Read Khoekhoegowab Jesajab 53 Bible Online

Jesajab 53 - Khoekhoegowab bible

Jesajab 53

¹Tari-e sige di aoǁnâsa ge ǂgom, tsî tari-i tawab kha ǁôab ǃKhūb diba ǂhaiǂhaihe hâ?

²ǁÎb ge ǂgonaro-i axase ais âb aiǃâ ge ǁhai, tsî ǃnomaro-i ǀkhuru ǃhūba xu ra ǀkhī-i axase. ǁÎb ge īsi-i tsî ǂkhaisi-i xare-e ūhâ tama ge hâ i, sida nî ǂgao-e.

³ǁÎb ge ǃharaxūsa tsî khoen hoan xa anu tama khoese ge ī, aob tsûgu dib, tsî ǀaesenni ǃnâ ǃâitsâhe hâb, tsî mâ-i hoa-i ge ǁî-i di aisa ǁîb aiǃâ gaugau rase ge ī; ǁîb ge ǃharaxūhe ge hâ i, tsî sida ge ǁîba ǃgôa tama ge i.

⁴Amaseb ge ǁîba sida ǀaesenga ǁîb ai ge ū, tsî sida tsûgab ge ǁîba ge tani, xawe da ge ǁîba ǁnorahe hâb, tsî Elob xa ǂnauhe tsî ǁgâiǀāhe hâb axase ge ūhâ i.

⁵Xaweb ge sida di ǃûǂamdi ǃaroma ǀhapiǂnûihe hâ, tsî sida di ǂhanuoǃnâsigu ǃaromab ge ǂkhūǂkhūhe hâ; ǁnā ǁkharab, hîa ǂkhîba sida ra ūhābab ge ǁîb ai ge hâ i, tsî ǁîb ǂnauǃhonaga xu da ge sida ge ǂgau.

⁶Sida hoada ge gūn khami gere ǁhapu, sida ge mâ-i hoa-i âda ǁî-i di daob ǂhanibǀî gere ǃoa; xawe ǃKhūb ge sida hoada di ǂhanuoǃnâsiba ǁîb ai ge hā kai.

⁷ǁÎb ge ǂgaoǀkhāheo, ob ge ge ǁgâiǀāhe, xaweb ge ams âba khowa tama ge i: ǁKhao-i khamib ge ǂāǃnaob ǃoa ge ǂgaeǂguihe, tsî gū-i ǂkhomaob â-i aiǃâ a ǃgome-i ǁkhā-i khamib ge ams âba khowa tama ge i.

⁸ǁÎb ge ǂōǂōsib tsî ǀgoraǃgâs tsîra xu ge ūbēhe. Tsî tari-e kha ûiǁaeb âba a ǃhoaǂui ǁkhā? Ûitsaman ǃhūba xub ge ǃgaoǁnâhe xui-ao: ǃÛǂams ti ǁaes dis ǃaromas ge tsûb ge ǁîb ai hâ isa.

⁹Tsîs ge ǀhobas âba eloxoresan tawa ge ǁāǁāhe, tsîb ge ǃkhū hân tawa ge hâ i ǁîb di ǁōb ǃnâ, tsū-i xare-eb dī tama tsî gāxaǃnâsi-i xare-i ge ams âb ǃnâ hâ tama hâ i amaga.

¹⁰Xawe ǃKhūb ge ge ǃgâibahe, ǁîbab nî ǂkhūǂkhū ǃkhais xa, ǁîb ge ǁîba ge ǀaesen kai, ǀoms âbab ǀhapiǁguibase nî ǂnûi, ǃnubaib ge suriba nîra mû, ob ge ǂomxa tsēdi kōse nîra ûi, tsî ǃgâiǂâibasens ǃKhūb dis ge ǁîb ǃomma xu ǃaruǀî ǃgâiǃgâse nîra ī.

¹¹Sîsenni ǁîb ǀoms dib ǃaromab ge ǁîsa mû tsî nîra ǁâ, ǁîb di ǂhanu-aiba ǂansa xub ge ti ǃgāb ǂhanu-aiba ǂguina nîra ǂhanu-ai kai, ǁîn di ǂhanuoǃnâsigab nîra tani xui-ao.

¹²ǁNā-amaga ta ge tita ǂguina amǃnâse nîra mā bi, tsîb ge ǀgaisan ǀkha ǁkhâuǁnâsa nîra ǀgora, ǀoms âbab ǁōb ǃnâ ge ǁhōxū, tsî ǃûǂam-aon ǀkhab ge ǃgôahe, tsî ǂguin ǁorenab ge tani, tsî ǃûǂam-aona ǀgoreba amaga.