Read Khoekhoegowab Jesajab 50 Bible Online

Jesajab 50 - Khoekhoegowab bible

Jesajab 50

¹Nētib ra ǃKhūba mî: Mapas hâ ǀgoraǂkhanis sadu îs dis, ǁîs ǀkha ta ge tita sîbēsa? Tariba ti surude ǂganaogu dib, ǁîb tawa ta ge sado ǁamaxūba? Mû, sadu di ǂhanuoǃnâsigu ǃaromas ge, ǁamaxūhe du hâsa; tsî sadu ǃûǂamdi ǃaromas ge, sadu îs ge sîbēhesa.

²Tarexa i tita ge hāo, khoe-e a ǀkhai? Tarexa i tita ge ǂgaio, khoe-i xare-e ǃeream te tama hâ? Ti ǁôaba kha ge ǃnubuǃari, ob ore ǁoa? Ti ǃnâb ǀgaiba a ǀkhai, ore ta nîse? Mû, ti ǀausa xus ge huriba ta tita ra ǂnâǂnâsa, tita ge ǃāga ǃgaroǃhūse ra ǂnûi, ǁaun âb ra ǁōs kōse, ǁgam-i a ǀkhai xui-ao, tsîn ra ǁgâs xa ǁō.

³Tita ge ǀhomma ǂnūsiba ra ana, tsî ta ge ǁhō-e ǃgū-aixūse ra ǂnûi.

⁴ǃKhūb, ǃKhūb ge tita ǁkhāǁkhāsabeb di namsa ge mā, ǀhupu hâ-i ǀkha ǁaeb ai mî-e ǃhoasa ta nî ǂanga. Mâ ǁgoas hoas aib ra ǂkhaiǂkhai te, ǁîb ra ti ǂgaesa ǂkhaiǂkhai, ǁnâu ta nîga ǁnān ǁkhāǁkhāhe ran xase.

⁵ǃKhūb, ǃKhūb ge ti ǂgaesa ge ǁkhowa-amba te, tsî ta ge mâǃoaxa tama hâ, tita ge khaosǀî oa tama hâ.

⁶Tita ge ti ǁâba ra mā ǁnān ǂnau te rana, tsî ti xōkha ǁnān ǀûna ra tsuruǂui-ai tena; ti aisa ta ge gaugau tama hâ ǃharaxūb tsî ǂara-aiheb tsîkha xu.

⁷ǃKhūb, ǃKhūb ra hui te ǃkhais ǃaroma ta ge taotaohe tide. ǁNā-amaga ta ge ti aisa ǁkhaiǀuis axase ge dī, ǂan ta a xui-ao, taotaohe ta tide ǃkhaisa.

⁸ǁÎb, tita ra ǂhanu-ai kaib ge a ǀgū: Tari-e nî ǂnoagu-ū te? A da ǀhû: Tari-e ǂhanub di ǃkhai-e ūhâ ti ǃoagu? A-i nēxopa ī ti ǃoa!

⁹Mû, ǃKhūb, ǃKhūb ra hui te. Tariba ǁnāb tita nî ǀâxareba? Mû, ǁîn ge hoatsama sara-i khami nîra ǀoro; ǁgurib ge ǁîna nîra hapu.

¹⁰Tari-e hâ sadu ǃnâ, ǃKhūba ra ǃaoǃgâ-e, ǃgāb âb di dommi ai ra ǃgâ-e? ǃKhaenab ǃnâ ǃgû tsî i ga ǃnâ-i xare-e ūhâ tama i o, a-i ǃKhūb di ǀons ai ǂgomaiǂnûi, î-i ǁî-i di Elob ai ǂgomǃgâ.

¹¹Mû, sadu ǀae-e ra ǂhubi du hoado, tsî nanidi ǀkha ra ǃgaesendo, ǃgû sa ǀaes di ǁhabub ǃnâ, tsî ǁnā nanidi hîa du ge ǂhubidi ǃnâ. Ti ǃomma xus ra ǁî ǃkhaisa hāba du: Tsûb ǃnâ du ge nîra ǁgoe.