Read Khoekhoegowab Jesajab 58 Bible Online

Jesajab 58 - Khoekhoegowab bible

Jesajab 58

¹ǃGari dommi ǀkha ǂgai, îts tā ǃkhōdawasen. ǀGapadas ǀkhas axase dommi âtsa ūkhâi, îts ti ǁaesa ǁîn di ǃûǂamde ǂhôa, tsî Jakob omma ǁîn ǁorena.

²Titan ra tsēkorobe ôa; tsî ǂans ti daogu disan ra tura xawe, ǁaes hîa ǂhanu-aisiba ra dīs, tsî ti ǂhanub ti Elob diba ǁnāxū tamasa xaren ra tita dî ǂhanu-aisib ǂhanugu xa, ǁîn ge Eloba ǀgūse ra tura.

³Mî raǃâ: Tarexa da kha ǂûtama ra hâ, xawe sats ge kōǀî da tama hâ? Tarexa da kha ǀoms âda ra ǃgani, xawe sats ge ǁî ǃkhaisa a ǀū? Mû, sadu ǂûtama ra hâ tsēs ai du ǁîs ǃnâ turaba ūhâ tsî du ge sadu di sîsenni hoaba ǁkhōse ra ǂgaobasen.

⁴Mû, ǂnoagus tsî ǃkhamgus tsîra nî dīse du ge ra ǂûtama hâ, tsî eloxoresase du nî ǃoms ǀkha ǂnause. Tā nē tsēs khami ǂûtamahâ, sadu dommi nî ǀgapiseb ǃnâ ǁnâuhese.

⁵ǁÎsa kha ǁnāti ī ǂûtamahâ nî ī, tita ǂgao hâsa, ǀgui tsēs ǀguis kōsets sats khoetsa ǀoms âtsa nî ǃgani? Danas âtsats nî ǂā-i axase ǃgamǃgam, tsî ǁhōs tsî tsaob tsîra ǃnâts nî ǃgîbasen? ǁÎsats kha ǂûtamahâs ase nî ǂgai, tsî tsēs ǃKhūba a ǃgâibas ase?

⁶Nēsa kha ǁnâi ǁnā ǂûtamahâ tamasa, tita ǂgao hâsa: ǃHûdi eloxoresasib dide xoresa, ǃnaob di ǃhâuga xoresa tsî ǁgâiǀāhesana ǁnāxūsa, tsî mâ ǃnao-i hoa-e khôaǂkhūsa?

⁷Nē tamasa, ǃâ hânats ra pereb âtsa khôabasa, tsî ǀgâsan tsî ǃhaexūhe hân tsînats ra ommi ǃnâ ūǂgâsa? ǀŌǀkhā hâ-ets ga mû ǃnubai ǁî-e anasa, tsî ǁgans âtsa xuts sâusen tidesa?

⁸ǁNāǃnubaib ge ǃnâb âtsa ǁgoaǂnobos axase nîra ǁhai, ob ge ǂgausib âtsa ǃhaese nîra ǀkhī; ob ge ǂhanu-aisib âtsa sa ais aiǃâ nîra ǃgû, ob ge ǃKhūba sa khaoǃgâ ǃûisa nîra ǃûi.

⁹ǃNubaits ge satsa nîra ǂgai, tsî ǃKhūb ge nîra ǃeream tsi; sats ge nîra ǃau, tsî ǁîb ge: Mû, nē ta ge tita hâ ti nîra mî. Sa ǁaeguba xuts ga ǃnaob tsî ǀkhunuba ǀhōǂuis tsî ǂhanuoǃnâsiba ǃhoas tsîna dībēo.

¹⁰Tsî ǀoms âtsats ga ǃâ hâba ǁkhowa-amba tsî ǁgâiǀāhe hâ ǀomsats ga ǁâǁâo, ob ge sa ǃnâba ǃkhaenab ǃnâ nîra ǁhai, ob ge sa ǃkhaenaba tsēǃgâǁaeb khami nîra ī.

¹¹Ob ge ǃKhūba satsa hugaǀgui nîra ǂgaeǂgui; ob ge ǃKhūba sa ǀomsa kai ǀkhurusigu ǃnâ ǁâǁâ tsî sa ǂkhōga nîra ǀgaiǀgai, ots ge satsa dâudâuhe hâ ǃhanab ǁkhāb xase nîra ī, tsî ǀaus ǁgamgu dis, ǁgamgu âs tôasi tamas ǁkhās xase.

¹²Tsî satsa xu ga ǀkhīn ge ǀoro hîǀhuruhe hâ ǃāde nîra ǂnubi; ots ge satsa ǁnā ǃgaoǃgaodi ǃhaosa xu ǃhaos ǃoa ge hîǀhuruhede ǁkhawa nîra ǂnûikhâi; ots ge satsa ǂapaga ra ǂkhauǂgants, ǃganga ra dī-unuts, ǁanǃnâhen nîga, ti nîra ǂgaihe.

¹³Sa ǂaisats ga sâtsēsa xu ǁkhaedawao, sa turabats ga ti ǃanu tsēs ai dī tama io, tsî sâtsēsats ga ǃgâiǃgâisenxū ti ǂgaio, ǃKhūb hîa ǃgôahesa a anub nî khaihese, tsî ǁîsa ǃgôa tsîts ga sa daoga dī tama io tsî sa turab ǂûbats ga hō tama io, tsî mî-ets ga ǁî ǃkhais xa ǃhoa tama io;

¹⁴ots ge ǃKhūb ǃnâ nîra ǃgâiǃgâisen, o ta ge tita satsa ǃhūbaib ǀgapigu ai nîra ǃgapi kai, o ta ge tita satsa nîra ǁâǁâ ǀumis sa îb Jakob dis ǀkha; ams ǃKhūb dis ge ǁîsa ǃhoa xui-ao.