Read Khoekhoegowab Jesajab 41 Bible Online

Jesajab 41 - Khoekhoegowab bible

Jesajab 41

¹ǃNō ti aiǃâ, saso ǃnāǃnuiso! Tsî ǁaede a di ǀasa ǀgaiba ana! An ǀgūse dāhā în ǃhoa, î da ǀhûpe ǀgoraǃgâsa ǀgū.

²Tari-e aiǂoasa xu ǁnā ǂhanu-aiba ge ǂkhaiǂkhaikhâi? Tari-e ǁîba ǂais âb ai go ǂgai? Tari-e ǁaede ais âb ai mā tsî ge dī, gao-aogab nî gaoǂam ǃkhaisa? ǁÎb ge ǁîna gôab âba tsarab khami ge mā, tsî ǂāb âba doeǁgabēhe ra ǃgaoda-i khami,

³ǁînab nî sauruse, ǂkhîb ǀkhab nî ǃgûǃganuga, dao-i ǂaira âb ǀkhab ge ǃgû tama hâ i-i ai?

⁴Tariba ǁnāb, nēna ǁāǁā tsî ge dība, ǁnāb ǃhaode tsoatsoasa xu ra ǂgaiba? Tita, ǃKhūta, ǂGurota tsî ǀunis ai a ǁkhā ta.

⁵ǃNāǃnuidi ge ǁîsa mû tsî ge ǃao; ǀkhâuǀamdi ǃhūbaib didi ge ge ǀkhū. ǁÎgu ge ǀgū tsî ge dāhā;

⁶ǀguib ge nauba ge hui tsî horesab âb ǁga: ǀGai re! ti ge mî.

⁷Tsî sîsenaob ge ǃhuniǀuriǂnau-aoba ge ǀgaiǀgai, ǁnāb hamers ǀkha ra ǂnauǂkhanuǂkhanub, ǁnāb ambeli ai ra ǂnau tsî solderxūs xa ǁîs a ǃgâi ti ra mîba; ǁnās khaoǃgâb ra ǁîsa ǀuridan ǀkha ǁapoǁapo, ǁîs ǁnobe tidega.

⁸Xawe sats Israelts, ti ǃgāts, sats Jakots, tita ǁhûiǂuibasen hâtse, sats surits Abrahammi ti ǀhōsab ditse,

⁹sats ǃhūbaib di ǀkhâuǀamde xu ta ge ǃkhō tsî ǁîb di ǀguri hâ ǃkhaide xu ta ge ǂgai tsî sa ǃoa: Sats ge a ti ǃgā, satsa ta ge tita ǃkhōǂuibasen hâ tsî aoxū tsi tama hâ, ti ge mîtse.

¹⁰Tā ǃao, tita ge sa ǀkha hâ xuige; tā sau, tita ge a sa Elo xuige. Tita ge ra ǀgaiǀgai tsi, tita ge ǁkhāti ra hui tsi; tita ge ǁkhāti ra mâǃgâ tsi amǀkhābǁôab ti ǂhanu-aisib dib ǀkha.

¹¹Mû, ǁnān satsa ǁaixaǂam hân hoan ge taotaohe, tsî taob xa nîra dāhe; ǁîn ge nîra ǁau xū kai, tsî satsa ga ǃkhamūn ge nîra kā.

¹²Sats ge ǁîna nîra ôa, xawe ǁîna hō tide; ǁnā khoen satsa ga ǂnoagu-ūn ge nîra ǁauxū kai, tsî satsa ga torodī-ū khoen ge nîra kā.

¹³Tita ǃKhūta, sa Elota, sa amǀkhāb ǁôaba ra ǃkhō xui-ao, tita hîa: Tā ǃao, tita ge ra hui tsi ti ra mîǀî tsi ta.

¹⁴Tā ǃao sats ǂunirots Jakotse, sas Israeli ǁaerose, tita ra hui du, tib ra ǃKhūba mî, tsî sa Ore-aob ge ǃAnub Israeli diba.

¹⁵Mû, tita ge satsa ǀāǀāsa dāǃnâkuniros, ǀā ǀuridana ūhâs ase ra dī, sats ge ǃhomga dāǃnâ tsî nîra ǂkhūǂkhū, tsî ǃnomdets ge satsa ǀapon axase nîra dī.

