Read Khoekhoegowab Jesajab 34 Bible Online

Jesajab 34 - Khoekhoegowab bible

Jesajab 34

¹ǀGū du re, sadu ǃhaodo, ǁnâu du nîse; î so ǃgaoǃgâ saso ǁaeso; îb ǃhūba ǁnâu tsî ǁîb ǀoasib hoaba, ǃhūbaib tsî ǁîba xu ra ǀkhīn hoana.

²ǁAib ǃKhūb dib ge ǁaedi hoadi ǂama hâ tsî ǁgôasiba ǁîn di ǂnubis hoas ǂama; ǁîb ge ǁîna ǂāhen nîse ge māǁnâ.

³Tsî ǃgamhesan ân ge nîra aoxūhe, tsî ǁō hâ sorodi âna xub ge ǁîn di ǀōba nîra ǃapa, tsî ǃhomgu ge ǀaob ân xa nîra tsuni.

⁴Tsî ǂnubis ǀhommi dis hoas ge nîra ǁgao, tsî ǀhommi ge nîra xamikhâihe ǂkhani-i khami, tsî ǁîgu di ǂnubis hoas ge nîra ǁnā, ǂgaes ra ǂauxûiǂûhaisa xu ǁnā khami, ǀnomahais di ǂûs ra ǀnomahaisa xu ǁnā xase.

⁵Ti gôab go ākhanu ǀhommi ǃnâ xui-ao; mû, ǀgoraǃgâseb ge Edommi ai nîra ǁgôaxa tsî ǁnā ǁaes tita ge ǀâxares ai.

⁶Gôab ǃKhūb dib ge ǀaob xa ǀoa hâ, ǁîb ge go kau âub xa ǀaob ǁkhaogu tsî pirigu dib xa, âub pirigu di ǃnaidi dib xa. ǃKhūb ǂāǁguiba-e ūhâ Bosras tawa tsî kai ǂā-e Edomǁîn di ǃhūb ǃnâ xui-ao.

⁷Tsî ǀguiǁnâsaben ge ǁîn ǀkha nîra ǁgôa, tsî gomaga ǁgōgu ǀkha, tsî ǁîn di ǃhūb ge nîra ākhanu ǀaob xa, tsî ǁîn di tsarab ge âub xa nîra kaukauhe.

⁸Tsēs ǃKhūb ǀkhaogu dis nî ǁîsa xui-ao, kurib mādawa-amdi dib Sions di ǂnoaguǃkhais ǂama.

⁹Tsî ǁîn di ǃārogu ge peki ǃnâ nîra ǀkharaǀkharahe, tsî tsarab âna sulfuri ǃnâ; ǃhūb ân ge nîra khaura pek kai.

¹⁰ǁÎb ge tsuxub ǃnâs kas, tsēas kas hoasa ǀari tide, ǀamosib kōseb ge ǀanni âba nîra ǃapa. ǃHaosa xu ǃhaos kōseb ge nîra ǃū-aisa, ǀamosigu di ǀamosib kōseb ge khoeb xareba ǁnāǀî ǃgâu tide.

¹¹Tsî ǀaub tsî ǃnoab tsîkha ge ǁîba ǀumise nîra ūhâ; tsî ǀhones tsî gorab tsîra ge ǁîb ǃnâ nîra ǁan, ǀguirotsurib ǃū-aisib dibab nî ǁîn ǂama ǂgae xui-ao, tsî ǀguirotsurib ǀkhaiǃnâs diba xui-ao.

¹²ǁÎn di ǀgapiǃgôasaga, xawe gu ge a ǀkhai, ǁîgan ge gaosis ǃoa nîra ǂgai, xawe gaosagu ân hoagu ge xū tide.

¹³Tsî î-omgu ân ǃnâ di ge ǁkhūde nîra ǁhao, neteln tsî ǀgamin tsîna ǁîn di ǁaposa ǃkhaidi ǃnâ. O i ge nîra ǀgirin di ǁanǃkhai kai, tsî ǀamin di ǃgû-ai kai.

¹⁴On ge ǀgurun ǃgaroǃhūb dina, ǀgurun ǃnāǃnuidi dina ǁnāpa nîra ǃoa, ob ge ǁgâuaba horesab âba nîra ǂgaiǀî; ā, tsuxub di xoxon ge ǁnāpa nîra hâ tsîn ge sâǃkhai-e nîra hōbasen.

¹⁵ǁNāpas ge kai ǀhonesa nîra om tsî ôa tsî ǂkhamn âsa nîra hō, tsî sommi âs ǃnâ nîra ǀhaoǀhao; ǁnāpan ge ǃariǃkhān ona nîra ǀhao.

¹⁶Ôa ǃKhūb di ǂkhanis ǃnâ, î du khomai re: Nēn di ǀgui-i xare-i ge ǁkhuihe tide, nē-i kas nau-i kas hoasa i ge sā tide, ti ams ǂûs ge nēna ge mîmā, tsî ǁîb Gagab ǂûb ǁîna nîra ǀhaoǀhao xui-ao.

¹⁷ǁÎb ǂûb ge ǁîna ǀkhūsa ge aoba; tsî ǁîb di ǃommi ge ǁîna ge ǀgoraǂui ǀguiro-ūtsurib ǀkha, ǀamosib kōsen ge ǁîba ǀumise nîra ūhâ, ǃhaosa xu ǃhaos ǃoan ge ǁîb ǃnâ nîra ǁan.