Read Khoekhoegowab Jesajab 42 Bible Online

Jesajab 42 - Khoekhoegowab bible

Jesajab 42

¹Mû, ti ǃgāb, tita ra mâǃgâb, ti ǃkhōǂuisabeb, ti ǀoms ǁîb ǃnâ ǃgâiǂâisa ūhâba; tita ge ti Gagaba ǁîb ǃnâ ge mā; ǁîb ge ǂhanuba ǁaede nîra ūǀkhība.

²ǁÎb ge ǂgai tide, tsî ǁîb ge ǃau tide, tsî dommi âba ǃganni ai ǁnâu kai tide.

³ǂĀb ǀkhana hâbab ge ǁîba khôa tide, tsî ǀan ra tsurib di khauǃgauro-eb ge ǁîba ǀari tide; amab ǀkhab ge ǂhanuba nîra ūǀkhī.

⁴ǁÎb ge ǂkhabuǂâi tide, tsî ǁîb ge tsanaǁkhui tide, ǂhanubab nî ǃhūbaib ai mâis kōse. Tsî ǃnāǃnuidi ge ǁkhāǁkhās âba nîra ǃâu.

⁵Nētib ra mî Elob, ǁnā ǃKhūb ǀhomga ge kurub tsî ǁîga ge ǃāǂuib, ǃhūb tsî ǁîba xu ra ǀkhīna ge ǁguiǃāb, ǁnā ǁaes, ǁîb ai ǁan hâsa ǀomsa ra māba, tsî gagasa ra māb, ǁnān ǁîb ai ra ǀnarena.

⁶Tita ǃKhūta ge satsa ge ǂgai, ǂhanu-aisib ǃnâ; tsî tita ge satsa ǃommi âts tawa nîra ǃkhō, tsî tita ge satsa nîra sâu, tsî tita ge satsa ǃgaeǀhaos ǁaes dise nîra mā, ǁaedi di ǃnâse;

⁷ǂgī mûdets nî khobase, ǃgaehe hânats nî ǃkhō-omsa xu ǂgaeǂguiǂuise, tsî sâu-omma xu ǁnān ǃkhaenab ǃnâ ǂnôana.

⁸Tita ge ǃKhūta, nēs ge ti ǀonsa, tsî ti ǃgôasiba ta ge tita ǀkharaga mā tide, tsî ti ǃkhōǀkhāsa ǃgaohesa īga.

⁹Mû, aibekam xūn ge go hā, tsî ǀasa xūna ta ge tita ra ǂhôa du; ganupen ǀkhī tama hâ hîa ta ge tita ǁîna sado ra ǁnâu kai.

¹⁰ǃKhūba ǀasa ǁnaetsana-e ǁnaeba, ǃkhōǀkhās âba ǃhūbaib di ǀkhâuǀamde xu, sadu hîa huriba ra ǃgâu do, tsî ǁîb ǃnâ hâdu hoado, saso ǃnāǃnuiso tsî ǁansaben âso tsîdo!

¹¹An ǃgaroǃhūb tsî ǃādi âba ǃau; ǁnā ǃkhaidi Kedarǁîn xa ǁanǃnâhe hâdi tsîn ǀkha; an dâ ǁnān Selas ǃnâ ǁan hâna, în ǃhomgu di ǂaoba xu ǃhao!

¹²An ǁîna ǃKhūba ǃgôa, în ǃkhōǀkhās âba ǃnāǃnuidi ǃnâ ǂhôa!

¹³ǃKhūb ge ǁē-aob khami nîra ǂoa, ǁîb ge tauba nîra ǂkhaiǂkhaikhâi toro-aob khami; ǁîb ge nîra dâ, ā, ǁîb ge nîra ǃhao, ǁîb ge khākhoen âba nîra dā.

¹⁴Tita ge hugasa xu ge ǃnō, tita ge ǂkhîse ge hâ i, tsî ge ǃkhōdawasen. Tita ge nîra ǃau, ǀguis hîa ra ǁoras khami, tita ge ǁîna nîra hîkākā tsî ǁîna nîra ǀgui hapu.

¹⁵Tita ge ǃhomgu tsî ǃnomdi tsîna nîra ǃū-ai kai, tsî ǁîn ǀgâb hoaba ta ge nîra ǂnâǂnâ, tita ge ǃāga nîra ǃnāǃnui kai, tsî ǃkhubide nîra ǂnâ kai.

¹⁶Tsî tita ge ǂgī hâna daob ǁîn a ǀūb ai nî ǂgaeǂgui. Tita ge ǁîna ǃgangu ǁîn ǂan tamagu ai nîra dā kai. Tita ge ǃkhaenaba ǁîn aiǃâ nîra ǃnâ kai tsî gama-e nîra ǂhau kai; nēna ta ge tita ǁîna nîra dība, tsî tita ge ǁîna ǁnāxū tide.

¹⁷Xawe ǁnān, ǂnâhesa īgu ai ra ǂgomaiǂnûin, ǁnān, ǂnâhesa īgu ǃoa: Sago ge a sida di elo, ti ra mîn, ǁîn ge oa tsî nîra taob xa dāhe.

¹⁸ǂGanaǂgae hâdo, ǁnâu re; î du kōǀî re ǂgī hâdo, mû du nîga!

¹⁹Tari-e a ǂgī ti ǃgāb khami, tsî tari-e ǂganaǂgae hâ ti sîsabeb tita ra sîb khami? Tari-e a ǂgī ǁnāb dīǀoaǀoasab khami tsî tari-e a ǂgī, ǃgāb ǃKhūb dib khami?

²⁰Sats ra ǂgui xūna mû, xawets ge ǃgaoǃgâ tama hâ; ǂgaedeb ra ǁkhowa-am, xaweb ge ǁnâu tama hâ.

²¹ǃKhūb ge ǁîb xa ge ǃgâibahe ǂhanu-aisib âb ǃaroma; ǁîb ge ǁîba ge kaikai ǂhanub ǀkha tsî ǁîb ge ǁîba ge ǂkhaisa kai.

²²Xawe nēsis ge ūǀhanahe tsî ǁkhâuǁnâhe hâ ǁaese ī, hoatsaman ge ǂnapagu ǃnā ǃkhōkaisen hâ, tsîn ge ǃkhō-omgu ǃnâ gau hâ. ǁÎn ge ge ǁkhâuǁnâxū kai, tsî khoe-i ǁîna nî ore-i xare-i ge a ǁō; ǃūxū kain ge, xawe khoe-i xare-i ge: Mādawa! ti mî tama hâ.

²³Tari-e ǁî ǃkhaisa sadu xa ǂgaes ǃnâ ra ǂgâ kai, tari-e ra ǃgaoǃgâ tsî ǁnâu, nēn khaoǃgâ nî hāna?

²⁴Tariba ǁNāb, Jakoba ǁūxūse ge māǁnâba, tsî Israela ǁkhâuǁnâ-aoga? ǃKhū tamaba ǁnāb, ǁîb ǃoagu da ge ǁoreba? ǁÎb daogu ǃnân ge ǃgû ǂgao tama i; tsî ǁîb ǂhanub ain ge ǃgâ ǂgao tama i xui-ao.

²⁵ǁNā-amagab ge ǁîba ǁgôasib ǁaib âb dib, tsî ǀgaib torob diba ǁîn ǂama ge ǁhōǂui. Tsî ǁîb ge ǁîna ge ǂhubiǂnamipe, xawen ge hōǃâ tama ge i; tsî ǁîb ge ǁîna ge khau, xawen ge ǂgaob ǃnâ ū tama ge i.