Read Khoekhoegowab Jesajab 45 Bible Online

Jesajab 45 - Khoekhoegowab bible

Jesajab 45

¹Nētib ra ǃKhūba mî ǁîb di ǂkhauǀkhāsabeb Koreb ǃoa, amǀkhāb âba ta ra ǃkhōba, ǁaedeb nî ais âb aiǃâ aoǁguiga; tsî tita ge kamanagu gao-aogu diga nîra ore ais âb aiǃâ di dao-amde nî ǁkhowa-amhega, tsî ǁāgu ge ǂganamhe tide.

²Tita ge sa ais aiǃâ nîra ǃgû, tsî tita ge ǃhoa daoga nîra ǂhauǂhau; ǂaiǁāga ta ge tita nîra khôaǂkhūǂkhū, tsî ǂnūǀuriǂganamūdade ta ge tita nîra ǂnauǂkhūǂkhū.

³Tsî tita ge satsa ǁnā ǁuigu ǃkhaenagu ǃnâ hâgu tsî ǂganǃgâsa ǃkhūsigu tsîga nîra mā; ǂants nîga, tita a ǃKhū ǃkhaisa, satsa ǀons ǀkha ra ǂgai ta, Israeli di Elota.

⁴Jakob ti ǃgāb, tsî Israeli ti ǃkhōǂuisabeb ǃaroma, ā, tita ge satsa ǀons ǀkha ge ǂgai, tita ge satsa ge ǂgaiǀaro, titats ge ǀū i xawe.

⁵Tita ge ǃKhūta, tsî ǀnîba tama; tita oseb ge ǀnîb xareba a ǀkhai. Tita ge satsa nîra ǃgae, titats a ǀū xawe.

⁶Khoen nî ǂanse, sores ra ǁhai ǃkhaisa xu, tsî ǁîs ra ǂgâ ǃkhaisa xu tita oseb ǀnîba a ǀkhai ǃkhaisa. Tita ge ǃKhūta tsî ǀnîb ge hâ tama hâ.

⁷Tita ǃnâba ra dī ta, tsî ǃkhaenaba ra kuru ta, tita ǂkhîba ra dī ta, tsî ǂkhababa ra kuru ta; tita ǃKhūta ge ǁnā ta, nēn hoana ra dī ta.

⁸ǂNâ sago ǀhomgo, ǀgapiseba xu, î di ǀnanude ǂhanu-aisiba dâ; îb ǃhūbaiba ǁkhowa-amsen, îb ǃgâiǃō-i hoa-e ūǀkhī, îb ǂhanu-aisiba ǀguiǀkhī; tita ǃKhūta ge ǁnā ta ǁîna ge kuru ta.

⁹Tsūba ǁnā khoe-i, ǁî-i di Kuru-aob ǀkha ga ǂnoagu-e, sūǃâro-i sūǁaeǃâron ǃnâ. ǂGoaba kha mîb nî ǁîb di ǂnubi-aob ǃoa: Tare-ets ra dī? Tsî sa sîsenna ǃoa: ǁÎb ge a ǃomo? ti.

¹⁰Tsūba ǁnā khoe-i ǁgûb ǃoa: Tare-ets ra ôa? tsî ǁgûs ǃoa: Tare-es ra ǁora? ti ga mî-e.

¹¹Nētib ra ǃKhūba mî, ǃAnub Israeli dib tsî ǁîb di Kuru-aoba: ǁÎn ge tita ǃgoaxa xūn xa ge dî, ti ôan xa, ti ǃomkha sîsenain xa du kha tita mîmāsa nî mā?

¹²Tita ge ǃhūbaiba ge dī ta, tsî khoeba ǁîb ai ge kuru ta, tita ge ǁnā ta. Ti ǃomkha ge ǀhomga ge ǃāǂui; tsî tita ge ǁîgu di ǂnubis hoasa mîmāsa ge mā ta.

