Read Khoekhoegowab Jesajab 5 Bible Online

Jesajab 5 - Khoekhoegowab bible

Jesajab 5

¹Î ta ǁnâi ti ǀnamsabeba ti ǀnamsabeb di ǁnaetsana-e ǁnaeba ǂauxûiǂûǃhanab âb xa: Ti ǀnamsabeb ge ǂauxûiǂûǃhana-e ūhâ kausa ǃhūb â-i ǃnoms ai.

²Tsîb ge ǁîba ge ǃkhāǃkhuri tsî ǀuide ge ūǂuiǃnâ bi tsîb ge ǁîb ǃnâ ǃgâi ǂauxûiǂûhaide ge ǂgā. Tsîb ge ǁaegub âb ǃnâ ǂgō-omma ge ǂnubi tsîb ge ǁkhāti ǂauxûiǂûn ǀāǃnâǃoreba ǁîb ǃnâ ge kuru; tsîb ge ge ǃâu ǃgâi ǂauxûiǂûnab nî ūǀkhī ǃkhaisa, xaweb ge ǀō hâ ǂauxûiǂûna ge ūǀkhī.

³Î du ǁnâi ǀgoraǃgâ, sadu Jerusalems di ǁansabedo tsî sago Judab aogo, tita tsî ti ǂauxûiǂûǃhanab tsîkhom ǁaegu.

⁴Tarebe dīxū-e ganupe hâ ti ǂauxûiǂûǃhanab tawa tita dī tama hâ-e? Tarexa ta kha tita ge ǃâu ǃgâi ǂauxûiǂûnab nî ūǀkhī ǃkhaisa, xaweb ge ǀō hâ ǂauxûiǂûna ge ūǀkhī.

⁵Î ta ǁnâi ǂanǂan du, tare-e ta nî ti ǂauxûiǂûǃhanaba dī-ū ǃkhaisa: Tita ge ǁgâuǂnamib âba nîra ūbē, îb ǃûǁnâhe; ǂnubiǂgoab âba ta ge tita nîra khôabē, îb dāǃgâhe.

⁶Tita ge ǁîba nîra ǃū-aisa kai, tsîb ge ǃgaohe tide tsîb ge khaohe tide, tsîb ge ǀgamin tsî ǁkhūn tsîn xa nîra ǁhaoǂamhe. Tsî tita ge ǀnanude nîra mîmā ǀapi-i xare-i ǁîb ai ǀapi tide ǃkhaisa.

⁷ǂAuxûiǂûǃhanab ǂnubidi di ǃKhūb dib ge Israeli di omma, tsî aogu Judab digu ge a ǃgâiǃgâisendi âb di ǂgāxū. Tsî ǁîb ge ǂhanuba ge ǃâu, xawe mû, ǀgorosib ge hâ; ǂhanu-aisiba, xawe mû, ǃaus ǀguis ge hâ.

⁸Tsūba ǁnān nē omma nau ommi ǀkha ra ǃgaeǁaena, nē ǃhanaba nau ǃhanab ǀkha ra ūǀhaona, ǃkhai-i xare-i a ǀkhais kōse, tsî sadu ǀguidu ǃhūb ǃnâ a ǁansabes kōse.

⁹Ti ǂgaera ǃnâb ge ǃKhūb ǂnubidi diba ge mî: Amase gu ge ǂgui omga nîra ǃū-aisa, kaigu tsî îsagu ge nîra ǁansabeo.

¹⁰Ā, disi akergu ǂauxûiǂûǃhanab digu ge ǀgui bati ǀguiba nîra mā, tsî ǀgui homeri ǃhorob dib ge ǀgui efab ǀguiba nîra mā.

¹¹Tsūba ǁnān, ǃnauǁgoaga khâi tsî ǀgaisa xûiba ra sauruǃgonna, tsî ǃuis kōse ra ǀhapena ǂauxûib ra ǁîna ǀgamǀgams kōse.

¹²Tsî harpdi, luitn, ǃkhomǃkharurudi, ǂnunixūn tsî ǂauxûib tsîn ge ǂûǁaedi ân ǃnâ hâ, xawen ge sîsenni ǃKhūb diba kōǀî tama hâ, tsîn ge kurusan ǁîb di ǃomkha dina mû tama hâ.

¹³ǁNā-amagas ge ti ǁaesa ǃkhōsase nîra ūǃgûhe, ǂan-i xare-en ūhâ tama hâ amaga; tsî ǀgapiǃgôasan ân nîra ǃâ tsî ǂguib ân nîra ǂnâ amaga ǁgâs xa.

¹⁴ǁNā-amagas ge ǀhobasa harase nîra ǂape-amsen tsî ǀgau tamase ams âsa nîra khowa; ǁgôan nîga ǁîs di ǂkhaisib tsî ǁîs di ǂguib tsî ǁîs di ǀōb ǀkha tsî ǁîs ǃnâ dâb xa ra urikhâi-i tsîn ǀkha.

