Read Khoekhoegowab Jesajab 51 Bible Online

Jesajab 51 - Khoekhoegowab bible

Jesajab 51

¹Tita ǁnâu sadu ǂhanu-aisiba ra ǃgôaǃgondo, sadu ǃKhūba ra ôado; kōǀî ǁnā ǃhaob ǁîba xu du ge ǁhāheb tsî āb ǀaus dib, ǁîba xu du ge khaoheba.

²Kōǀî Abrahammi, sadu îb, tsî Saras sado ge ǁoras tsîra. Tita ge ǁîba ge ǂgai, ganupeb ǀguri hâ hîa, tsî tita ge ǁîba ǀkhae, tsî ǁîba ge ǂguiǂgui.

³ǃKhūb ge Sionsa nîra ǁkhaeǂgao tsî ǁîb ge ǃgaroǃhūb âba Edenni khami nîra dī, tsî ǀkhuru ǃhūba ǃKhūb di ǃhanab khami. Dâb tsî ǃgâiaǂgaob tsîkha ge ǁîs ǃnâ nîra hōhe, gangans tsî ǁnaetsanas dommi tsîna.

⁴Tita ai ǃgaoǃgâ, ti ǁaese; tsî ti khoedo, tita ǁnâu; ǂhanu-i ge tita xu nî ǂoa xuige, tsî tita ge ti ǂhanuba ǁaedi di ǃnâse nî ǂnûi xuige.

⁵Ti ǂhanu-aisib ge a ǀgū, ti ǃgâiǃōb ra ǂoa, tsî ti ǁôakha ge ǁaede nîra ǀgoraǃgâ. Tita di ge ǃnāǃnuide nîra ǃâu, tsî ti ǁôab ain ge nîra ǂgomaiǂnûi.

⁶Kōkhâi ǀhommiǀî, î du ǃhūbaiba kōǀî ǃnaga; ǀhommi ge ǀan-i axase nîra kā, tsî ǃhūbaib ge sara-i axase nîra ǀoro tsî ǁansaben âb ǁnās ǁkhās axase nîra ǁō xuige. Xawe ti ǃgâiǃōb ge ǀamosib kōse nîra hâ, ti ǂhanu-aisib ge khôaǂkhūhe tide.

⁷Tita ǁnâu, sadu ǂhanu-aisiba a ǂando, sas ǁaes, ǂgaob âs ǃnâb ti ǂhanuba hâse: Tā ǃao ǃharaxūb khoeb diba, î du ǃkhāǃkhādi ân xa tā ǃhuri.

⁸ǁGurib ge ǁîna sara-i axase nîra hapu; tsî ǂunin ge ǁîna nîra hapu ǀû-i axase. Xawe ti ǂhanu-aisib ge ǀamosib kōse nîra hâ, tsî ti ǃgâiǃōb ǃhaosa xu ǃhaos kōse.

⁹ǃNoaǂkhai, ǃnoaǂkhai îts ǀgaiba ana, sats ǃKhūb di ǁôatse; ǃnoaǂkhai aibekam tsēdi ǃnâs khami, ǃhaodi hugas didi ǃnâs khami. Satsa kha ǁnâi ǁî tamatsa, Rahaba ge ǁhāǃātsa, hurib di draka ge ǃkhāǃganutsa?

¹⁰Satsa kha ǁnâi ǁî tamatsa hurib ǁgamgu kai ǃgammi diga ge ǂnâǂnâtsa, ǃgamgu hurib diga ge daose dītsa, oresan nî ǁîba-ū ǃgûse?

¹¹Nētin ge ǁamaǃnoraǃnorahe hân ǃKhūb dina oa, tsî dâb ǀkha Sions tawa nîra hā, tsî ǀamo ǃgâiaǂgaob ge ǁîn di danas ai nîra hâ: Dâb tsî ǃgâiaǂgaob tsîkha xas ge nîra ǃkhōhe, ǃoab tsî ǀhâimâinǀoms tsîra ge nîra ǁhâbē.

