Read Khoekhoegowab Jesajab 61 Bible Online

Jesajab 61 - Khoekhoegowab bible

Jesajab 61

¹Gagab ǃKhūb, ǃKhūb dib ge tita ai hâ, ǃKhūb ge tita ǂkhauǀkhā amaga, ǃgâi ǂhôa-e ta nî tsamtsiǃnâna ūhābaga. ǁÎb ge tita ge sî, khôaǂkhūǂkhūhesa ǂgaoga ūhâna ta nî ǃgae-aibase, ǃkhōsana ta nî ǃnorasasiba ǂgaiǂuibase tsî ǃgaehesana, ǃkhō-omsan nî ǁkhowa-ambahese,

²kurib ǃKhūb ǃgâiǂâibasens diba ta nî ǂgaiǂuise tsēs sida Elob ǀkhaob dis ai tsî ǃoa hân hoana ta nî ǁkhaeǂgaose.

³ǃOa hân Sions din nî ǁāǁābahese, în tsaob amǃnâs ai anixū-e māhe ti, dâǁnui-e ǃoab amǃnâs ai, sarab koas diba ǂōǂōhe hâ gagas amǃnâs ai. Aik-hain ǂhanu-aisib din, ǂgās ǃKhūb disen nî ǂgaihega, ǁîb nî ǂkhaiǂkhaihese.

⁴On ge ǀoro hîǀhuruhe hâ ǃāde nîra ǂnubi, on ge aibekam hîkākāde ǁkhawa nîra ǂnûikhâi; tsî ǁnā hîǀhuruhe hâ ǃādi ǃhaosa xu ǃhaos ǃoa ge hîkākāhe hâ ide.

⁵On ge ǃhaokhoena mâ tsî sadu gūna nîra ǃûi; on ge ǃhaokhoena sadu ǃhanasîsenao tsî sadu ǂauxûiǂûǃhanasîsenaose nîra ī.

⁶Xawe sadu ge ǃKhūb di prister ti nîra ǂgaihe, khoen ge sado sida Elob di ǃgā ti nîra ǂgai. O du ge xūn ǁaedi dina nîra ǂû, o du ge ǁîn di ǂkhaisib ǃnâ nîra koasen.

⁷Sadu taob amǃnâs ai du ge ǀgamǃnâguse nîra hō, tsî taob xan ge ǁîna amǃnâs ân ase nîra dâ; ǁnā-amagan ge ǁîn ǃhūb ǃnâ ǀgamǃnâguse nîra xūxa, ǁîn ge ǀamo dâba nîra ūhâ.

⁸Tita ǃKhūta ge ǂhanuba ǀnam hâ xui-ao; tita ge khauǁguibas ǃnâ ǃnariba ra ǁkhan. Tsî tita nîra dī, sîsenni ân amab ǃnâ nîra hâ ǃkhaisa, tsî tita ge ǁîn ǀkha ǀamo ǃgaeǀhao-e nîra dī.

⁹Tsî ǃkhommi ân ge ǁaedi ǃnâ nîra ǂansa, tsî surib âna ǁaedi ǁaegu. ǁÎna ga mûn hoan ge ǁîna nîra ǂan, surib ǃKhūb xa ǀkhaehe hân a ǁî ǃkhaisa.

¹⁰Tita ge kaise ra ǃgâiaǂgao ǃKhūb ǃnâ; ti ǀoms ra dâ ti Elob ǃnâ ǁîb ge tita saran ǃgâiǃōb dina ge ǂgaeǂgā, tsî anaǂamsarab ǃgâiǃōb dibab ge ǁîba ana te xui-ao, ǃgame-aob ra pristersi anixūba ani khami, tsî ǃgame-aos ra ǁîs di î-îxūna ani khami.

¹¹ǃHūb ra ǁhaon âba ūǀkhī khami, tsî ǃhanab ra ǁîb ǃnâ ra tsorohena ūǀkhī kai khami, ǁnās ǁkhās khamib ge ǃKhūba ǂhanu-aisib tsî koas tsîra ǁaedi hoade nîra ǀkhī kaiba.