Read Khoekhoegowab Jesajab 56 Bible Online

Jesajab 56 - Khoekhoegowab bible

Jesajab 56

¹Nētib ra ǃKhūba mî: ǂHanuba ǃkhōǀgaipe, î du ǂhanu-aisiba dī; ti ǃgâiǃōb ge hāb nîse a ǀgū, tsî ti ǂhanu-aisiba ǂhaiǂhaiheb nîse.

²ǃGâiǃōb ge ǁnā khoeb nēna ra dība, tsî ǁnā khoen ôab, ǁîna ra ǃkhōǀgaipeba, sâtsēsa ǁîbas ǀuriǀuri tamase tsēdī tsî ǃommi âba ǂkhabadīsa xu ra sâuba.

³Tsî ǃhao khoeb, hîa ǃKhūba ge ǁaeǁaesenna, ab tā ǃhoa tsî mî ǃKhūb ge tita ǁîb di ǁaesa xu ge ǀgoraǃari, tsî ǃgaohe hâba âb tā: Tita ge ǂnâsa haita, ti mî.

⁴Nētib ra ǃKhūba ǃgaohe hân tsî sâtsēga ra tsēdīn, tsî tita ǂgao hâna ra dīn tsî ti ǃgaeǀhaosa ra ǃkhōǀgaipen xa mî:

⁵Tita ge ǁîn ona ti ommi ǃnâ tsî ǂnubiǂgoagu ǃnâ ǃkhai-i tsî ǀonsa nîra mā, ǀgôagu tsî ǀgôadi tsîn dis ǃgâ-ai a ǃgâisa, ǀamo ǀonsa ta tita mâ-i hoa-i âna nîra mā, tātsē ǃhomǂuihe tidesa.

⁶Tsî ǃhao khoen, hîa ǃKhūba ra ǁaeǁaesenn, ǁîba nî ǃoabase tsî ǃKhūb di ǀonsan nî ǀnamse tsî ǁîban nî ǃgāse ībaga: Sâtsēsa ga tsēdī ǁîsa ǀuriǀuri tama i-i tsî ti ǃgaeǀhaosa ga ǃkhōǀgaipe-i,

⁷ǁî-e ta ge ti ǃanu ǃhommi ǃoa ūsī tsî tita ge ǁîna nîra ǃgâiaǂgao kai ti ǀgore-ommi ǃnâ. ǁÎn khauǁguibadi tsî ǁîn ǂāǁguibadi tsîdi ge nîra ǀnamǀnamsa ti altars ai; ti ommi ǁaedi hoadi di ǀgore-om ti nîra ǂgaihe xui-ao.

⁸ǃKhūb, ǃKhūb Israeli dib, doeǁgabēsana ra ǀhaoǀhaob, ra mî: Tita ge ǃaruǀî ǂguina ǁîb tawa nîra ǀhaoǀhao, ǁnān, ǀnai ǁîb ǁga ǀhao hân tawa.

⁹Sadu ǀgurudu ǃaub didu hoado, hā î du ǂû haiǀgoms di ǀgurudu hoado!

¹⁰ǁÎn di ǃûi-aogu ge hoatsama ǂgī hâ, ǁîgu ge xū-e a ǀū; ǁîgu hoagu ge ǃgome arigu, hîa ǁhū ǁoaga; ǁîgu ge a ǂomhîxa, tsî gu ge ǂomhîsa ǀnam.

¹¹Tsî nē arigu ge a xūǃgunuxa; tsî gu ge ǁâ ǁoa. Ā, ǁîgu ge ǃûi-aogu, hîa xū-e ǁnâuǃā ǁoaga; ǁîgu ge hoatsama ǁîgu di daobǀî ra ūnusen, mâb hoaba ǁîb di hōǂgābasensǀî, ǁîb di hâǃkhaisa xu.

¹²Hā du re ti gu ge ra mî, î ta tita ǂauxûiba ūhā, î da ǀgaisa xûiba ā! Îs ǁarikam tsēsa nētsēs ǁkhās khami ī, ā, as ǁîsa ǃnā, îs hoan ǂamai ǃgâi.