Read Khoekhoegowab Jesajab 59 Bible Online

Jesajab 59 - Khoekhoegowab bible

Jesajab 59

¹Mû, ǃommi ǃKhūb dib ge oresa ǃnububa tama hâ, tsî ǂgaes âb ge ǁnâusa ǀhauba tama hâ, ǁnâus tidese.

²Xawe sadu ǂhanuoǃnâsigu ge ǀgorasa ra dī sadu tsî sadu Elob ǁaegu; tsî sadu ǁoren ge aisa sado xu ra gaugau, ǁnâu du tamab hâ ǃkhaisa.

³Sadu ǃomgu ge ǀaob ǀkha ǂnaoǂnaohe hâ, tsî sadu ǀkhunuga ǂhanuoǃnâsib ǀkha. Sadu amǁgaugu ge ǂkhabasiba ra ǃhoa, sadu nams ge ǂkhababa ra khom.

⁴Khoe-i ǂhanu-aisiba ra ǃhoa-i xare-i ge a ǀkhai; tsî khoe-i amab ǂama ga ǀgoraǃgâs ǃnâ ǂgâ-i xare-i ge a ǀkhai. ǁÎn ra ǁausib ai ǂgomaiǂnûi, tsîn ra ǂhumiba ǃhoa; ǁîn ge ǀhupuba ǀgamǀkhā hâ, tsîn ra ǂhanuoǃnâsiba ǁora.

⁵ǁÎn ra ǃgais ǃupuna ǁgoe-ai, tsîn ra ǀnûiǃkhamga dī. ǁÎn di ǃupun xa ga ǂû-i, ǁnā-i ge nîra ǁō, tsî ǁgâiǂkhūhen kao, o i ge ǃgai-e ra ǂoaxa.

⁶ǁÎn di ǀnûiǃkhamgu ge saradīsa ǃgâiba tama hâ, tsîn ge ǁîn ǂûna sîsengu ân ǀkha ǃgū-aisen ǁoa. ǁÎn sîsengu ge ǂhanuoǃnâsib sîsenga, tsî ǂkhabadīs ge ǁîn ǃomǁae hâ.

⁷ǂAidi ân ra ǂkhabab ǃoa ǃkhoe; tsîn ge ǀhapio ǀaoba ǂnâxūsa a ǃhaeba. ǂÂidi ân ge a ǂhanuoǃnâsib di ǂâi; hîǀhurus tsî ǂkhūǂkhūs tsîra ge ǁîn di ǃgangu ai hâ.

⁸Daob ǂkhîb diban ge a ǀū; tsî ǂhanu-i xare-i ge ǁîn di ǃgûdaogu ai hâ tama hâ. ǁÎn ǃgangan ra gamagamabasen; ǁîgu ai ga ǃgû-i hoa-i ǁnā-i ge ǂkhîba a ǀū-e.

⁹ǁNā-amagab ge ǂhanuba sida xu ǃnūse hâ, tsî ǂhanu-aisib ge saoǁae da tama hâ. Sida ge ǃnâba ra ǃâu, xawe mû, ǃkhaenab ǀguib ge hâ; kai ǃnâba da ra ǃâu, xawe da ge ǃkhaenab ǃnâ ra ǃgû.

¹⁰Sida ge ǂnubiǂgoaba ra tsanana ǂgīn khami, tsî mûo khoen xase da ge ra tsanana; sida ge tsēǃgâǁaeb ai ra ǃnôa ǃuiǁaeb ais khami; sida ge ǂuru khoen ǁaegu ǁō hân axase ī.

¹¹Sida ge hoatsama ra ǁhoa bērn khami; tsî da ge ǂnabun khami ra ā. Sida ge ǂhanuba ra ǃâu, xaweb ge a ǀkhai; ǃgâiǃōba, xaweb ge sida xu ǃnūse hâ.

¹²Sida ǃûǂamdi ge sa aiǃâ a ǂgui, tsî sida di ǁoren ge sida ǃoagu ra ǃkhō-am. Sida ǃûǂamdi ge sida ǀkha hâ, tsî sida ǂhanuoǃnâsiga da ge a ǂan:

¹³ǃÛǂams tsî ǂhumis tsîra ǃKhūb ǃoagu, tsî ǃgâǃgâbesa sida di Eloba xu; ǁgâiǀāb tsî ǁnāǁgôas tsîra xa ǃhoasa tsî ǂhumi mîde ūǀkhīsa ǂgaoba xu.

¹⁴ǁNā-amagab ge ǂhanuba khaosǀî ge oa, tsî ǂhanu-aisib ge ǃnūse mâ; amab ra daob ai ǃnôa xui-ao, tsî ǂhanu ǃkhai-i ge a ǂgâ ǁoa.

¹⁵Ā, amab ge a ǀkhai, tsî ǂkhababa xu ga ǂgō-i, ǁnā-i ge ǁkhâuǁnâse ra dīsen. Tsî ǃKhūb ge ǁî ǃkhaisa ge mû, tsîs ge ǁîb mûǁae tsū ge i, ǂhanu-i xare-i a ǀkhai ǃkhaisa.

¹⁶ǁÎb ge khoe-i xare-i a ǀkhai ǃkhaisa mûo, ob ge ge burugâ, mâba-ao-i xare-i a ǀkhai xui-ao; ǁnā-amagab ge ǁîb ǁôaba ǁîba ge hui, tsî ǂhanu-aisib âb ge ǁîba ge mâǃgâ.

¹⁷ǁÎb ge ǂhanu-aisiba ge ana panseri axase, tsî toroǀgapas ǃgâiǃōb disab ge ǁîba danas âb ai ge ǀgapa; tsîb ge ǁîba ǀkhaoba sarab axase ge ǂgaeǂgā, tsîb ge tauxasiba anaǂamxūb axase ana xui-ao.

¹⁸Sîsengu īs ǁkhās xaseb ge ǁîba nîra mādawa-am; ǁgôasiba mâǃoasaben âba dīdawa-amsa ǁîb khākhoena; ǃnāǃnuideb ge ǁîba amǃnâsa nîra matare.

¹⁹ǃNubain ge ǁîna ǃKhūb ǀonsa nîra ǃao, huriǂoas ǀkhāba xu, tsî ǂkhaisib âba sores ra ǁhai ǀkhāba xu. Khākhoeb ga ǃāb axase hā ǃnubaib ge Gagab diba ǃkhauba ǁîb ǃoagu nîra ǂnûikhâi.

²⁰Ob ge Ore-aoba Sions tawa nîra hāba ǁnān Jakob ǃûǂamsa xu ga ǃhobasenna, tib ra ǃKhūba mî.

²¹Tsî tita xasa, nēs ge ti ǃgaeǀhaos, ǁîn ǀkha ta ūhâsa tib ra ǃKhūba mî: Ti Gagab sa ai hâb, tsî ti mîdi sa ams ǃnâ ta ge ǁgui di, ǁîn ge sa amsa xu ǂgō tide, tsî sa surib amsa xu, tsî surib âts di suriba xu tib ra ǃKhūba mî, nēsisa xu ǀamosib kōse.