Read Khoekhoegowab Jesajab 44 Bible Online

Jesajab 44 - Khoekhoegowab bible

Jesajab 44

¹Xawe ǁnâu nēsi, ti ǃgā Jakotse, tsî Israeltse, ti ǃkhōǂuisabetse!

²Nētib ra mî ǃKhūb sa Kuru-aob, ǁgûs di ǃnāba xu satsa ge ǂnubib, satsa ra huiba: Tā ǃao Jakots ti ǃgātse, tsî Jesurunts, ti ǁhûiǂuisabetse.

³Tita ge ǁgamma nîra ǁhō xuige ǁgâ hân ai, tsî dâuga ǂnâsab ai; tita ge ti Gagaba nîra ǁhō sa ǃkhommi ai, tsî ti ǀkhaeba sa surib ai.

⁴On ge ǀgâb ǁaegu nîra ǁhao ǂhûihaidi khami ǁgamǃārogu tawa.

⁵Nēb ge: Tita ge ǃKhūb di ta, ti nîra mî, tsî ǁnāb ge ǀons Jakob dis ǀkha nîra ǂgaisen; tsî naub ge ǃommi âb ǀkha: Tita ge a ǃKhūb di ti nîra xoa, tsîb ge ǀons Israeli dis ǀkha nîra ǂgaiǀarosen.

⁶Nētib ra mî ǃKhūb Israeli gao-aob tsî ǁîb di Ore-aoba, ǃKhūb ǂnubidi diba: Tita ge ǂGurota, tsî tita ge ǀUnita; ti oseb ge ǀnî Elob xareba a ǀkhai.

⁷Tsî tari-e tita khami ī ǂgai tsî ra aoǁnâ ta, a-i ǁnâi ǁî ǃkhaisa ǂhanuse tita mâi-aiǃâ, ǀamo ǁae-e ta ge mâibasensa xu? În ǁnâi ǃgoaxa xūn hîa nî hāna ǁîna ǂhôa.

⁸Tā ǃhuri, î du tā ǃao. ǁÎ ǃkhaisa ǁnā ǃnūba xu ǁnâu kai tsî ǂhôa du si tama ta hâ? Sadu ge a ti ǀhûǀguitimî-ao: ǀNî Eloba hâb a tita ose? ǀNî ǃhaob kom a ǀkhaio; tita kom ǀnîba a ǀūo.

⁹Kuru-aogu ǃgaohesa īgu digu ge hoatsama a ǁau, tsî ǁîgu di turasa xūn ge a harebeo. Ā, ǁîgu di ǃkhō-amaon, ǁîn ge xū-e mû tama hâ, tsî xū-e ǂan tama hâ; ǁnā-amagan ge nîra taotaohe.

¹⁰Tari-e elo-e nî kuru tsî ī-e nî ǂnâ, xū-e harebe tama-e?

¹¹Mû, ǁîn di horesan hoan ge nîra tao; kuru-aogu ge a khoe, an hoatsama ǀhû, an khâi, xawen ge nîra ǃhuri, ǀhûpen ge nîra tao.

¹²ǂNūǀuriǂnau-aob ra ǃō-e dī, tsîb ra ǂnomǀaes tawa sîsen; tsî hamerdi ǀkha ǁîna kuru. ǁÎb ra ǁîna ǀgaisa ǁôab âb ǀkha sîsen; tsîb ra ǁkhāti ǃâ, ǂkhabub ras kōse, tsîb ge ǁgam-i xa ā tama hâ, tsaub ras kōse.

¹³Haikuru-aob ra ǀguirotsuriba khoba, ǁîb ra xoa-ūxū-i ǀkha ǁîna xoa-ai; tsîb ra skavi ǀkha ǁîna ǂkhanuǂkhanu, tsîb ra sirkels ǀkha ǁîna xoaǂgā, tsîb ra ǁîna aob di īsib ǃoa dī, îsa aorekhoeb di īsise, om-i ǃnâ nî hâse.

¹⁴Sederhaideb ga ǁhāǁnâo, ob ra sipres tsî aik-hais tsîra ū tsî ǀomkhâi kaibasen ǁoes di haidi ǃnâ, ǁîb ra omhaisa ǂgā, tsî ǀapib ra ǁîsa kaikai.

¹⁵ǁNās khaoǃgâs ge khoeba hâba khauǃkhūhes nîga; ob ra ǁîs xa ū tsî sâ, ǁkhātib ra ǁîsa khau tsî ǁîs ǀkha pereba am. Tsîb ra ǁîs xa ǁkhāti elo-e dībasen tsî ǀgoreǀî; ǁîb ra ǃgaohesa ī-e ǁîs xa dībasen tsî ǁî-i aiǃâ ǃhonǁgoa.

