Read Khoekhoegowab Jesajab 49 Bible Online

Jesajab 49 - Khoekhoegowab bible

Jesajab 49

¹Tita ǃgâ, saso ǃnāǃnuiso, î so ǃgaoǃgâ saso ǁaeso ǃnūseba xu. ǃKhūb ge tita ǁgûs di ǃnāba xu ge ǂgai; tîǂams ti îs disa xub ge ǁîba ti ǀons xa ge ǂâi.

²Tsî ǁîb ge ti amsa ǀā gôab khami ge dī, sommi ǁîb ǃommi dib ǃnâb ge ǁîba ge sâu te; ǁîb ge tita ǂkhanu ǂāse ge dī, ǁgarub âb ǃnâb ge ǁîba ge gaugau te.

³Tsî ǁîb ge tita ǃoa ge mî: Sats ge a ti ǃgā, Israeltsa, ǁîts ǃnâ ta nî ǂkhaiǂkhaisentsa.

⁴Xawe tita ge ge mî: Tita ge ǁause gere sîsen; tita ge ti ǀgaiba ǁause tsî harebeoǃnâse ge sîsentoa. Xawe amaseb ge ti ǂhanuba ǃKhūb tawa hâ tsî ti sîsen amǃnâs ge ti Elob tawa hâ.

⁵Tsî nēsib ra ǃhoa ǃKhūb, ǁgûs di ǃnāba xu ge ǃgāse tita dībasenna, Jakoba ta nî ǁîb ǃoa ū-oaga, tsî Israelab nî ǀhaoǀhaobahega: ǁNā-amaga ta ge ǃKhūb di mûǁae nî ǃgôahe, tsî ti Elob ge tita ǀgaise nî ība.

⁶ǃAruǀîb ge ǁîba ge mî: ǁÎs ge a ǂkhariba te, ti ǃgāts nîsa, Jakob ǃhaodets nî ǂnûikhâise tsî sâusan Israeli dinats nî ǁkhawa ūhāse. Tita ge satsa ǁkhāti ǁaede di ǃnâse ge mā, ti ǃgâiǃōts nîga, ǃhūbaib di ǀams kōse.

⁷Nētib ra mî ǃKhūb Israeli Ore-aob, ǁîb di ǃAnuba, ǃharaxūhesa ǀoms ǁga ǁnāb ǁaes ǁîba ǁgai xūse ra ūb ǃoa, ǁnān hîa ra gaon di ǃgāb ǃoa: Gao-aogu ge ǁîsa mû tsî nîra khâi, tsî gaosagu ona, tsî gu ge nîra ǃhon ǃKhūb hîa îǂhôab ǃaroma, Israeli di ǃAnub, satsa ge ǁhûiǂuibasenni ǃaroma.

⁸Nētib ra ǃKhūba mî: ǁAeb ǃgâiǂâibasens dib ǃnâ ta ge tita ge ǁnâu-am tsi, tsēs ǃgâiǃōb dis ai ta ge tita ge hui tsi; tita ge nîra sâu tsi, tsî tita ge ǁaes di ǃgaeǀhaose nîra mā tsi, ǃhūbaibats nî ǂnûikhâise, hîǀhuruhesa ǀumidets nî ǀumise.

⁹ǃGaesaben ǃoats nî mîse: ǃGûǂoa, tsî ǁnān ǃkhaenab ǃnâ hân ǃoa mî: ǀKhī du. ǁÎn ge daogu ai nîra ǃû tsî ǀgapi ǃkhaidi hoadi ais ge ǁîn di ǃû-aisa nîra hâ.

¹⁰ǁÎn ge ǃâ tide tsî ǁkhāti ǁgâ tide, tsî ǀgammi tsî sores tsîra ge ǁîna ǃkhā tide. ǁÎn di ǀKhomaob ge ǁîna nîra ǂgaeǂgui xui-ao, tsî ǁîb ge ǁîna ǀaudi ǁgamgu didi tawa ǂause nîra ǂgaeǂgui.

¹¹Tita ge ti ǃhomgu hoaga daose nîra dī, tsî ti ǃgangu ge nîra ǀgapiǀgapihe.

¹²Mû, nēn ge ǃnūseba xu nîra hā tsî mû, naun ge ǀapasa xu tsî huriǂoasa xu, tsî naun ge Sinimǃhūba xu nîra hā.

