Read Khoekhoegowab Jesajab 39 Bible Online

Jesajab 39 - Khoekhoegowab bible

Jesajab 39

¹ǁNā ǁaeb ǁkhāb aib ge Merodax-Baladanni, Baladanni ôab, Babilons di gao-aoba, Hiskiaba ǂkhanidi tsî ǀkhaexū-i tsîna ge sîba; ǀaesenni ge hâ i tsîb go ǁkhawa ǂuru ǃkhaisab ge ǁnâu amaga.

²Ob ge Hiskiaba ǁîn ǂama ǃgâiaǂgao tsî ǁîna ǁui-ommi âba ge ǁgau, ǀhaiǀurib tsî ǃhuniǀurib tsî ǃgâihamxūn tsî hoan xa ǃgâi olib tsî ǁîb di ǁâtanin ommi tsî ǁhōdi âb ǃnâ ra hōhen hoana. ǀGui xū-i xare-i ge hâ tama ge hâ i, ommi âb ǃnâs kas, ǁîb di gaosis ǃnâs kas hoasa, Hiskiab ǁîga ǁgau tama-e.

³ǃNubaib ge kēbo-aob Jesajaba gao-aob Hiskiab tawa hā tsî ǁîb ǃoa ge mî: Tare-e gu ǁnā aoga go mî, tsî mapa xu gu go hā? Ob ge Hiskiaba ge mî: ǁÎgu ge ǃnū ǃhūba xu ge hâ, Babilonsa xu.

⁴Ob ge ge mî: Tare-e gu go mû sa ommi ǃnâ? Ob ge Hiskiaba ge mî: ǁÎgu ge ti ommi ǃnâ hân hoana go mû. ǀGui xū-i xare-i ge hâ tama ti ǁuigu ǃnâ, ǁîga ta ǁgau tama-e.

⁵Ob ge Jesajaba Hiskiab ǃoa ge mî: ǁNâu ǃKhūb, ǂnubidi dib di mîsa:

⁶Mû, tsēdi ge nîra hā, on ge sa ommi ǃnâ hân hoan tsî sa îgu ge nētsēs kōse ǀhaoǀhaon tsîna Babilons ǃoa nîra ūǃgûhe; xū-i xare-i ge ǃgau tide, tib ra ǃKhūba mî.

⁷ǁNās tawan ge sa ôagu, satsa xu nî ǀkhīgu tsî sats nî hōgu xa ū, tsî nî ǁîga gao-aob di ǃoaba-aose dī Babilons gao-aob di î-ommi ǃnâ.

⁸Ob ge Hiskiaba Jesajab ǃoa ge mî: Mîs ǃKhūb dis sats go mîs ge a ǃgâi. Tsîb ge ǁîba ǁkhāti ge mî: ǂKhîb tsî amab tsîkha nî hâ ti tsēdi ǃnâ amaga.