Read Khoekhoegowab Jesajab 63 Bible Online

Jesajab 63 - Khoekhoegowab bible

Jesajab 63

¹Tariba ǁnāb, Edomma xu ǀgapi-aihe hâ saran ǀkha ra hāba, Bosrasa xu? ǁNāb, sarab âb ǃnâ ra anna, kai ǀgaib âb ǃnâ ra ǃgûba? Tita ge ǁî ta, ǂhanu-aise ra ǃhoa ta, oresa a ǁkhā ta.

²Tare xū-i ǃaromab kha sarab âtsa a ǀapa, tsî sa sarana tarexan kha ǀguib dāǃnâǃoreba ra dāb din khami ī?

³Tita ge dāǃnâǃoreba ǀguri gere dāǃnâ; tsî khoe-i xare-i ǁaedi di-i ge tita ǀkha hâ tama ge hâ i. Tsî tita ge ǁîna gere dāǃgâ ti ǁaib ǃnâ, tsî ta ge ǁîna gere dāǂkhūǂkhū ti ǁgôasib ǃnâ; ob ge ûib ǀaob âna ti sarana ge ǀgapi-ai, ob ge ti sarab hoaba ǀuriǀurihe hâ.

⁴Tsēs ǀkhaob dis ge ti ǂgaob ǃnâ hâ i, tsî kurib ti oresan dib ge hā xui-ao.

⁵Tsî kōnǃgâ ta ge, xawe hui-ao-i xare-i ge a ǀkhai, o ta ge ge burugâ, khoe-i hîa nî mâǃgâ te-i a ǀkhai ǃkhaisa; ǁnā-amagab ge ti ǁôaba tita ge hui, tsî ti ǁgôasib ge tita ge mâǃgâ.

⁶O ta ge ǁaede ge dāǃgâ ti ǁaib ǃnâ; o ta ge ǁîna ge āǁō kai ti ǁgôasib ǃnâ, o ta ge ǀgaib âna ǃhūb ai ge ǁhōǁgui.

⁷Tita ge ǀkhomxaǃnâsigu ǃKhūb digu xa ǂguiǃnâgusa koas ǃKhūb dis xa nîra ǂâi kai, ǁnān, ǃKhūb ge ǁgau dan hoan ǃoa, tsî kai ǃgâisib Israeli ommi dib ǁînab ge ǁgaub, ǀkhomxaǂgaosigu âb ǃoa tsî ǃgâisigu âb di ǂguib ǃoa.

⁸ǁÎb ra: Ti ǁaes ge ǁîsa, tsî ti ôan ǂhumi tidena, ti mî xui-ao. Nētib ge ge ǁîn di ǃGâiǃōdī-ao kai.

⁹ǁÎn ǂōǂōb hoab ǃnâb ge ǁîba ge ǂōǂōhe, tsî ǀhomǃgāb ais âb dib ge ǁîna ge sâu: ǁÎb ǀnammi tsî ǁîb ǀkhommi tsîkha ǀkhab ge ǁîba ǁîna ge ore; tsî ǁîb ge ǁîna ge ūkhâi, tsî ǁîb ge ǁîna ge tani, aibekam tsēdi hoade xu.

¹⁰Xawe ǁîn ge ge mâǃoaxa, tsî ǁîn ge ǃAnu Gagaba ge ǃoaǃoa: ǁNā-amagab ge ǁîba ǁîna ge khākhoe kaiba; ǁîb ǂûb ge ǁîna ge ǃkhamū.

¹¹ǃNubaib ge ǁîba aibekam tsēdi Moseb didi xa ge ǂâi: Mapab nēsi hâ ǁnāb, huriba xu ǁîna gūn âb di ǃûi-aob ǀkha ge ǂgaeǂguiǃapaba? Mapab nēsi hâ ǁnāb, ǃAnu Gagab âba ǁîn ǁaegu ge ǂnûiba?

¹²ǂKhaisib âb di ǁôaba Moseb di amǀkhāb ai ge ǃgû kaiba, ǁgamga ǁîn aidi aiǃâ ge ǃkhāǃāba, ǀamo ǀonsab nî dībasenga,

¹³ǃgamga-ū ǁîna ge ǂgaeǂguiba, hā-i ǃgaroǃhūb di-i khamin ge ǃnôa tama is kōse?

¹⁴ǀGoa-i ǃgoaǃnāgu ǃnâ ra ǁgôa-i khamib ge Gagab ǃKhūb diba ǁîna sâba ge mā. Nētits ge satsa ǁaes âtsa ge ǂgaeǂgui, ǂkhaisa ǀonsats nî dībasenga.

¹⁵ǀHomma xu kōǁgôa îts mû sa ǂkhaisa tsî ǃanu ǁanǃkhaiba xu. Mapa gu kha hâ sa ôasasib tsî sa ǁkhāsib tsîga? Āb ǃnāxūn âts dib tsî sa ǀkhomxaǂgaosigu diba; ǁîn ra ūdawasen tita xu.

¹⁶Xawe sats ge a sida di Î. Abrahammi ge sida a ǀū, tsî Israeli ge sida ǂan tama hâ; sats ǃKhūts ge a sida di Î, sida di Ore-ao, tits ge satsa ǀon hâ hugasa xu.

¹⁷ǃKhūtse tarexats ra satsa daogu âtsa xu ǁhapu kai da? Tarexats ra ǂgaob âda karokaro, satsa da ǃao tidega? Oa re sa ǃgāgu ǃaroma ǃhaodi sa ǀumis didi ǁga.

¹⁸Sa ǃanu ǁaes ge ǁîsa ǂkhari ǁaerob ǀguib kōse ge ūhâ i, sida mâǃoasaben ge sa ǃanusiba ge dāǀguriǃnâ.

¹⁹Sida ge ǁnān, sats xa hugasa xu gaoǂamhe tama ge hâ in tsî sa ǀons ǀkha ge ǂgaihe tama hâ in khami ge ī kaihe.