Read Khoekhoegowab Jesajab 48 Bible Online

Jesajab 48 - Khoekhoegowab bible

Jesajab 48

¹ǁNâu nēsa, sadu Jakob ommi dido, ǀons Israeli dis ǀkha ra ǂgaihedo, tsî ǁgamgu Judab diga xu ge ǀkhīdo, ǃKhūb di ǀons tawa ra nūdo, tsî Elob Israeli dib xa ra ǂâi, xawe ǁîsa amab tsî ǂhanu-aisib tsîkha ǃnâ dī tama do.

²Ā, ǃanu ǃās ǃoan ra ǂgaisen tsîn ra Israeli Elob ai ǂgomǃgâsen: ǃKhūb ǂnubidi dib ti ǀon hâba.

³Aibekam xūna ta ge ǁnā ǃnūba xu ge ǂhôa, tsî ti amsa xūn ge ǁîna ge ǀkhī, tsî tita ge ǁîna ge ǁnâu kai: Tita ge ǁîna ǃhaese ge dī tsîn ge ge hā.

⁴ǂAn ta a amaga, karosats a ǃkhaisa; tsî ǃaob âts a ǂnūǀuriǁapa, tsî danas âts a ǂai ǃkhaisa.

⁵ǁNā-amaga ta ge ǁîna ǁnā ǃnūba xu satsa ge aoǁnâ; ganupen hā tama hâ hîa ta ge tita ǁîna satsa ge ǁnâu kai, ǀnîsits mî tidega: Ti ǁgôa-elob ge ǁnā xūna ge dī, ti ǃgaohesa īb, tsî ti ǂnâhesa īb ge ǁîna ge mîmā.

⁶Sats ge ge ǁnâu; îts nēn hoana ǃgaoǃgâ. Tsî sadu ona, aoǁnâ du tide ǁîna? Nēsisa xu ta ge satsa ǀasa xūna ra ǁnâu kai, tsî ǂganǃgâsan tsî ǀūts ge ina.

⁷Nēsin ge ǁîna ge kuruhe, tsî ǀnaisa xu tama; tsî nē tsēs aiǃâ ta ge ǁkhāti ǁîn xa ǁnâu tama ge hâ i, ǀnîsits satsa: Mû, tita ge ǁîna ge ǂan i, ti mî tidega.

⁸ǁKhātits ge ǁîna ǁnâu tama ge i, ǁkhātits ge ǁîna ǀū ge i; ǁkhātis ge ǂgaes âtsa ǁnā ǃnūba xu ǁkhowa-amhe tama ge hâ i: ǂAn ta a xui-ao, hoaragasets îǂhôaoǃnâse nî sîsen ǃkhaisa; tsî ǁgûs ǃnāba xuts ǃûǂamaose gere ǂgaihe ǃkhaisa.

⁹Ti ǀons ǃaroma ta ge ti ǁaiba nî ǃnūǃnâxa kai; tsî ti ǀons ǃaroma ta ge ǁîba nî ǁgūǃgâ sa harebesa ǃoa, ǁhāǁnâ tsi ta tidega.

¹⁰Mû, tita ge satsa ge ǀkhaiǀkhai ǀhaiǀurib khami tama; tita ge satsa ge ǃâitsâ tsunitsunixūs ǀkhomǀkhomxasib dis ǃnâ.

¹¹Tita ǃaroma, tita ǃaroma ta ge ǁî ǃkhaisa nîra dī. Matits kha ǁnâi nî ǀuriǀurihe? Tsî tita ge ǃgôasib âtaba ǀkharab xaweba mā tide.

¹²Tita ǁnâu re sats Jakots, tsî sats Israelts, ti ǂgaisabetse! Tita ge ǁkhā ta; tita ge ǂgurota, ǁkhāti ta ge a ǀuni.

¹³ǁKhātib ge ti ǃomma ǃhūbaiba ge ǃgaoǃgao, tsî ti amǀkhāb ǃommi ge ǀhomga ǃomǃnâb ǀkha hâna ge ǀguiro: Tita ga ǁîna ǂgaio, on ra hoatsama ǁnāpa mâ.

¹⁴ǀHû sadu hoado, î du ǁnâu: Tariba nē xūna ge ǂhôaba? ǃKhūb ge ǃgâiǂâibasens âba Babilonsa nîra dī-ū; tsî ǁîb di ǁôab ge Xaldeaǁîn ǃoagu nîra hâ.

¹⁵Tita, tita ge ǁî ǃkhaisa ge ǃhoa; tsî ta ge ǁîba ǁkhāti ge ǂgai, tita ge ǁîba nîra hā kai, tsîb ge daob âb ai nîra ǃgâiǃgâ.

¹⁶Tita ǃoa ǀgū, î du nēsa ǁnâu: Tita ge tsoatsoasa xu ǂganǃgâsib ǃnâ ǃhoa tama ge hâ i; tsî ǁî xūn ge ǃnae ǁaeba xu ta ge tita ǁnāpa hâ. Tsî nēsi ǃKhūb, ā, ǃKhūb tsî ǁîb di Gagab ge tita ge sî.

¹⁷Nētib ra mî ǃKhūb sa Ore-aob, Israeli di ǃAnuba: Tita ge ǃKhūta sa Elota, satsa harebesaba xūna ra ǁkhāǁkhā tsi ta, ǁnā daob, ǁîba-ūts nî ǃgûb ai ra ǂgaeǂgui tsi ta.

¹⁸Ae! ti mîmādi aits ga koma ǃgaoǃgâ hâ io, ob ge ga ǂkhîb âtsa ǃāb khami ī hâ, tsî ǂhanu-aisib âtsa hurib di ǃgabigu khami.

¹⁹Ob ge sa suriba tsaob khami ga ī hâ, tsî sa ǃnāba xu ra ǀkhīna ǁîb di ǀuiron khami, os ge ǀons âba ǃgaoǁnâhe tama i tsî ti ais aiǃâba xu ǀarihe tama ga i hâ.

²⁰ǃGûǂoa Babilonsa xu, î du ǁhâ Xaldeaǁîna xu! Aoǁnâ dâxa dommi ǀkha, î du ǁîna ǁnâu kai, î du ǁîna ǂoa kai ǃhūbaib di ǀkhâuǀams kōse, î du: ǃKhūb ge ǁîb di ǃgāb Jakoba ge ore, ti mî.

²¹Tsî ǁîn ge ǁgâ tama ge hâ i, ǁîb ge ǁîna ǃgaroǃkhaide-ū ǂgaeǂgui ǃnubai; ǁîb ge ǁîna ǁgamma ge dâuǂoa kaiba, ǃhaoba xu; ǃhaobab ge ǁîba ǁhāǃāo, o gu ge ǁgamga ge dâuǂoa.

²²Xawe eloxoresan ge ǂkhî-i xare-e ūhâ tama hâ tib ra ǃKhūba mî.