¹³Tita ge ǁîba ge ǂkhaiǂkhai ǂhanu-aisib ǃnâ, tsî ǁîb di daogu hoaga ta ge tita nîra ǂhauǂhau. ǁÎb ge ti ǃāsa nîra ǂnubi tsî ǁîb ge ti ǃkhōsana nîra ǁnā, ǀgau-i ama tamas kas, ǀkhaexū-i ama tamas kas hoasa, tib ra mî ǃKhūb ǂnubidi diba.

¹⁴Nētib ra ǃKhūba mî: Xūreb Egipteǁîn dib tsî ǁamaxūn Etiopiaǁîn tsî Sabeǁîn, ǁnā gaxu sorosa ūhân din, ge sa tawa hā, tsî nîra sa; tsîn ge satsa nîra sao, ǃgae-ūdan ǃnân ge nîra ǃgâuxa. Tsîn ge sa aiǃâ nîra ǃhon, tsîn ge satsa ǀkhoma tsî: Amaseb ge Eloba sa ǃnâ hâ, tsî ǀnî Elo-i xare-i a ǀkhai, ti nîra mî.

¹⁵Amase sats ge ǁnā Elots, ǂganǃgâsats, Israeli di Elots, ǃGâiǃōdī-aotsa!

¹⁶ǁÎn ge tao, tsî nîra taob xa dāhe, ǁîn hoana; hoatsaman ge taob ǀkha nîra ǃgû, ǁnān ǁgôa-eloga ra dīna.

¹⁷Xawe Israeli ge ǃKhūb xa nîra orehe, ǀamo ore-i ǀkha; sadu ge tao tsî taob xa dāhe tide ǀamosigu hoagu kōse.

¹⁸Nētib ra mî xui-ao ǁnā ǃKhūb ǀhomga ge kuruba, ǁnā Elob ǃhūbaiba ǂnubi tsî ǁîba ge dība, ǁîb ge ǁîba ge ǁapoǁapo, ǁîb ǁîba kuru tama, ǀkhaiǃnâseb nî hâga, tsîb ge ǁîba ge dī, ǁîb nî ǁanǃnâhega: Tita ge ǃKhūta, tsî ǀnîb hâ tama.

¹⁹Tita ge ǂganǃgâsib ǃnâ ǃhoa tama hâ, ǃkhae ǃkhai-i ǃhūbaib di-i ǃnâ; tita ge surib Jakob dib ǃoa mî tama hâ: ǁAuse ôa te. Tita ge ǁnā ǃKhūta ǂhanu-aisina ra ǃhoa ta; ǂhanuna ra ǂhôa ta.

²⁰ǀHao î du hā, dāǀhû; sadu ǁaede xu ge ûido. ǁÎn ge xū-i xare-e a ǀū, hain xa ǃgaohe hâ īgu âna ra tanin, tsî elo-i ore ǁoa-e ra ǀgoreǀîna.

²¹ǂHôa, î du dāhā, î du ǀapeǀapeǀhao. Tari-e nēna ge ǁnâu kai hugasa xu, tari-e nēna ǁnā ǃnūba xu ge ǂhôa? Tita kha ǁnā tama ta ǃKhūta? Tsî ǀnî Elo-i xare-i ti ose a ǀkhai, ǂhanu-ai Elota tsî ǃGâiǃōdī-aota; tsî ǀnîb ge a ǀkhai, tita ǀguita.

²²Unusenǀî te, î du sâuhe, ǃhūbaib di ǀkhâuǀams didu hoado, tita ge Elota xuige tsî ǀnîba tama.

²³Tita ge tita ǂûta tawa ge nū, tsî mî-i ǂhanu-aisib di-i ge ti amsa xu ge ǂoa, tsî i ge ǁkhawa oa tide: Tita tawa di ǁgoadi hoade nîra ǃhon; tsî mâ nams hoas tita nîra nūba.

²⁴Khoen ge tita xa nîra mî: Amase, ǃKhūb ǀguib ǃnâ gu ge ǂhanu-aisigu tsî ǀgaib tsîga hâ. On ge khoena ǁîb tawa nîra hā, xawen ge nîra taotaohe ǁnān ǁîba ǁaixaǂam hân hoana.

²⁵Tsî ǃKhūb ǃnân ge ǂhanu-ai kaihe tsî nîra koasen surib Israeli hoab diba.