Read Khoekhoegowab Jesajab 36 Bible Online

Jesajab 36 - Khoekhoegowab bible

Jesajab 36

¹Tsî i ge disihakaǀaǁî kurib gao-aob Hiskiab dib ǃnâ ge ī, Sanherib Asiriab gao-aob ge ǁaposa ǃādi Judab didi ǃoagu ǂoaxa tsî ǁîde ū ǃkhaisa.

²Ob ge gao-aob Asiriab diba Rabsakeba Laxisa xu Jerusalems ǃoa gao-aob Hiskiab ǁga ge sî kai toroǂnubis ǀkha. Tsîb ge ǁîba dâu ra ǁgammi di daob ǀgapise ǁgoe ǀaus dib tawa, ananaob di ǃhanab ǃoa garu daob tawa sī ge mâ.

³ǃNubai gu ge Eljakimmi, Hilkiab ôab, ommûǂamaob, tsî Sebnab, xoa-aob, tsî Joab Asafi ôab, ǂkhanisâu-aob tsîga ǁîb ǃoa ge ǂoa.

⁴Ob ge Rabsakeba ǁîgu ǃoa ge mî: Mîba Hiskiaba: Nētib ra mî ǁnā kai gao-aob Asiriab diba: Mâ ǂgomaiǂnûi-e kha ǁnâi, sats ūhâ-e?

⁵Sats ge ra ǂâi: Amǁgaukha di mîs ǀguis ge a ǁî, ǀapes tsî ǀgaib tsîra torob dira ge hâ. Tsî nēsi, tari-i aits ra ǂgomaiǂnûi, ots ra ti ǃoagu khâima?

⁶Kō re, sats ra ǂgomaiǂnûi ǁnā khôa hâ ǂāb Egipteb ai, ǁnā ǂāb, khoe-i ga ǁîb ai ǃgâsen ǃnubai ǃommi â-i ǃnâ ǂgâ tsî ǁîba ra ǃkhāǃganuba: ǁNātib ge Faraob, Egipteb di gao-aoba ība ǁnān, ǁîb ai ra ǂgomaiǂnûin hoana.

⁷Tsî tita ǃoats ga mîo: Sida ge ǃKhūb sida di Elob ai ra ǂgomaiǂnûi, ti: ǁNā tamaba kha, ǁîb ǀgapigu âb tsî altardi âbab ge Hiskiaba ūbē tsî Judab tsî Jerusalems tsîra ǃoa ǁîb xa: Nē altars aiǃâ du nî ǃhonǁgoa, ti mîba?

⁸ǁNâi nēsi ǁgonagu ti ǀhonkhoeb, Asiriab di gao-aob ǀkha: O ta ge tita satsa ǀgamǀoadisi hāna nî mā, ǃgapi-aogats ga ǁîn ai ǂnûi ǁkhāo.

⁹Tsî matits kha ǁnâi nî ǁkhaedawa ǁkhā ǃkhams ti ǀhonkhoeb di hoan xa ǂkhari ǃgāgu di ǀgui gaosab ǀguib disa? Xawe sats ra Egipteb ai ǂgomaiǂnûi kunidi ǃaroma tsî ǃgapi-aogu tsîn ǃaroma.

¹⁰Tsî nēsi, ǃKhūb osesa ǁnâi nē ǃhūb ǃoa ta ge ǂoaxasa, ǁîba ta nî hîkākāse? ǃKhūb kom tita ǁga: ǃApa nē ǃhūb ǃoagu îts ǁîba hîkākā, ti ge mîo.

¹¹ǃNubai gu ge Eljakimmi tsî Sebnab tsî Joab tsîga Rabsakeb ǃoa ge mî: Sa ǃgāge ǃoa Sîriaǁîgowab ǃnâ ǃhoa, ǃgâise ge ǁîba ra ǁnâuǃā xuige, îts tā Jodeǁîgowab ǃnâ ǃhoa-ū ge, ǁnā ǁaes ǂnubiǂgoab ai hâs ra ǁnâuse.

¹²Ob ge Rabsakeba ge mî: Ti ǀhonkhoeba kha sî teb ge sa ǀhonkhoeb ǃoa tsî sago di ǀhonkhoeb tsî sago ǀguigo ǃoa nē mîde ta nî ǃhoase? ǁNā aogu, ǂnubiǂgoab ai ǂnôagu ǃoa tamasa, sago ǀkha gu nî ǁîgu di xauba ǂûse tsî ǁîgu di ǀūba āse?

¹³Ob ge Rabsakeba khâi tsî ǃgari dommi ǀkha Jodeǁîgowab ǃnâ ǂgai tsî ge mî: ǁNâu re mîdi ǁnā kai gao-aob Asiriab dib dide!

¹⁴Nētib ra gao-aoba mî: Ab Hiskiaba sago tā ǂgaeǂhapu, ǁîb sago ore ǁkhā tide xuige.

¹⁵Îb Hiskiaba sago ǃKhūb ai ǂgomaiǂnûi kai, mî rase: ǃKhūb kom amase nîra ore dao, nē ǃās kom gao-aob Asiriab dib ǃomǁae māhe tideo.

¹⁶Tā Hiskiaba ǃgâ; nētib ra Asiriab di gao-aoba mî xuige: ǂKhîba tita ǀkha dī, î du tita ǁga ǂoaxa, î du ǂû re mâ-i hoa-e ǁî-i di ǂauxûiǂûhais xa, tsî mâ-i hoa-e ǁî-i di ǀnomahais xa, î du ā mâ-i hoa-e ǁî-i ǀaus di ǁgam-i xa,

¹⁷hā tsî ta nî ǃhū-i, sadu di ǃhūb khami ī-i ǃoa ūsī dus kōse, ǃhū-i ǃhorob di-i tsî ǂkhon ǂauxûib di-i, ǃhū-i pereb tsî ǂauxûiǂûǃhanagu di-i ǃoa.

¹⁸Îb Hiskiaba sado tā ǂgaeǂhapu mî rase: ǃKhūb ge nîra ore da. Elogu ǁaedi diga kha mâb hoab âga ǁîb di ǃhūba oreb ge gao-aob Asiriab dib di ǃomǁaeba xu?

¹⁹Mapa gu hâ Hamats tsî Arpads tsîra di eloga? Mapa gu hâ Sefarvajims di eloga? Ore gu ge Samariasa ti ǃomǁaeba xu?

²⁰Mâga nē ǃhūgu elogu hoagu diga, hîa ǁîgu ǃhūga ti ǃomǁaeba xu ge ore ǁkhā iga, ob ǃKhūba Jerusalemsa ti ǃomǁaeba xu nî ore?

²¹Xawe gu ge ǃnō tsî ǀgui mî-i xare-e ǃeream bi tama ge i, gao-aob ge: Sago ge ǃeream bi tide, ti mîmā xui-ao.

²²ǃNubai gu ge Eljakimmi, Hilkiab ôab, ommûǂam-aob, tsî Sebnab, xoa-aob tsî Joab, Asafi ôab, ǂkhanisâu-aob tsîga ǀkhauhe hâ saran ǀkha Hiskiab tawa ge sī, tsî gu ge mîdi Rabsakeb dide ǁîba ge ǂanǂan.