Read Khoekhoegowab Jesajab 55 Bible Online

Jesajab 55 - Khoekhoegowab bible

Jesajab 55

¹Sadu ǁgâ hâdu hoado, hā du re ǁgam-i tawa, tsî sadu mariodo, hā î ǁama î du ǂû, hā î du mari-i ose tsî ǀgaus ose ǁama ǂauxûib tsî daib tsîkha hoakha.

²Tare xū-i ǃaroma du kha mariba ra ǀnō ǁnā-i hîa pere tama-i ama, tsî sadu di hōǂgābasenxūna ǁnā-i ǁî-i xats ǁâ ǁoa-i ama? Tita ǁnâu, î du ǃgâiba ǂû, îs sadu di ǀomsa kaub ǃnâ ǃgâiǃgâisen.

³ǂŌ sadu di ǂgaesa î du tita ǁga hā; ǁnâu îs sadu di ǀomsa ûi: Tita sadu ǀkha ǀamo ǃgaeǀhao-e dī, tsî ǁaposa ǀkhomxasigu Davib diga nîra mā du xuige.

⁴Mû, tita ge ǁîba ǁaedi di ǀhûǀguitimî-aose ge mā, ǁaedi di gao-ao tsî mîmā-aose.

⁵Mû, sats ge ǁae-i hîats a ǀū-e nîra ǂgai, tsî ǁnā ǁaes, satsa ǂan tamas ge sats tawa nîra ǃkhoehā, ǃKhūb sa Elob ǃaroma, tsî ǃAnub Israeli dib ǃaroma, ǁîb ge satsa ǂkhaiǂkhai xui-ao.

⁶ǃKhūba ôa, ǁîb a hōhe ǁkhā hîa; î du ǁîba ǂgaiǀî, ǁîb a ǀgū hîa.

⁷Eloxoresaba ab daob âba ǁnāxū tsî ǂkhabadī-aoba ǁîb di ǂâide. Îb ǃKhūb ǃoa ǃhobasen, ob ge ǁîba nîra ǀkhom bi, tsî sida Elob ǃoa, ǁîb ra ǂguiǃnâguse ǀûba xuige.

⁸Ti ǂâidi ge sadu ǂâi tamade, tsî sadu daogu ge ti dao tamaga, tib ra ǃKhūba mî.

⁹ǀHommi ǃhūbaib ǃgâ-ai a ǀgapi khami, ǁnās ǁkhās xase gu ge ti daoga sadu daogu xa a ǀgapi tsî ti ǂâide sadu ǂâidi xa xuige.

¹⁰ǀApib tsî tsamaros tsîra ǀhomma xu ǁgôaxa tsî ǁnāǀî ǁkhawa oa tama i tsî ǃhūba ra ǀâǀâǃganu tsî ra dī, ǁîb ra ǁhao tsî ūǀkhī ǃkhaisa, tsî ǃkhommab nî tsoro-aoba tsî perebab nî ǂû-aoba mā khami.

¹¹ǁNās ǁkhās khamis ge ti mîs, ti amsa xu ra ǂoas ona nîra ī; ǁÎs ge ǀkhaiǃnâse tita ǃoa oa tide, tsîs ge tita a ǃgâibana nîra dī, tsîs ge nîra ǃgâiǃgâ, ǁîs ǃoa ta tita ra sî si ǃkhaisa.

¹²ǃGâiaǂgaob ǃnâ du ge sado ǂoa, tsî ǂkhîb ǃnâ nîra ǂgaeǂguihe; ǃhomgu tsî ǃnomdi tsîn ge ǃaruǀî sadu ais aiǃâ nîra ǀō dâxa ǁnaes ǀkha, tsî haidi ǃaub didi hoadi ge nîra ǁam.

¹³ǁKhūs di amǃnâs ais ge denehaisa nîra ǁhai, tsî ǀgamib di amǃnâs ais ge mirdehaisa nîra ǁhai, tsîs ge ǁî ǃkhaisa ǃKhūba ǀonse nîra ība, ǀamo saos, tātsē ǃhomǂuihe tidese.