Read Khoekhoegowab Jesajab 37 Bible Online

Jesajab 37 - Khoekhoegowab bible

Jesajab 37

¹Tsî i ge ge ī, gao-aob Hiskiab ge ǁnâuo, ob ge saran âba ǀkhau tsî ǁhō-e ana tsî ǃKhūb di ommi ǃnâ ge ǂgâ.

²ǁNās khaoǃgâb ge Eljakimmi, ommûǂamaob tsî Sebnab, xoa-aob tsî kaigu pristergu digu tsîga ǁhōga anasen hâǃâ, Jesajab, kēbo-aob, Amob ôab ǃoa ge sî.

³Tsî gu ge ǁîb ǃoa ge mî: Nētib ra Hiskiaba mî: Nē tsēs ge a ǂōǂōsib tsî ǃaob tsî ǃkhāǃkhās tsîn di tsē: ǀGôan ge ǃnaes kōse go sī, xawe-i ge ǁoraǀgai-i xare-e a ǀkhai xui-ao.

⁴ǀNîsib ge ǃKhūb, sa Eloba Rabsakeb di mîde nî ǁnâu, ǀhonkhoeb âb, Asiriab di gao-aob xa ge sîheb dide, ûitsama Elobab nî ǃhōga tsî mîdi ǃKhūb sa Elob ge ǁnâudi ǀkhab nî ǀaoga; ǁnâi ǀgoreba re ǁnā ǃgau gen hîa nî hōhena.

⁵Tsî ǃgāgu gao-aob Hiskiab digu ge Jesajab tawa sīo,

⁶ob ge Jesajaba ǁîgu ǃoa ge mî: Nēti mîba sago di ǀhonkhoeba: Nētib ra ǃKhūba mî: Tā ǃao ǁnā mîdi hîats go ǁnâudi xa, Asiriab gao-aob di ǃgāgu tita go ǃkhāǃkhā-ū di xa.

⁷Mû, tita ge gaga-e ǁîb ǃnâ nîra mā, ob ge gom-e ǁnâu tsî ǁkhawa ǁîb di ǃhūb ǃoa nîra oa, o ta ge tita ǁîba gôab ǀkha ǃhūb âb ǃnâ nîra ǁnā kai.

⁸Nētib ge Rabsakeba oa tsî Asiriab di gao-aoba Libnasa ra ǃkhamūse ge hō; Laxisa xub ge ǂnauǁnâ tib ge ǁnâu xui-ao.

⁹Tsî Tirhakab, Etiopiab di gao-aob xab ge nēti ǁnâuo: Mû ǁîb ge ǃkhamū tsi nîse go ǂoa, ti, ob ge ǁkhawa sîsabega Hiskiab ǃoa sî tsî ge mî:

¹⁰Nēti go ge Hiskiab Judab gao-aob ǃoa ǃhoa tsî nî mî: Tā ǂgaeǂhapukaisen sa Elob, ǁîb aits ra ǂgomaiǂnûib xa, mî raǃâ: Jerusalems ge Asiriab gao-aob ǃomǁae māǁnâhe tide.

¹¹Mû, sats ge go ǁnâu, tare-e gu Asiriab di gao-aoga ǃhūgu hoaga ge dī-ū ǃkhaisa, ǁîga ra ǀâxareǃâ; tsî satsa ǁnâi sâuhets nî?

¹²Elogu ǁnā ǁaedi, ti îgu xa ge hîǀhuruhedi diga ǁîde ore gu ge? Gosanǁîn tsî Haranǁîn tsî Resefǁîn tsî Edenni ôan, Telasars tawa hân tsîna?

¹³Mapab hâ Hamats di gao-aoba tsî Arpads di gao-aoba tsî ǃās Sefarvajims di gao-aoba tsî Henas tsî Avas diba?

¹⁴Tsî Hiskiab ge ǂkhanide sîsabegu ǃomǁaeba xu hō tsî khomaio, ob ge ǃKhūb di ommi ǃoa ǃapa tsî ǁîde ǃKhūb di ais aiǃâ ge khoraǁgui.

¹⁵Ob ge Hiskiaba ǃKhūb ǃoa ǀgore tsî ge mî:

¹⁶O, ǃKhūts ǂnubidi ditse, sats Israeli di Elotse, xerugu ǁaegu ǁan hâtse, sats ǀguits ge ǃhūbaib gaosidi di Elotsa, sats ge ǀhommi tsî ǃhūbaib tsîkha ge kuru.

¹⁷ǃKhūtse, ǂō ǂgaes âtsa îts ǁnâu; mûra âtsa khowa ǃKhūtse, îts mû; îts ǁnâu mîdi Sanherib go ûitsama Elotsab nî ǃhōse sîdi hoade.

¹⁸Amase ǃKhūtse, Asiriab di gao-aogu ge ǁnā ǃhūgu hoaga ǁîgu di ǀkharigu tsîn ǀkha ge hîkākā.

¹⁹Tsî gu ge ǁîn di eloga ǀaes ǃnâ ge aoǂgā, elo tamagu tsî khoen ǃomgu di sîsenni a xui-ao, haigu tsî ǀuigu tsîga; ǁnā-amaga gu ge nēga ge hîkākā ǁkhā i.

²⁰Tsî nēsi ǃKhūtse, sida Elotse, ǁîgu di ǃomǁaeba xu ore da re, o di ge ǃhūbaib gaosidi hoade nî ǂan, sats ǀguits a ǃKhū ǃkhaisa.

²¹ǃNubaib ge Jesajab, Amob ôaba, Hiskiab ǃoa sî tsî ge mî: Nētib ra ǃKhūb, Israeli Eloba mî: ǁNān, titats ge Sanherib Asiriab gao-aob ǃoagu ǀgorena ta ge go ǁnâu.

