Read Khoekhoegowab Jesajab 46 Bible Online

Jesajab 46 - Khoekhoegowab bible

Jesajab 46

¹Beli ge ge ǃgamǃgâ, Nebob ge ge ǃnom; ǁîkha di īkha ge ge ǀgurun tsî ǀgoan tsîn di kai. Sakho di tanihe ra īgu ge ǃgaehe hâ, ǀhupu hâ ǀgoan ǃkhanab xa ra ǃgomdāhes kōse.

²ǀHûpen ge ǃgamǃgâ tsî ge ǃnom kaihe; ǁîn ge ǃgomma hui ǁoa ge i, tsîn ge ǁîn ǂûna ǃkhōsis ǃnâ ge ǂgâ.

³Tita ǃgâ re, sadu Jakob ommi dido, tsî Israeli ommi xa ge ǃgau du hoado sadu ǁgûs di ǃnāba xu tita xa tanihe hâdo, tsî ǁgûs di tîǂamsa xu ge ūkhâihedo.

⁴Tsî kairasib kō i ga, xawe ta ge a ǁkhā, ā, ǀhaidanasib kō i ga, xawe ta ge nîra tani du; tita ge ǁnā ta ǁîsa ge dī ta tsî tita ge sado nîra ūkhâi, tsî tita ge sado nîra tani tsî ore.

⁵Tari-i ǀkhats nî tita ǀgopeǀnō? Tsî tarib ǀkha du nî tita ǂkhō, ǀguiti ta nî īga?

⁶ǁÎn ra mariba mariǁhōsa xu tsoro, tsîn ra ǀhaiǀuriba ǀnō-ūxūs ǀkha ǀnō; ǁîn ra ǃhuniǀuriǂnau-aoba ǃgae, ob ra elo-e ǁîna dība, on ra ǃhonǁgoa tsî ǁî-e ǀgoreǀî.

⁷On ra ǁî-e ǃhōb ai ū tsî tani tsî ǁî-i ǃkhais ai mâi; ǁnā i ge ra mâ, tsî ǁî-i ǃkhaisa xu ǂgō tama hâ. Tsî ǁî-ets ga ǂgaiǀî, xawe i ge ǃeream tama hâ; tsî ǂōǂōsib âtsa xu ore tsi tama hâ.

⁸ǁÎ ǃkhais xa ǂâi, î du ǁapo, ǂgaob ǃnâ ǁî khaisa ū, sadu ǃûǂamaodo.

⁹Aibekam xūn hugasa xu hân xa ǂâi; tita ge a Elo, tsî ǀnî Elo-i xare-i ge a ǀkhai, tsî tita ǀkha ǀguiti-īb a gā ǃkhaisa,

¹⁰tita tsoatsoasa xu ǀamsa ra ǂhôa ta, tsî hugasa xu ǁnā xūn, hîa ganupe ī tamana, tita hîa: Ti ǀapes ge nîra mâhō, tsî tita ge ti ǃgâiǂâis hoasa nîra dī ti ra mî ta.

¹¹ǃAriǃkhā-e aiǂoasa xu ra ǂgai ta, ti ǀapes di ao-e ǃnū ǃhūba xu. Ā, tita ge ǁîsa ge mî, tsî tita ge ǁîsa ǁkhāti nîra hā kai; tita ge ǁîsa ge ǂnubi, tita ge ǁîsa ǁkhāti nîra dī.

¹²Tita ǃgâ, sadu karosa ǂgaoga ūhâdo, ǂhanu-aisiba xu ǃnūse hâdo.

¹³Tita ge ti ǂhanu-aisiba ǀgūse ra ūhā, ǁîb ge ǃnūse hâ tide, tsî ti ǃgâiǃōba nîra mā, Sions ǃnâ, tsî Israela ti ǂhanu-aisiba.