Read Khoekhoegowab Jesajab 40 Bible Online

Jesajab 40 - Khoekhoegowab bible

Jesajab 40

¹ǁKhaeǂgao go re, ǁkhaeǂgao go re ti ǁaesa, tib ra mî sadu Eloba.

²ǃHoa go re ǂgaob Jerusalems dib ǃoa, î go ǁîsa ǂgaiǀî re, ǃkhammi âs go toa tsî ǂhanuoǃnâsib âs ǂkhîǂkhîbahe hâ ǃkhaisa, ǃKhūb di ǃomma xus ge ǃhonarisase hō ǃkhaisa, ǁîs di ǁoren hoan ǃaroma.

³Dommi ǂgai rab dib ǃgaroǃhūb ǃnâ: ǂHomi du re daob ǃKhūb diba; î du ǃgarob ǃnâ ǂhau ǃganna dība sada di Eloba.

⁴ǃGoaǃnāgu hoagu ge nîra ǀgapiǀgapihe, tsî ǃhomgu hoagu tsî ǃnomdi hoadi ge nîra ǃgamǃgamhe; tsî gama-i ge nîra ǂhanu, tsî ǀuixa-i ge nîra ǂgā kai.

⁵Tsî ǂkhaisib ǃKhūb dib ge nîra ǂhaiǂhaisen, tsî ǁgans hoas ge ǀhûpe nîra mû, ams ǃKhūb dis go ǁîsa ǃhoa ǃkhaisa:

⁶Dommi ge: ǂGai! ti ra mî. Ob ra: Tare-e ta nî ǂgai? ti mî. ǁGans hoas ge a ǀgâ, tsî ǀnamǀnamsasib âs hoas ge ǃaub di ǃkhās khami ī.

⁷ǀGâb ra ǂnâ, ǃkhās ra ǁnā, Gagab ǃKhūb dib ga ǁîs ǃnâ ǃgomo. Amases ge ǁaesa a ǀgâ.

⁸ǀGâb ra ǂnâ, ǃkhās ra ǁnā, xawe mîs sada Elob dis ge nîra hâhâ ǀamosib kōse.

⁹O, Sions, sa ǃgâiǂhôa-aose, ǃapa re ǀgapi ǃhommi ai. O, Jerusalems sas ǃgâiǂhôa-aose, dommi âsa ǀgaisase ǃhâkhâi re, ǃhâkhâi bi îs tā ǃao re; mîba re Judab di ǃāde: Mû, nēb hâ sadu di Eloba!

¹⁰Kō, ǃKhūb, ā ǃKhūb ge ǀgaisab ase nîra hā, tsî ǁôab âb ge nîra gao. Kō, amǃnâs âb ge ǁîb ǀkha hâ, tsî sîsenamǃnâs âb ge ǁîb ais aiǃâ hâ.

¹¹ǁÎb ge gūn âba ǃûi-ao-i khami nîra ǃûsi; ǁîb ge ǁkhaon âba ǁîb ǁôakha ǃnâ ǀhaoǀhao tsî tîǂams âb ǃnâ nîra tani; dai ranab ge ǁîba ǂause nîra ǂgaeǂgui.

¹²Tariba ǁnāb, ǁgamga ǃoms âb ǀkha ge ǀnōǁnâ, tsî ǃhomga ǂhaob ǀkha ǀnōba? Tsî ǃhūbaib tsaraba ǀguiro-ūxū-i ǀkha ge ǀguiroba, tsî ǃhomga ǀnō-ūda-i ǀkha ge ǀnōba tsî ǃnomde ǀnō-ūxū-i ǃnâ?

¹³Tariba ǁnāb, ǃKhūb di Gagaba ge ǂgaeǂguiba, tsî tariba ǁîba ǀapemā-aose ge ǁgauba?

¹⁴Tarib ǀkhab kha ǀapeǀhao-e ge dī, ǁnâuǃābab nî ǁîba māse, tsî ǂhanub daobab nî ǁîba ǁgause? Tsî ǂansab nî ǁîba ǁkhāǁkhāse, tsî daob ǀoasa ǁnâuǃāb dibab nî ǁîba ǂanǂanse?

¹⁵Mû, ǁaedi ge emers ai hâ ǁgamro-i axase ra ǃgôahe, tsara-i ǀnō-ūxūs di-i axase; mû ǁîb ra ǃnāǃnuide ǀui tsararo-i axase ūkhâi.