¹³Dâ re, sago ǃhomgo; îts ǃgâiaǂgao, sats ǃhūbaitse; tsî sago ǃhomgo, dâ ǀōb ǀkha! ǃKhūb ge ǁaes âba ge ǁkhaeǂgao tsî ǁîb ge ǀkhomǀkhomsaben âna nîra ǀkhom xuige.

¹⁴Xawe Sions ra mî: ǃKhūb ge tita ge ǁnāxū, tsî ǃKhūb ge tita ge ǀuru.

¹⁵Tarasa kha dai ra-i âsa ǀuru ǁkhās a, ǀkhoms kha tide ǃnāb âs di ǀgôaba? Tsî ǁîs ga ǀuru xawe ta ge tita sasa ǀuru tide.

¹⁶Kō, tita ge sasa ǃomǃnākha hoakha ǃnâ ge xoaǂgā; sa ǂnubiǂgoagu ge hugaǀgui ti aiǃâ hâ.

¹⁷Sa ôagu ge nîra ǃhae; xawe sa hîkākā-aon, tsî sa hîǀhuru-aon ge sasa xu nîra ǂoa.

¹⁸Kōkhâiǂnamipe îs mû, nēn hoan ra ǀhû, tsîn ra sa ǃoa hā: Tita a ûitsama ǃkhais ao, tib ra ǃKhūba mî, amases ge nēn hoan ǀkha sara-i ǀkhas khami nîra anahe; tsîs ge ǁîna nîra ǃgaesen ǃgame-aos khami.

¹⁹Sa ǃū-aisa tsî ǀguri ǁgoe ǃādi ǃnâ hîǀhuruhe hâ ǃhūb âs ǃnâs ge amase ǁansaben xa nîra ǂōǂōhe, tsî sasa ge hapun, ǁîn ge ǃnūse nîra bēxū si.

²⁰Xawen ge ǁnā ǀgôan ǁînas ge ǀâǀhanahe hâ ina sa ǂgaeǃnâ nîra mî: ǃKhais ge a ǂōba te, xuige soa-e dība te, î ta ǁan ǁkhā.

²¹Ots ge satsa ǂgaob âts ǃnâ nîra mî: Tarisa nēna ge ǁoraba tesa, ǀgôan xa ǀâǀhanahe tsî ǃū-aisase ta ge hâ i hîa? Tita ge ǃkhōsis ǃnâ hâ i tsî bē hâ i hîa, tariba ǁnāb, nēna ge kaikaiba teba? Mû, tita ge ǀguri ǃgau hâ i ǃnubai, mapan ge nēna hâ i?

²²Nētib ra ǃKhūb ǃKhūba mî: Mû tita ge ti ǃomma ǃhaodiǀî nî ǀhōǃapa, tsî ǁaede ta ge ti ǃkhauba nî ǃkhākhâiba, on ge ǀgôagu âsa ǁôagu ǃnâ nîra tanihā, o di ge ǀgôadi âsa ǃhōgu ân ai nîra tanihe.

²³O gu ge gao-aoga sa ǁganaose nîra ī, tsî ǁîn gaosade sa daisi-aose. ǁÎn ge sa aiǃâ ǃhūb kōse nîra ǃhon, tsîn ge tsarab sa ǂaidi diba nîra tsā. Os ge sasa nîra mûǂan, tita a ǃKhū ǃkhaisa; ǁnān, tita ǂgomaiǂnûi hân taotaohe tide ǃkhaisa.

²⁴ǀGaisaba kha ūǀhanab nî ǁkhâuǁnâs âba? Ûin nî ǂhanu-ai ǃkhōsana?

²⁵Nētib ra ǃKhūba mî xui-ao: Ā, ǃkhōsan ǀgaisab din ge ǁîba nîra ūǀhanahe, tsî ǁkhâuǁnâs ǀgaisab dis ge nîra ûi; sa ǂnoagu-aon ǀkha ta tita nîra ǂnoagu xui-ao, tsî sa ôana ta ge nîra ore.

²⁶Tsî tita ge sa ǁgâiǀāsabena ǁîn di ǁgans ǂûsa nîra ǂûmā; tsîn ge ǁîn ǀaob ǂûb xa nîra ā, ǂkhon ǂauxûib khami, os ge ǁgans hoasa nîra hōǃâ, tita a ǃKhū, sa ǃGâiǃōdī-ao, tsî sa Ore-ao, Jakob di ǀgaisata ǃkhaisa.