¹²Tita, tita ge ǁnā ta, sado ra ǁkhaeǂgao ta. Taritsa sats, khoeb ǁō nîba ra ǃaots, tsî khoen ôab ǀgâ kai nîba ra ǃaotsa?

¹³Tsî ǃKhūb satsa ge dīb, ǃhomga ge ǃāǂuib, tsî ǃhūbaiba ge ǃgaoǃgaoba ra ǀurutsa? Tsî tsēs hoasa hugaǀgui ra ǃaotsa, ǁgôasib ǂōǂō-aob dib ǃaroma, hîǀhuru tsi nîseb ra ǂâibasen ǃnubai? Mapab hâ ǁgôasib ǂōǂō-aob diba?

¹⁴Doeǁgamahe hâ ǃkhōsab ge ǃhaese nîra ǁnāxūhe; tsîb ge āb ǃnâ ǁō tide, tsîb ge pereb âb tawa tôasi tide.

¹⁵Tita ge ǃKhūta, sa Elota, huriba ra khâikhâiǃnâ ta, ǃgabigu âb ra ǀōs kōse: ǃKhūb ǂnubidi dib ge ǀons âba.

¹⁶Tsî tita ge ti mîde sa ams ǃnâ ǁgui tsî ra ǃgū-ai tsi ti ǃommi di sommi ǃnâ, ǀhomma ǂgā tsî ta nî ǃhūbaiba ǃgaoǃgaose, tsî Sions ǃoa ta: Sadu ge a ti ǁae, ti nî mîse.

¹⁷ǃNoaǂkhai, ǃnoaǂkhai, îs khâi, sa Jerusalems, ǃKhūb ǃommi ǃnâ āǀgabis ǁîb ǁgôasib disa ge āsa; ǂgomab ǂnarige-ai kai ra āǀgabis dibas ge ā, ā ǁîbas ge ge ǃhom.

¹⁸ǁNā ǀgôan hîas ge ǁoran hoan xa i ge ǀgui-i ǁîsa nî ǂause ǂgaeǂgui-i xare-e ge ǀkhai i; tsî ǁnā ǀgôagu, hîas ge kaikaigu xab ge ǀguib xareb ǁîsa nî ǃkhōǁôaba ǀkhai ge i.

¹⁹Nē ǀgam xūn xas ge ge hāǂamhe. Tari-e ǀkhom si hâ? Hîǀhurus tsî ǂkhūǂkhūs, tsî ǃâtsūǀkhāb tsî gôab tsîn ǀguin ge hâ. Mati ta kha ǁnâi nî ǁkhaeǂgao si?

²⁰Sa ôan ge tsanaǁkhui hâ; ǁîn ge daogu hoadi di ǁhôagu ai ǁgoe, ǃkhausa ǁkhamab ǂhaohe hâb khami. ǁÎn ge ǁgôasib ǃKhūb dib xa ǀoa hâ, ǃkhâis sa Elob dis xa.

²¹ǁNā-amaga ǁnâu nēsa, sadu ǀkhomǀkhomsabedo, tsî sadu āǁō hâdo, ǂauxûib xa tamas a xawe.

²²Nētib ra sadu ǃKhūba mî, ǃKhūb tsî sadu Elob, ǁaes âb di ǂnoaguǃkhaisa ra ǂnoaguba: Mû, tita ge āǀgabis ǂnarige-ai-kais disa sa ǃomǁaeba xu ra ū; ǂgomab ti ǁgôasib di āǀgabis diba, ǁîbats ge ǃaruǀî ā tide.

²³Tsî ta ge tita ǁîba ǁnān satsa ge ǃoa kain ǃomǁae nîra mā, ǁnān, sa ǀoms ǃoa: ǁGoe, î da sas ai ǃgû, ti ge mîna, tsîs ge ǁâb âsa ǃhūb khami ge ǁgui, tsî daob khami, ǁnān, ǁîb ai ra ǃgûn dib khami.