Read Khoekhoegowab Jesajab 43 Bible Online

Jesajab 43 - Khoekhoegowab bible

Jesajab 43

¹Xawe nēsib ra ǃKhūb sa Kuru-aoba nēti mî, Jakotse, tsî sa ǂNubi-aoba, Israeltse: Tā ǃao, tita ge satsa ore xuige; tita ge satsa ǀons âts ǀkha ge ǂgai; tits ge satsa.

²ǁGammats ga xanuo, o ta ge tita sa ǀkha nîra hâ; tsî ǃāgats ga ǃgâuo, o gu ge dâunari tsi tide. ǀAesats ga ǃgûǃganuo, ots ge khauǃkhūhe tide; ob ge ǁhabuba ǂhubi tsi tide.

³Tita ge ǃKhūta, sa Elota, Israeli di ǃAnuta, sa ǃGâiǃōdī-aota; tita ge Egipteb tsî Etiopiab tsî Sebab tsîga sa xoremarise sa amǃnâs ai ge mā.

⁴ǃGomǀgausats ge ti mûǁae isa xuts ge ge ǂkhaisa, tsî tita ge ge ǀnam tsi; ǁnā-amaga ta ge khoena ge mā sa amǃnâs ai tsî ǁaede ǀoms âts di amǃnâs ai.

⁵Tā ǃao, tita sa ǀkha hâ xuige; tita ge surib âtsa aiǂoasa xu nîra ūhā xuige, tsî tita ge satsa nîra ǀhaoǀhao huriǂoasa xu.

⁶Tita ge ǀapas ǃoa: Mā! ti nîra mî; tsî ǃkhawagas ǃoa: Tā ūdawa, îs ti ôaga ǃnūseba xu ūhā, tsî ti ôade ǃhūbaib di ǀamsa xu;

⁷mâ-i hoa-i, ti ǀons ǃoa ǂgaihe hâ-e, tsî ti ǀgôab ase ta ge kuru-e, tsî tita ge ǂnubi tsî ǁkhāti dītoa-e.

⁸Ūǂoaxa ǂgī ǁaes, mûde ūhâsa tsî ǂganaǂgae hân, ǂgaede ūhâna.

⁹A di ǃhaode ǀhao, î di ǁaede ǀhû; tari-e ǁîn ǃnâ nēna nî ǂhôa? În ǁnâi aibekam xūna ǁnâu kai da, în ǀhûǀguitimî-aona ūǀkhī, ǂhanu-ai kaihen nîga, khoen nî ǁnâu tsî: Ama a, ti mîga.

¹⁰Sadu ge a ti ǀhûǀguitimî-ao tib ra ǃKhūba mî, tsî du ge a ti ǃgā ǃkhōǂuibasen ta hâdo, tita ǂan tsî du nî ǂgom te tsî ǁî ta a ǃkhaisa du nî hōǃâga. Ti aiǃâb ge ǀnî elob xareba ǂnubihe tama hâ, tsî ti khaoǃgâb ge ǀnîb xareba hâ tide.

¹¹Tita, tita ge ǃKhūta, tsî tita oseb ge ǀnî Hui-aoba a ǀkhai.

¹²Tita ge ge ǂhôa, tsî tita ge ge ore tsî tita ge ge ǁnâu kai, tsî ǃhao elo-i xare-i ge sadu ǁaegu ǀkhai ge i; tsî sadu ge a ti ǀhûǀguitimî-ao, tib ra ǃKhūba mî, tita a Elo ǃkhaisa.

¹³Tsēs ge hās aiǃâ ta ge tita ge hâ i, tsî khoe-i xare-i ge ti ǃomǁaeba xu a ore ǁoa. Tita ge ra sîsen, tsî tari-e ǁî ǃkhaisa nî ǃkhâi ǁkhā?

¹⁴Nētib ra mî ǃKhūb sa Ore-aoba, Israeli di ǃAnuba: Sadu ǃaromas ge Babilons ǃoa sî, tsî ta ǁîn hoana ǃhūsabese ge ǁgôa kai ǃkhaisa, Xaldeaǁîna doe-omgu ân ǃnâ ra dâna.

¹⁵Tita ge ǃKhūta, sadu di ǃAnuta, Israeli Kuru-aota, sadu di Gao-aota.

¹⁶Nētib ra mî ǁnā ǃKhūb, hurib ǃnâ dao-e tsî ǀgaisa ǁgamgu ǃnâ ǃgan-e ge dība;

¹⁷kunidi tsî hān tsî ǂnubis tsî ǀgaib tsîna ge ūǀkhība; ǀhûpen ge ge ǁgoe, ǁîn ge ǁkhawa khâi tama ge i, ǁîn ge ge ǀari, ǁîn ge khauǃgau tsuri-i khami ge ǀaritoa.

¹⁸Hukakam xūn xa tā ǂâi; î du huga ge ǃnaen xa tā ǂâiǂâisen!

¹⁹Mû, tita ge ǀasa xū-e nîra dī! ǀAse i ge nîra ǀkhī; ǂan du tide ǁî-e? Ā, tita ge ǃgaroǃhūb ǃnâ dao-e nîra ǁāǁā tsî ǃāga ǃgaroǃkhaidi ǃnâ.

²⁰ǀGurun ǃaub din ge tita nîra ǃgôa, ǀgirigu tsî ǀamin tsîna, tita ge ǃgaroǃhūb ǃnâ ǁgamga nîra mā xui-ao tsî ǃāga ǃgaroǃkhaidi ǃnâ, ti ǁaes, ti ǁhûiǂuisabena ta nî āsiga.

²¹Nē ǁaes ǂnubibasen ta ges, ǁîs ge ti ǃgôasiba nîra ǂhôa.

²²Xawe sats Jakots ge tita ǂgaiǀî tama ge i, ti ǃoaguts ge ǀhupuǀhupusen ǃnubai, o Israeltse.

²³Tsîts ge tita ǀgoan sa khauǁguibadi dina mā tama, tsîts tita ǂāǁguibadi âts ǀkha ǃgôa tama ge i, tita ge satsa ǂûǁguibadi ǀkha tita ǃoaba kai tama ge hâ i, tsî tita ge wiroki ǀkha ǀhupuǀhupu tsi tama ge hâ i.

²⁴Titats ge marin ama kalmu-e ǁamaba tama, tsî âun sa ǂāǁguibadi din ǀkhats ge tita khoakhoa tama ge hâ i. Tsîts ge tita sa ǁoren ǀkha ge sîsen kai, sats ge tita ge ǀhupuǀhupu sa ǂhanuoǃnâsigu ǀkha.

²⁵Tita, tita ge ǁî ta, sa ǂhanuoǃnâsiga ra ǀarita tita ǃaroma, tsî tita ge sa ǁoren xa ǂâi tama hâ.

²⁶ǂÂiǂâiǃnâ te re, î da ǂhanuse ǂharugu, mîǃāba te re, îts satsa ǂhanu-ai kaihe.

²⁷ǂGuro ǁgûb âts ge ge ǁore; tsî ǃhoaba-aogu âts ge ti ǃoagu ge ǃûǂam.

²⁸ǁNā-amaga ta ge tita ǂamsagu ǃanusib diga nîra ǀuriǀuri, tsî Jakoba ǀâxareba nîra māǁnâ, tsî Israela ǃhōba.