¹⁵ǃNubaib ge ǁau khoeba nîra ǃgamǃgâ kaihe, tsî ǀgapiǃgôasa aob ge nîra ǃgamǃgamhe, tsî mûdi ǃguriǂgaoxan didi ge nîra ǃgamǃgamhe.

¹⁶Xawe ǃKhūb ǂnubidi dib ge nîra ǀgapiǀgapihe ǂhanuba xu, tsî ǁnā Elob hîa ǃAnub, ǁîb ge nîra khaihe ǂhanu-aisiba xu.

¹⁷Tsî ǁkhaon ge nîra ǃû ǁîn di ǃûǃkhais ǂûs ai; tsî ǀkhara khoen ge hîǀhuruhe hâ ǃkhaidi kausan dide nîra ǂû.

¹⁸Tsūba ǁnān, ǂhanuoǃnâsiba tsurigu ǁausib digu ǀkha ra ǂgaena, tsî ǁoreba ǁau kuniǂgaetsurigu ǀkhas khami,

¹⁹ǁnān hîa ra mîna: Ab ǃhae îb sîsenni âba ǃhaeǃhae, î da ǁîba mû; îs ǃgû, îs hā ǀapes Israeli di ǃAnub disa, î da ǁîsa hōǃâ.

²⁰Tsūba ǁnān hîa ǂkhababa ǃgâi ti ra mîna, tsî ǃgâiba ǂkhaba ti, ǁnān ǃkhaenaba ǃnâse ra mâina tsî ǃnâba ǃkhaenase, au xū-e ǂkhon xūse ra mâina, tsî ǂkhon xū-e au xūse!

²¹Tsūba ǁnān, ǁîn mûǁae a gā-ai tsî ǁîn ǂûn ǃnâ a ǁnâuǃāxana!

²²Tsūba ǁnāgu ǂauxûib ās ǃnâ a ǁē-aoga, tsî ǁnāgu ǀgaisa xûiba habas ǃnâ a ǃgari-aoga,

²³ǁnāgu eloxoresaba ǀkhaexū-i ama ra ǂhanu-ai kaiga, tsî ǂhanu-ain di ǂhanu-aisiba ǁîna xu ra ǁkhaedawaga!

²⁴ǁNā-amaga ǀaes di nams ra ǃgaodana hapu tsî ǀapon ra ǁhabub xa hîkākāhe khami, ǁnās ǁkhās khamib ge ǃnomab âna gunub khami nîra ī, tsî ǁîn di ǃkhāb ge tsarab khami nîra ǃapa; ǃKhūb ǂnubidi dib di ǂhanuban ra aoxū tsî mîs Israeli ǃAnub disan ra ǃharaxū amaga.

²⁵ǁNā-amagab ge ǃKhūb di ǁaiba ǁîb ǁaesǀî ge ǂhubi; tsîb ge ǃommi âba ǁînǀî ge ǀhōǂui, tsîb ge ǁîna ge ǂnau, ǃhomgu ge ǀkhūs kōse; tsî ǁō hâ sorodi ân ge daogu di ǁaegub ǃnâ ǁgoe ǂgoab khami ǁgoes kōse. Tsî nēn hoan ī xaweb ge ǁaib âba ǁkhaedawasen tama hâ, tsî ǃommi âb ge ganupe ǀhōǂuihe hâ.

²⁶ǁÎb ge ǃkhau-e nîra ǃkhā ǁaedi ǁaegu ǃnūseba xu, tsî ǁîb ge ǁîna nîra ǂnuniba ǃhūbaib di ǀamsa xu. Kō, on ge ǃhaese, ā, ǃnoesase nîra hā!

²⁷ǀHupu hâ-i xare-i tsî ǃnôa hâ-i xare-i ge ǁîn ǁaegu nîra ǀkhai; khoe-i xare-i ge ǂomhî tsî ǁom tama hâ, tsî ǃgaesenni ǁî-i kamanab dib ge oresen tama, tsî ǃhâub ǁî-i di ǁharora dib ge ǃgâu tamase nîra hâ.

²⁸ǂĀgu ân nîra ǀā, tsî ǁîn di khādi hoadi ǂgaeǃnâhe hâse nîra hâ, ǁkhoradi ǁîn di hān didi ge ǃhaose nîra ǃgôahe, tsî ǀnūdi âna sarese.

²⁹ǁÎn di ǃgurub ge kaira xammi dib khami nîra tsâ, tsîn ge ǂkham xamgu xase nîra ǃguru; tsîn ge nîra ǃguru tsî ǁkhâuǁnâsa nîra ǃkhō tsî ūbē, tsî ore-ao-i xare-i ge nîra ǀkhai.

³⁰Tsîn ge ǁnātsē ǁîna nîra ǀhauǀî, hurib ra ǀhau khami. ǃNubaib ge ǃhūbaiba nîra kōǀîhe, tsî mû, o kha ge ǃkhaenab tsî ǂōǂōsib tsîkha nîra hâ, tsî ǃnâb ge nîra ǃkhae ǁîn di hîǀhurusigu ǃnâ.