Read Khoekhoegowab Jesajab 60 Bible Online

Jesajab 60 - Khoekhoegowab bible

Jesajab 60

¹Khâi îts ǃnâ, ǃnâb âts ge ǃgoaxa tsî ǂkhaisib ǃKhūb dib ra ǁhaiǂam tsi xuige;

²îts kō, ǃkhaenab ge ǃhūbaiba nîra ǃgū-ai tsî ǃkhaeba ǁaede, xawe sats ǂamab ge ǃKhūba nîra ǁhai, tsî ǂkhaisib âb ge sa ǂamǃnâ nîra mûhe.

³ǁAedi hoadi ge ǃnâb âts ǃoa nîra ǃgû, tsî gao-aoga ǁnā ǂkhaib, ǁîb xats satsa ǁhaiǂamhe hâbǀî;

⁴îts kōǂnami, îts mû, îts kō nēn hoan ge ǀhû hâ tsî sa ǃoa ra hā: Sa ôagu ge ǃnūseba xu ra hā, tsî sa ôadi ge sa xōǀkhā nîra kaikaihe.

⁵ǃNubaits ge satsa ǁîsa mû tsî nîra dâǀhao, ob ge ǂgaob âtsa burugâ tsî nîra kai; ǂguib hurib dib ge sa ǃoa nîra ǁkhaehāhe, ǂnubis ǁaedi dis ge sa tawa nîra hā.

⁶ǂGuib ǃnaidi dib ge satsa nîra ǃgū-ai, ǃhae ǃnaidi Midianni tsî Efab tsîkha didi, ǁîdi ge hoatsama Skebasa xu nîra hā, ǃhuniǀurib tsî wiroki tsîna di ge nîra ūhā, tsî di ge ǃnāǂamsa ǃkhōǀkhās ǃKhūb disa nîra ǂhôa.

⁷Gūn Kedari din hoan ge sa tawa nîra ǀhao, bairagu Nebajoti digu ge satsa nîra ǃoaba; ǁîn ge ǃgâiǂâixase ti altars ai nîra hā, tsî tita ge ommi ti ǂkhaisib diba nîra ǂkhaiǂkhai.

⁸Tarina ǁnān, ǀnanu-i axase ǁkhanaǃgoaxana, tsî ǂnabudi axase mûǂuidaodi âdi ǁga?

⁹ǃNāǃnuidi nî tita ǃâu xui-ao; tsî ǂgurosa gu ge Tarsis doe-omga hâ, sa ôana gu nî ǃnūseba xu ūhāse, tsî ǀhaiǀurib ân tsî ǃhuniǀurib ân tsîn ǁîn ǀkha ǃKhūb sa Elob ǀons ǁga, tsî Israeli di ǃAnub ǃoa, satsab ge ǂkhaiǂkhai amaga.

¹⁰Tsî ǃhao khoen ge sa ǂnubiǂgoaga nîra ǂnubi, tsî ǁîn gao-aogu ge satsa nîra ǃoaba: Ti ǁgôasib ǃnâ ta ge tita satsa ge ǂnau, ti ǃgâiǂâibasens ǃnâ ta ge tita satsa ǀkhom xui-ao.

¹¹Tsî sa ǁāgu ge hugaǀgui ǁkhowa-amsase nîra mâ, ǁîgu ge tsēas kas, tsuxubas kas hoasa ǂganamhe tide, sa tawan nî ūǂgāhega ǂnubis ǁaedi dis dina, tsî gao-aogu ân nî sa ǃoa ǂgaeǂguihāhese.

¹²ǁNā ǁaes tsî gaosis, satsa ga ǃoaba tama is, ǁîs nîra kāǁō xui-ao; tsî ǁnā ǁaedi ge nîra hîkākāhe.

¹³ǂKhaisib Libanonni dib ge sa ǃoa nîra hā, denehais tsî beukhais tsî bushais tsîn hoana, ǃkhais ti ǃanusib disan nî anise; tsî tita ge ǃkhais ti ǂaira disa nîra ǂkhaiǂkhai.

¹⁴ǁKhāti gu ge ǁnān sasa ge ǁgâiǀān ôaga ǃgamǃgâ hâse sa tawa nîra hā; tsî sasa ge ǃkhāǃkhān hoan ge sa aiǃâ nîra ǃhonǁgoa sa ǂaiǃnākha tawa: Tsîn ge sasa ǃKhūb di ǃā, Israeli ǃAnub di Sionse, ti nîra ǂgai.

¹⁵ǁNāxūhe, tsîts khoe-i xa satsa ūǃgû tama ge is kōse ǁkhanhe hâ is di amǃnâs ai ta ge tita satsa nîra ǂnûi ǀamo ǂkhaisise, dâxūse, ǃhaosa xu ǃhaos ǃoa.

¹⁶Tsîts ge satsa daib ǁaedi diba nîra dai tsîts ge samdi gao-aogu dide nîra dai. ǁNāǃnubaits ge nîra ǂan, tita a ǃKhū, sa ǃGâiǃōdī-ao tsî Ore-ao tsî Jakob di ǀGaisata ǃkhaisa.

¹⁷ǂAib amǃnâs ai ta ge ǃhuniǀuriba nîra ūhā, tsî ǂnūǀurib amǃnâs ai ta ge ǀhaiǀuriba nîra ūhā. Tsî haib amǃnâs ai ǂaiba tsî ǀuin amǃnâs ai ǂnūǀuriba, tsî ta ge sa mûǂamaoga ǂkhî kai, tsî doeǁga-aoga nîra ǂhanu-ai kai.

¹⁸ǁGaridī-i xare-i ge ǃaruǀî sa ǃhūb ǃnâ ǁnâuhe tide, tsî hîkākā-i tsî khôaǂkhūǂkhū-i xare-e sa ǀkharigu ǃnâ, xawets ge sa ǂnubiǂgoaga ǃGâiǃōdī-aose tsî sa ǁāga Koas, ti nîra ǂgai.

¹⁹Sores ge ǃaruǀî tsēs ǃnâse ība tsi tide, tsî ǁkhâb ge ǂkhaisase ǃnâba tsi tide, xawe ǃKhūb ge ǀamo ǃnâse nîra ība tsi, tsî sa Eloba sa anixūse.

²⁰Sa sores ge ǃaruǀî ǂgâ tide tsî sa ǁkhâb ge ǂkhari tide: ǃKhūb ge ǀamo ǃnâse nîra ība tsi, tsēdi sa ǃoab didi nîra toa xui-ao.

²¹Tsî sa ǁaes ge hoatsama ǂhanu-aise nîra ī, ǁîn ge ǃhūbaiba ǀamosib kōse ǀumise nîra ūhâ. ǁÎn ge ǂgona-i ti ǂgās di-i ase nîra ī, sîsenai-i ti ǃomkha di-e, tita nî ǂkhaiǂkhaihese.

²²Hoan xa ǂkhari-i, ǁî-i ge nîra ǀoadisi kai, tsî hoan xa ǂkhari-i ge nîra ǀgaisa ǁae kai. Tita ǃKhūta ge nēna ǁaeb ân ai ǃhaese nîra hā kai.