eb ra māhe, ǁgam-i âb ge a ǁaposa.

¹⁷Sa mûra ge gao-aoba îsasib âb ǃnâ nîra mû, ǁîra ge ǃnūse ǁgoe ǃhūba nîra mû.

¹⁸Sa ǂgaob ge ǃhurib xa ǂâiǂâisen tsî: Mapab xoa-aoba hâ, mapab matare-aoba hâ? Mapab ǂgō-omga ra ǃgôa aoba hâ? ti nî mî.

¹⁹Ots ge ǃaruǀî ǁnā ǃgurixa ǁaesa mû tide, ǁnā ǁaes, ǃgam gowaba ūhâs, sats a ǁnâu ǁoas, ǀkhonxa namsa ūhâs, sats a ǁnâuǃā ǁoasa.

²⁰Kōǀî re Sions sada ǃhūgu di ǃāsa; sa mûra ge Jerusalemsa nîra mû sâusa ǁanǃkhaise, tentoms hîa aoǁguihe tidese; ǀurigu âs tātsēs kōse ǂgaeǂuihe tidese, tsî tsurigu âs tātsē ǃgâu tidese.

²¹Xawe ǃKhūb ge ǁnāpa sada tawa ǂkhaisase nîra hâ, tsîs ge ǁîsa ǃāgu di ǃā, hara ǃāgu kaigu di ǃā nîra ī. ǁGubiǂgau-i xare-i ge ǁîsa ǃgâuǃganu tide, tsî ǃnā hâ doe-ommi ge ǁîsa ǃgâu tide.

²²ǃKhūb ge a sada di ǂHanuǂhanu-ao; ǃKhūb ge a sada di ǂHanumā-ao; ǃKhūb ge a sada di Gao-ao amagab ge ǁîba nî sâu da.

²³Tsurigu âts ge ǃopo hâ: ǁÎgu ge ǂgaus di ǁaeguhaib âga ǀkhamasase ǃkhōǀgaipe ǁkhā tide, ǁîgu ge ǃkhauba nîra ǃā ǁoa; ǁnāǃnubain ge ǃnarixūn ǃnāsa ǁkhâuǁnâs dina nîra ǀgorahe, on ge ǃhomhân ona ǁkhâuǁnâna nîra ǀâbasen.

²⁴O i ge ǁansabe-i xare-e: Tita ge ǀaesen hâ, ti mî tide, ǁaes, hîa ǁîs ǃnâ ǁan hâs nî ǁoren ǀûbasa ūhâ xui-ao.