Read Khoekhoegowab Jesajab 38 Bible Online

Jesajab 38 - Khoekhoegowab bible

Jesajab 38

¹ǁNā tsēdi ǃnâb ge Hiskiaba ǁōb kōse ge ǀaesen. Ob ge kēbo-aob Jesajab, Amob ôaba, ǁîb tawa hā tsî ǁîb ǃoa ge mî: Nētib ra ǃKhūba mî: Sa omma ǃkhō-ūnuǃgâ, ǁōts nîra tsîts ûi tide xuige.

²ǃNubaib ge Hiskiaba ais âba unu ǂnubiǂgoabǀî, tsî ǃKhūb ǃoa ǀgore

³tsî ge mî: O ǃKhūtse, ǂâi re, sa ais aiǃâ ta amab ǃnâ tsî ǀoasa ǂgaob ǀkha tanisen tsî sa mûǁae a ǃgâina gere dī ǃkhais xa. Tsî Hiskiab ge ǃgarise ge ā.

⁴ǁGoasis ge mîs ǃKhūb disa Jesajaba ge hāba, mî raǃâ:

⁵ǃGû îts Hiskiaba sī mîba: Nētib ra ǃKhūba mî, Elob sa îb Davib diba: Tita ge sa ǀgoresa go ǁnâu-am, tita ge sa ǁgamroga go mû; mû, tita ge disikoroǀa kuriga sa tsēdi tawa nîra ǀaro.

⁶Tsî tita ge satsa gao-aob Asiriab dib di ǃomǁaeba xu nîra ore tsî nē ǃās ona, tsî tita ge nē ǃāsa nîra sâu.

⁷Tsî nēs ge saose nîra ība tsi ǃKhūb xa, ǃKhūb, ǁnā mîs hîab go ǃhoasa nîra dī ǃkhaisa:

⁸Mû, tita ge sommi ǁnā ǁgaragu sores ǀkha Axasi di soreǁgauxūs di ǁgaragu ai ra ǁgôagu diba disi ǁgaragu kōse nîra oa kai. Os ge soresa disi ǁgaragu kōse ǁnā ǁgaragu īǁgôa ra gu ǃnâ ge oa.

⁹Nēs ge xoas Hiskiab, Judab gao-aob disa, ǀaesen tsîb ge ǁkhawa ǀaesenni âba xu ǂgau ǃnubai.

¹⁰Tita ge ge mî: Ti tsēdi di ǃgaoǁnâs ǂama ta ge tita ǀhobas di ǁāgu ǃnâ nîra ǂgâ, ǃgau hâ ǁaeb ti kurigu diba ta ge ra ǀâǀhanahe.

¹¹Tita ge ge mî: Tita ge ǃKhūba ǃaruǀî kō tide ǃhūb ûitsaman dib ǃnâ; tita ge khoena ǃaruǀî kōǀî tide tsî ǁansaben ǃhūbaib din ona.

¹²Ti ûib di ǁaeb go toa, tsîb ge ǃûi-ao-i di oms khami go ūbēhe. Tita ge ti ûiba go ǃgaoǁnâ, ǁapakuru-aob ǃkhaib âba ra ǃgaoǁnâ xase, ǁîb ge tita ǁapab khami nîra ǃgaoǁnâ; tsēs ra ǃnâsa xu tsuxub ǁgats ra satsa tita dītoa.

¹³Tita ge ǁgoas kōse ge ǃâu; xammi khamib ge ti ǂkhōgu hoaga ge khôaǂkhū; tsēs ra ǃnâsa xu tsuxub ǁgats nî satsa tita dītoa.

¹⁴Kran-ani-i kas swabel-ani-i kas khami, ǁnās ǁkhās xase ta ge tita goro ā, tita ge ǂnabu-i khami goro ā. Ti mûra ge ǀgapise go kōkhâi; ǃKhūtse, tita ge ra ǁgâiǀāhe, ǁnâi satsa mâba te re!

¹⁵Tare-e ta tita nî ǃhoa? ǁÎb ge tita mîmâiba khamib ge ǁkhāti go dī. O ta ge tita nēsi ǂause nîra ǃgû ti kurigu hoagu kōse ti ǀoms di ausib xa.

¹⁶ǃKhūtse, nē xūn tawab ra khoeba ûi; nēn hoan ge ti gagasa ûise ība. Sats ge tita go ǂuruǂuru tsî ǂgauǂgau xui-ao.

¹⁷Mû, ausib ge tita go ǂkhî kaiba ǁnā auba. Tsî sats ge ti ǀomsa ǀnammi ǃnâ go ǁnam, āb hîkākās dib ǃnâs sī tidega; sats ge ti ǁoren hoana sa khaoǃgâ ao xui-ao.

¹⁸ǀHobas satsa koa tide, ǁōb satsa kare tide; ǀhobas ǃnâ ra ǁgôan sa amab ai ǂgomǃgâsen tide xui-ao.

¹⁹Ûitsamab, ā, ûitsamab ǁîb ra koa tsi tita nētsē ra dī xase; ǁgûb ge ǀgôana sa amaba nîra ǂanǂan.

²⁰ǃKhūb ge ǂhomisen hâ, titab nî orese, ǁnā-amaga a da ti ǁapaxaǀkhō-ūxūs ai ǀkhō sada ûitsēdi hoadi kōse, ǃKhūb di ommi ǃnâ.

²¹Tsîb ge Jesajaba ge mî: An ǀnomahais ǂûn di naru-e ū, în ǁî-e plaisterse xâib ai ǁgui, îb ǂgau.

²²Ob ge Hiskiaba ge mî: Mâsa nî sao, tita ǃKhūb di ommi ǃoa nî ǃgû ǃkhais disa?