¹⁶Sats ge ǁîna nîra ǂoaru, ob ge ǂoaba ǁîna nîra ūbē, ob ge ǁgaoǂoaba ǁîna nîra ǀgaruǀgaru. Xawe sats ge nîra dâ ǃKhūb ǃnâ, Israeli di ǃAnub ǃnâts ge satsa nîra koasen.

¹⁷ǀKhomǀkhomsaben tsî ǂhâ hân tsîn ra ǁgam-e ôa, xawe i ge a ǀkhai; nams ân ra ǂnâ ǁgâs xa. Tita ǃKhūta ge ǁîna nîra ǁnâu-am; tita Israeli di Elota ge ǁîna ǁnāxū tide.

¹⁸Tita ge ǃāga ǀgapi ǃkhaidi ai nîra khoba tsî ǀaude ǃgoaǃnāgu ǁaegu, tita ge ǃgaroǃhūba ǁgamxa ǃkhaise nîra ǂnûi tsî ǂnâsa ǃhūba ǁgamǀause.

¹⁹Tita ge ǃgaroǃhūb ǃnâ nîra ǂgā; sederhais tsî sitimhais tsî mirdehais tsî ǀkherahais tsîde. Tita ge ǃgaroǃkhais ǃnâ nîra ǂgā; denehais tsî beukhais tsî bushais tsîdi hoade.

²⁰ǁÎn mû tsî ǂan tsî ǂâiǂâisen tsî nî ǀguiǁnâuǃāse, ǃKhūb di ǃommi ge nēsa dī tsî ǃAnub Israeli dib ge nēsa kuru ǃkhaisa.

²¹Ūǀkhī sadu di ǂnoaguǃkhaisa, tib ra ǃKhūba mî, ūǀkhī sadu di ǁaposa ǃhoadanmîde, tib ra gao-aob Jakob diba mî.

²²An ūǀkhī, în ǂhôa da ǁnā xūn hîa nîra īna; î du aibekam xūna ǂhôa re, mâ xūn ge ǁîna isa, î da ǁîn xa ǂâiǂâisen, î da ǀuniǀams âna ǂan, î du ǃgoaxana ǁnâu kai da.

²³ǂHôa ǁnā xūn, ega nîra hāna, î da mûǂan, elo du a ǃkhaisa. Ā, ǃgâidī î du tsūdī, î da ǁî ǃkhais xa ǂharugu, î da ǀguikōkō.

²⁴Mû, sadu ge ǀgapisiba ǃnā hâ, tsî sadu sîsenni ge ǃgaes diba ǃnā hâ. ǁNāb sadu ge a ǃkhōǂuibasenni ge a ǁgaiǁgaisa.

²⁵Tita ge ǀguiba ǀapasa xu nîra ǂkhaiǂkhaikhâi, tsî ǁîb ge nîra hā sores ra ǁhaipa xu, ǁîb ge ti ǀonsa nîra ǂgaiǀî. Tsîb ge ǂamkhoega nîra hāǂam ǂnubiǂgoab ǂamas axase tsî sūǂnubi-aob ra ǂgoaba dās ǁkhās xase.

²⁶Tariba ǁnāb tsoatsoasa xu xū-e ge ǂhôaba, ǂan da nîga, tsî aibesa xu: ǁÎb a ǂhanu ti da nî mî ǁkhāga, xawe ǀguib xareb ge ǀkhai ge i, hîa xū-e ra ǁnâu kaib, tsî khoe-i xare-i sadu di mîde ge ǁnâu-e.

²⁷ǂGurota ge tita, Sions ǃoa: Mû ǁnāpa ti ra mî ta, tsî Jerusalems ǃoa: Tita ge ǃgâiǂhôa-aoba nî mā si, ti ra mî ta.

²⁸Kōnǃgâ ta ge, xawe khoe-i xare-i ge ǀkhai ge i tsî nēn on ǃnâ, xawe ǀapemā-ao-i xare-i ge ǀkhai ge i, ǁîna ta ga dî tsî ga tita ǃereamna.

²⁹Mû, ǁîn hoan ge xū tama, ǁau xūgu ge ǁîn di sîsenga; ǁîn di ǂnâhesa īgu ge ǂoa tsî a ǁauxū.