Read Khoekhoegowab Jesajab 6 Bible Online

Jesajab 6 - Khoekhoegowab bible

Jesajab 6

¹ǁNā kurib gao-aob Usiab ge ǁōb ǃnâ ta ge tita ǃKhūba ge mû, ǀgapi tsî ǂam trons ai ǂnôase, tsî ǂomamǃgâgu âb tempela ra ǀoaǀoase.

²Serafgu ge ǁîb ǂamǃnâ ge mâ i, mâb hoab âgu ge ǃnani ǁgaboga ge ūhâ i: ǀGamkha ǀkhab ge ǁîb di aisa ge ǃgū-ai, tsî ǀgamkha ǀkhab ge ǁîb di ǂaira ge ǃgū-ai, tsî ǀgamkha ǀkhab ge ge ǁkhana.

³Tsî nēb ge nauba ǂgaiǀî tsî ge mî: ǃAnu, ǃanu, ǃanub ge ǃKhūb ǂnubidi diba; ǃhūbaib hoab ge ǂkhaisib âb xa ǀoa hâ.

⁴Haigu dao-ams digu ge ǂgai ra gu di dommi xa gons kōse, ob ge omma ǀanni xa ge ǀoa.

⁵ǃNubai ta ge tita ge mî: Tsūba te tita, kā ta ra xui-ao. ǀUrisa amǁgaukha ūhâ aota ge, tsî ǀurisa amǁgauga ūhâ ǁaes ǁaegu ta ǁan hâ amaga; ti mûra ge Gao-aob ǃKhūb ǂnubidi diba ge mû xui-ao.

⁶Tsî ǀguib Serafgu dib ge tita ǃoa ge ǁkhana hā, tsîb ge ǀaexa ǂnomsa ǃomǁaeb âb ǃnâ ūhâ, ǁkhamǀuris ǀkhab ge altarsa xu ūhâ isa.

⁷Tsîb ge ǁîs ǀkha ti amsa tsâǀkhā tsî ge mî: Mû, nēs ge amǁgaukha âtsa go tsâǀkhā, nētis ge dīsās âtsa go xū tsi, tsî ǁoreb âts ge go ǀûbahe.

⁸ǁNās khaoǃgâ ta ge tita ǃKhūb di domma ge ǁnâu: Tariba ta tita nî sî, tariba sige nî ǃgûbaba? ti ge mîba. ǃNubai ta ge tita: Mû, nē ta a, tita sî re! ti ge mî.

⁹Ob ge ǁîba ge mî: ǃGû îts nē ǁaes ǃoa mî: ǁNâu rase ǁnâu, î du tā ǁnâuǃā; tsî mû rase, î du tā mûǂan.

¹⁰Îts ǂgaob nē ǁaes diba ǁau kai îts ǂgaedi âna ǂganam, îts mûdi âna ǂganam, în ǁîn di mûdi ǀkha tā mû, în ǁîn di ǂgaedi ǀkha tā ǁnâu, în ǁîn di ǂgaob ǀkha tā ǁnâuǃā, în tā ǃhobasen, în ǁîna tā ǂgau.

¹¹ǃNubai ta ge tita ge mî: Matikōsesa ǃKhūtse? Ob ge ǁîba ge mî: ǃĀdi nîra hîkākāhes kōse, ǁîdi nîra ǁansabeos tsî omdi nîra khoe-os kōse, tsî ǃhūb hîǀhuruhe hâǃâ nîra ǃū-aisas kōse,

¹²ǃKhūb ge ǁnā khoena ǃnūse nîra dībē xui-ao, tsî ǃū-ais ge ǃhūb di ǃnāb ǃnâ nîra kai.

¹³Xawe disiǁî ǃâs ga gorose ǁîb ǃnâ hâ, xaweb ge nîra hîkākāhe, tsîn ge nîra ī terpentinhai-i tsî aik-hai-i, ǁhāǁnâhe-i ka o ganupe ǃgaos â-e ǃgau hâ i khami. ǁNās ǁkhās xaseb ge ǃanu ǃkhomma ǃgaos ase nîra ī.