Read Khoekhoegowab Jesajab 54 Bible Online

Jesajab 54 - Khoekhoegowab bible

Jesajab 54

¹Dâ, sas ǂûoǃnâs, ǁora tama hâse; ǀōǀō dâxa ǁnaes ǀkha îs dâ, sas ǁoratsûba ge ūhâ tama hâ ise; ǀgôan ǀguri hâs din ǃgame hâs di ôan ǃgâ-ai a ǂgui xuige tib ra ǃKhūba mî.

²Tentoms âs di ǃkhaisa harahara, în xordainǃkhaigu sa ǁanǃkhaidi diga ǃāǂui, tā ǁî ǃkhaisa ǂhani; tsurigu âsa gaxu kai, îs ǀuridan âsa ǃgâuǁapoǁapo.

³Amǀkhābǀîs kas, ǁareǀkhābǀîs kas hoasas ge sasa nîra ǂapa xuige; tsî sa surib ge ǁaede nîra ǀumi, tsîb ge hîǀhuruhe hâ ǃāde ǁkhawa nîra ǁanǃnâ.

⁴Tā ǃao, taotaohes tide xuige, îs tā taob ǀkha dāhe, taos tide xuige; tsîs ge taob sa ǂkhamsis diba nîra ǀuru, tsî ǃharaxūb sa ǃoatarasis dib xas ǃaruǀî ǂâi tide xuige.

⁵Sa Kuru-aob a sa ǃgame-ao xuige, ǃKhūb ǂnubidi dib tib ǀon hâ, tsî ǃAnub Israeli dib ge a sa Ore-ao; ǁîb ge Elob ǃhūbaib hoaragab dib ti nîra ǂgaihe.

⁶ǃKhūb ge sasa ǁnāxūhe hâ taras tsî tsûaǂgao hâs ase ge ǂgai, xawes ge a ǂkhamsis di tara, ǃharaxūhes ge hâ i xawe, tib ra sa Eloba mî.

⁷ǂKhari mûsǀapirob ǀguib kōse ta ge tita sasa ge ǁnāxū, xawe kai ǀkhomxaǂgaosigu ǀkha ta ge tita sasa nîra ǀhaoǀhao.

⁸ǂKhari ǁaerob ǃnâ ta ge ti aisa mûsǀapirob kōse sasa xu ge gaugau, xawe ǀamo ǀkhommi ǀkha ta ge sasa nîra ǀkhom tib ra ǃKhūb sa Ore-aoba mî.

⁹ǁÎs ge tita ǁgamgu Noaxi digu xase nîra ība, nū ta ge ǃnubai, ǁgamgu Noaxi digu ǃhūbaiba ǁkhawa dâuǂam tide ǃkhaisa. ǁNās ǁkhās xase ta ge tita ge nū, tita sas ǂama ǁkhawa ǁaixa tide tsî sasa ǁkhawa ǀao tide ǃkhaisa.

¹⁰ǃHomgu ge nîra ǂgō, tsî ǃnomdi ge nîra ǁnobe, xawe ti ǀkhomxasib ge sasa xu ǂgō tide, tsî ǃgaeǀhaos ti ǂkhîb dis ge ǁnobe tide, tīb ra ǃKhūb, satsa ǀnam hâba mî.

¹¹Sas ǁgâiǀāhe hâs, tūǀnanub xa ra doeǁgamahe ǁkhaeǂgaosa tamase, mû, tita ge ǀuidi âsa anxase nîra ǁgui, tsî tita ge sasa safirǀuidi ai nîra ǃgaoǃgao.

¹²Tsî sa xlamûǂuidaode ta kristali dise nîra dī, tsî sa ǁāga robainǀuidi xa, tsî sa ǀkharib hoaba ǀnamǀnamsa ǀuidi xa.

¹³Tsî sa ôan hoan ge ǃKhūb xa nîra ǁkhāǁkhāhe, tsî ǂkhîb sa ôan dib ge nîra kai.

¹⁴Sas ge ǂhanu-aisiba xu nîra ǁapoǁapohe; ǁgâiǀāba xu ǃnūse hâ, ǃaos ge tide xuige, tsî ǃnūse ǃhuriba xu, sasab ǀgū tide xuige.

¹⁵Mû, ǁîn ge ǂanǂansase nîra ǀhû, xawe tita xu tama; sas ǃoagu ga ǀhû-i, ǁnā-i ge sas ǃaroma nîra ǁnā.

¹⁶Mû, tita ge ǀuriǂnau-aob ǂnomde ǀaes ǃnâ ra ǃnâikhâib tsî sîsenūxūs âba sîsenni âba ra ūǀkhībaba ge kuru. Tsî ta ge ǁkhāti hîǀhuru-aoba ge kuru, hîkākāb nîse.

¹⁷Mû, sîsenūxūs sa ǃoagu ga ǁāǁāhes hoas ge ǃgâiǃgâ tide, tsî mâ ǀoms ǀgoraǃgâs ǃnâ sas ǃoagu ga khâis hoas, ǁîs ge sas xa nîra ǀâxarexūhe. Nēs ge ǀumis ǃKhūb di ǃgāgu disa, tsî ǁîn di ǂhanu-aisib ge tita xu hâ, tib ra ǃKhūba mî.