Read Khoekhoegowab Jesajab 52 Bible Online

Jesajab 52 - Khoekhoegowab bible

Jesajab 52

¹ǃNoaǂkhai, ǃnoaǂkhai, sa ǀgaiba ana, sas Sionse. ǂGaeǂgā re ǂkhaisa saran âsa, sas Jerusalems, ǃanu ǃāse. Sa ǃnâb ge ǃaruǀî ǃgaohe tamab kas, ǀurisab kas hoasa sī tide xuige.

²Tsaraba ǃhaebeǁnâ; khâi î ǂnû, sas Jerusalemse. Xoresen ǃaob âs di ǃgae-ūdana xu, sas ǃkhōhe hâ ǀgôas Sionni dise.

³Nētib ra ǃKhūba mî xuige: Sadu ge xū-i ama tama ǁamaxūhe hâ, o du ge ǁkhāti xū-i ama tama nîra orehe.

⁴Nētib ra ǃKhūb ǃKhūba mî: Aibekam ǁaegu ais ge ti ǁaesa Egipteb ǃoa ge doeǁgôa, ǃhao khoesen nî ǁnāpa hâse, tsî Asiriaǁîn ge ǁîna ǁause ge ǁgâiǀā.

⁵Tsî nēsi mâ dīxū-e ta nēpa ūhâ? tib ra ǃKhūba mî, ti ǁaes ge ǁause ūbēhe, tsî ǁnāgu, ǁîna ra gaoǂamgu ge ǁîna ra ā kai amaga tib ra ǃKhūba mî. Tsî ti ǀons hugaǀgui tsēs hoasa ra ǃkhāǃkhāhe amaga.

⁶ǁNā-amagas ge ti ǁaesa ti ǀonsa nî ǂan, ǁnā-amagas ge ǁîsa ǁnātsē nî ǂan, tita ǂhanita a ǁî: Mû, nē ta a, ti ra mî ta ǃkhaisa.

⁷Matikōse ra ǃhomgu ai a ǀnamǀnamsa ǂaira ǁnāb ǃgâiba ra ǂhôab, ǁnāb, ǂkhîba ra ǁnâu kaib dira, ǁnāb, ǃgâib xa ǃgâi ǂhôa-e ra ūhāb, ǃgâiǃōb xa ra ǁnâu kaib dira, ǁnāb, Sions ǃoa: Sa Elob ge a gao-ao! ti ra mîb dira.

⁸Dommi sa ǃûi-aogu dib ge hâ, ǁîgu ge domma ra ǃhâkhâi; ǁîgu ge ra ǀhûpe dâ. ǁÎgu ra mûsa xu mûs ǃoa matib ra ǃKhūba Sionsa ǁkhawa ū-oa ǃkhaisa mû xui-ao.

⁹ǀŌ, ǀō re î so ǀhûpe dâ, saso ǃū-aisa ǃkhaiso Jerusalems diso, ǃKhūb ge ǁaes âba ge ǁkhaeǂgao, ǁîb ge Jerusalemsa ge ore xuige.

¹⁰ǃKhūb ge ǃanu ǁôab âba ǁaedi hoadi mûǁae ge ǀkhaiǀkhā kai, tsî ǃhūbaib di ǀkhâuǀamdi hoadi ge ǃgâiǃōb sida Elob diba nîra mû.

¹¹ǃGû, ǃgû, î du ǁîsa xu ǂoa! Tā du ǀurisa xū-e tsâǀkhā! ǃGûǂoa ǁîn ǁaeguba xu, î du ǃanuǃanusen, sadu ǃKhūb soade ra tanido!

¹²Sadu ge ǃhaese ǂoa tide tsî ǁhâ rase ǃgûbē tide xuige; ǃKhūb sadu ais aiǃâ nîra ǃgû, tsî Elob Israeli dib nî sadu ǃgâb ai hâ xuige.

¹³Mû ti ǃgāb ge ǁnâuǃāxase nîra dī; ǁîb ge nîra kaikaihe, tsî nîra ǀgapi, ā, kaiseb ge nîra ǀgapi.

¹⁴ǂGuin ge sats ǂama ǃhurigâ khami, ais âb mâ khoe-i hoa-i dis ǃgâ-ai tsî īsib âb nau khoen ôab dib ǃgâ-ai ge ǁgao hâ i xui-ao:

¹⁵ǁNās ǁkhās khamib ge ǂgui ǁaede nîra ūkhâi, gao-aogu ams âga ǁîb ǂama nîra ǂganams kōse: ǁNān, ǃhoabahe tama hân, ǁîn ge ǁîsa nîra mû, tsî ǁnān, ǁnâu tama hân, ǁîn ge ǁîsa nîra ǁnâuǃā xui-ao.