²²Nēs ge ǁnā mîs ǃKhūb go ǁîb ǂama ǃhoasa: ǂKhamkhoes Sionni ôas ra ǃharaxū tsi. ǁÎs ra ǃhō tsi, ǀgôas Jerusalems dis ra sa khaoǃgâ ǃnabindana.

²³Tari-ets ǃhō tsî go ǃkhāǃkhā? Tsî tari-i ǃoaguts kha sa domma ūkhâi tsî mûra âts ǀkha go ǃgapakhâi? ǃAnub Israeli dib ǃoagus komo!

²⁴Sa ǃgāga xuts ge ǃKhūba ǃhō tsî go mî: Tita ge ti kunidi di ǂguib ǀkha ǀgapib ǃhomgu dib ai go ǃapa Libanonni di ǀkhāb ai. Tsî tita ge ǁîb di ǀgapi sederhaidi tsî ǁîb di ǃkhōǂuihesa denehaidi tsîde nîra ǁhāǁnâ, tsî ta nî ǀams ǀgapib âb dis ai sī, îsa ǃaub âb di ǁoes ǃnâ.

²⁵Tita ge xora tsî ǁgam-e ge ā. Tsî tita ge ti ǂaiǃnāgu ǀkha Egipteb ǃāgu hoaga ge ǂnâǂnâ.

²⁶ǁNâu tamats kha hâ ǁî ǃkhaisa ta ge aibekam ǁaeba xu ǀnai dīsa, tsî hugasa xu ǁî ǃkhaisa aiǂhomisa? O ta ge ǁîsa nēsi go hā kai, sats nî ǁaposa ǃāde ǀkhaiǃnâ ǃkhaise hîkākāse.

²⁷ǁNā-amagan ge ǁîdi ǁansabena ǀgaio ge i, ǁîn ge ǃhurigâ tsî tao ge hâ i, ǁîn ge ǀgâb ǃaub dib khami ge ī tsî ǃam ǁhaon khami, ǀgâb omǂamaidi dib khami tsî khauhe hâ ǃhorob khami, ganupeb ǂhanuse mâ tama hîa.

²⁸Xawe tita ge a ǂan sa ǂnûs tsî sa ǂoas tsî sa ǂgâs tsî tita ǃoaguts ra ǂkhupi ǂkhupiba.

²⁹Tita ǃoaguts ra ǂkhupi ǂkhupib ǃaroma tsî ǂnīǂnīsenni âts ti ǂgaera ǃnâ go hā amaga ta ge ti haiǂguisa sa ǂguis ǃnâ nîra ǁgui, tsî ti ǂgā-amǃnâxūsa sa amǁgaukha ǃnâ, o ta ge satsa ǁnā daob ǁîba-ūts ge hāb ǁkhāba-ū nîra oa kai.

³⁰Tsî nēs ge satsa saose nî ība: Nē kurib ǃnâts ge ǁnān, ǁî-aitsama ra ǃīna nîra ǂû; tsî ǀgamǁî kurib ǃnâ ǁkhawa ga ǃīna; xawe ǃnonaǁî kurib ǃnâ tsoro, î du ǃgao, î du ǂauxûiǂûǃhanaga ǂgā, î du ǁîgu di ǂûn xa ǂû.

³¹Ûiǃgau gen Judab ommi din ge ǁkhawa ǃnagabǀî nîra ǃnomaǃkhō tsî ǀgapisebǀî nîra ǂûtani.

³²Jerusalemsa xun ge ǃgau gena nîra ǂoa, tsî Sionǃhomma xu ge ûina. ǃKhūb ǂnubidi dib di ôasasib ge nēsa nîra dī.

³³ǁNā-amaga, nētib ra ǃKhūba mî Asiriab gao-aob xa: ǁÎb ge nē ǃās ǃnâ hā tide tsî ǂā-e ǁîs ǃnâ ǁkhâuǂgā tide. ǁKhātib ge khōsikhō-i xare-i ǀkha ǁîsa hāǂam tide tsî ǁkhui-i xare-eb ge ǁîs ǃoa-ai aokhâi tide.

³⁴ǁNā daob ǁîba-ūb ge hāb aib ge ǁkhawa nîra oa; xawe nē ǃās ǃnâb ge ǂgâ tide, tib ra ǃKhūba mî.

³⁵Tita ge nē ǃāsa nîra sâu xui-ao, ǁîsa ta nî orega, tita ǃaroma tsî Davib ti ǃgāb ǃaroma.

³⁶Ob ge ǀhomǃgāb ǃKhūb diba ǂoa tsî Asiriab di ǂnubis ǃnâ ǀguikaidisi tsî ǁkhaisadisikoroǀaǀoadisiga ge ǂnau. Tsî ǃnauǁgoaga gu ge khâio, mû, o gu ge ǁîgu hoaga ǁō hâ soro ge i!

³⁷Ob ge Sanherib, Asiriab gao-aoba oa tsî ǃgû tsî ǁkhawa ge oa; tsîb ge Nineves tawa sī ge hâ.

³⁸Tsî i ge ge ī, Nisroxi, ǁîb elob di ommi ǃnâb ge ǃhonǁgoa ǃnubai kha ge ǁîb ôakha Adramelexi tsî Sareseri tsîkha gôab ǀkha ǁhāǃan bi ǃkhaisa, tsî kha ge ǁîkha Araratǃhūb ǃoa ge duni tsî Esar-Hadonni, ǁîb ôab, ge ǁîb di ǃās ǃnâ ge gao-ao kai.