¹⁶Tsî Libanonni ge khausa ǂâuba tama hâ, tsî ǀgurun âb ge khauǁguibasa ǂâuba tama hâ.

¹⁷ǁAedi hoadi ge ǁîb aiǃâ xū tamase i; tsî di ge ǁîb xa xū tamase tsî ǁausib xa ǂkharise ra ǃgôahe.

¹⁸Tari-i ǀkha du kha ǁnâi Eloba nî ǂkhō? Mâ īsi-i ǀkha du kha ǁnâi ǁîba nî ǀguiti-ī kai?

¹⁹Sîsenaob ra ī-e ǂnâ, tsî ǃhuniǀuriǂnau-aob ra ǁî-e ǃhuniǀurib ǀkha ǃkhûǃgâ, tsîb ra ǀhaiǀuriǁkhamroga ǂnâǀaro.

²⁰ǀGâsab, ǁkhāob, ǁîb ra hai-i hîa gunu tama-e ǁhûiǂuibasen; ob ra gā-ai ǁāǁāǁkhāsabeba ôabasen, ī-i hîa ǁnope tide-eb nî kuruse.

²¹ǂAn tama du hâ? ǁNâu tama du hâ? Tsoatsoasa xu hōhōhe tama du hâ? ǃGaoǃgaodi ǃhūbaib didi ai ǃgaoǃgâ tama du hâ?

²²ǁNāb ge ǁîb, ǃhūbaib di ǂgaeǂnamis ai ǂnôab, tsî ǁansaben âs ge ǂhoms khami ī. ǁÎb ge ǁnāb ǀhomga ra ǃāǂuiba ǀui ǃkhai-i axase, tsîb ra ǁîga tentoms khami ǃāǂui ǁanǃnâhe gu nîga;

²³ǁîb gaosaga ra ǁauǁauba; ǂhanuǂhanu-aogu ǃhūbaib digab ra ǁîba ǁauxū kai.

²⁴Ā, ǁîgu ge ǂgāhe tama hâ, ā, ǁîgu ge tsorohe tama hâ, ā, ǁîgu di ǁhāǁnâhe hâ ǃgaos ge ǃhūb ǃnâ ǃnomaǃkhō tama hâ, tsî ǁîb ga ǁîga ǃgomǀîo, o gu ge nîra ǂnâ, ob ge ǁgaoǂoaba ǁîga ǃgaoda-i axase nîra ǃgombē.

²⁵Tari-i ǀkha du kha ǁnâi tita nî ǂkhō, ǁî-i ǀkha ta nî ǀguiti-ī-e? tib ra ǃAnuba mî.

²⁶Kōkhâi î du mû tarib a ǁnā, nē xūna ge kuruba tsî tarib a ǁnā, ǂnubis âna ǀgaus ǀkha ra ūǀkhība ǃkhaisa; ǁnāb ǁîn hoana ǀons ǀkha ra ǂgaiba kaisib ǁîb di ǀgaigu dib ǃoa, tsî kaiseb a ǁîba ǁkhā ǃkhais xa tsî ǀguiro-i xare-i ge ǁkhuihe tama hâ.

²⁷Tsî tarexats ra mî, sats Jakotsa, tsî tarexats ra ǃhoa, sats Israeltsa, ti daob ge ǃKhūb aiǃâ gaugauhe hâ, tsî ti ǂhanub ge ti Eloba ra ǃgû-īǀkhā? ti.

²⁸ǂAn tamats kha hâ, ǁnâu tamats kha hâ, ǀamo Elob, ǃKhūb ǀkhâuǀamdi ǃhūbaib didi di Kuru-aob, ǀhupu tsî tsau tama ǃkhaisa? ǁNâuǃāb âb ge a ôaǃnâǃganuhe ǁoasa.

²⁹ǁÎb ra ǀhupu hâna ǀgaiba mā tsî ǁîb ra ǁnāb hîa ǁkhāoǃnâba ǀgaiba ǂguiǂguiba.

³⁰ǂKhamn ge ǀhupu tsî nîra tsau, tsî ǂkham khoegu ge ǂanǂansase nîra ǁnā;

³¹xawe ǁnān ǃKhūb ai ǂgomaiǂnûi hân ge ǀasa ǀgaiba nîra hō, ǁîn ge ǁgabogu ǀkha nîra ǁkhanaǃapa ǃariǃkhān xase; ǁîn ge nîra ǃkhoe, xawe ǀhupu tide, ǁîn ge nîra ǃgû, xawe tsau tide.