¹⁶ǀGui ǃkharebab ra ǀaes ǃnâ khau; nau ǃkhareb âsa xub ra ǁgan-e ǂû, amxū-eb ambasen tsî ra ǁâ. ǁKhātib ra sâ tsî: Hei! Tita ge go ǃnae, tsî ta ge ǀaesa go mû, ti ra mî.

¹⁷Tsî ǃgau ge xū-i xab ra elo-e dībasen, ǁîb di ǃgaohesa īse; ǁîb ra ǁî-i aiǃâ ǃhonǁgoa, ǃgamǃgâ, tsî ǀgoreǀî i tsî: Ore te re; ti elots a xuige, ti mî.

¹⁸ǁÎn ge ǂan tama hâ, tsî ǁnâuǃā tama hâ; ǁîn di mûdi ǂkhauǂganhe hâ xui-ao, mûn tidega, tsî ǂgaogu âna ǁnâuǃān tidega.

¹⁹Tsî ǀgui-i xare-i ân ge ǁî ǃkhaisa ǂgaob ǃnâ ū tama hâ, tsî ǂan-i xare-i tsî ǁnâuǃā-i xare-i ge a ǀkhai, mû i nîse: ǀGui ǃkhareba ta ge ǀaes ǀkha ge khauǃkhū; tsî ǂnomdi âb ǀkha ta ge pereba ge am, ǁgan-e ta ge ǁîb ǀkha ambasen tsî ge ǂû. Tsî ǃgaoro-i â-e ǁgaixūdī i ta nî? Hai-e xu ge ǀkhī xū-i aiǃâ ǃhonǁgoa ta nî tita?

²⁰Tsaoba ga ǂû-i, ǁî-i di gâre ǂgaob ge ǂgaeǂhapuhe hâ, ǁî-i di ǀomsa i a ore ǁoas kōse tsî ǂhumi-e hâ tama i hâ ti amǀkhāb ai? ti i a mî ǁoas kōse.

²¹Nē xūn xa ǂâi re, Jakotse, tsî Israeltse, ti ǃgāts a xuige. Tita ge ge kuru tsi, ti ǃgāts a sats Israeltsa; ots ge tita xa ǀuruhe tide.

²²Tita ge ǃûǂamdi âtsa ǃnū-i axase ra ǀari, tsî sa ǁorena ǀnanu-i khami. Ti ǃoa ǁkhawa oa, tita ge satsa ore xuige.

²³Dâxase ǁnae, sago ǀhomgo, ǃKhūb ge ǁîsa dī xuige; dâ sago ǃgamgo ǃhūbaib digo, sago ǃhomgo, î du îbe dâ, saso ǁoeso tsî saso ǃnâ hâ haiǃnôadu hoado. ǃKhūb ge Jakoba ore tsî Israeli ǃnâ ge ǂkhaiǂkhaisen xuige.

²⁴Nētib ra mî ǃKhūb sa Ore-aob, satsa ge ǂnubiba ǁgûs di ǃnāba xu: Tita ge ǃKhūta, hoana ra dī ta, ǀhomma ra ǃāǂui ta. Tita ǀguita, tita ǂû ta ge ǃhūbaiba ra ǃāǂui ta.

²⁵Saodi ǂhumi-aon dide ra ǁauǁau ta, aiǀgaru-aona ra ǃkhau kai ta, gā-aina ra ǁkhaedawa ta, tsî gā-aisib âna ra gâre kai ta.

²⁶ǃGāb âb di mîsa ra ǁapoǁapo ta tsî ǀapes ǁîb di sîsabegu disa ra dīǀoaǀoa ta, Jerusalems ǃoa: Sas ge nîra ǁanǃnâhe tsî Judab di ǃādi ǃoa: Saso ge ǁkhawa nîra ǂnubihe tsî tita ge ǁîdi di hîǀhuruhesa ǃkhaide nîra ǂnûikhâi, ti ra mî ta.

²⁷ǃGammi ǃoa: ǂNâ, ti ra mî ta, î ta sa ǃāga ǂnâǂnâ,

²⁸Koreb ǃoa ra mî ta: ǁÎb ge a ti ǃûi-ao, tsî ǁîb ge ti ǃgâiǂâis hoasa nîra dīǀoaǀoa; ǁkhāti Jerusalems ǃoa: As ǂnubihe, tsî tempeli ǃoa: Îts ǃgaoǃgaohe ti ra mî ta.