Read Khoekhoegowab Jesajab 64 Bible Online

Jesajab 64 - Khoekhoegowab bible

Jesajab 64

¹Ae, ǀhomgats ga koma ǀkhauǃā tsîts ga ǁgôaxao, î gu ga ǀhomga sa ais aiǃâ tsuni.

²Tsunitsuniǀaes ra khau khami tsî ǀaes ra ǁgamga ǀgû kai khami, ǀons âtsats nî sa mâǃoasabena ǂansa kaibase, a di ǁaede ǁnās ǁkhās xase sa ais aiǃâ ǀkhū!

³ǃAoǃaosa xūn ǃâubasen tama da ge hâ inats ge dī ǃnubaits ge ǁgôaxa, o gu ge ǃhomga sa ais aiǃâ ge tsuni.

⁴Ā, hugasa xu i ge ǁnâuhe tama tsî ǂgaedi ǀkha ǁnâuǃāhe tama, tsî mû-i ǀkha mûhe tama ge hâ i, sats Elots oseb hâsa, xūna ǁnāb ǁîba ra ǃaoǃgâba nî dībaba.

⁵Sats ra ǃoa ǁnāb ǃgâiaǂgao hâb tsî ǂhanu-aisiba ra dība, ǁnān, sats xa sa daogu ai ra ǂâina. Mû, sats ge ǁaixa ge hâ i, sida gere ǁore amaga: ǁÎ ǃkhais ǃnâb ge ǀamosiba hâ, sida nî sâuhega.

⁶Xawe da ge sida hoada ǀurisa-i khami ī, tsî sida ǂhanu-aisigu hoagu ge aoxūhesa anu sara-i khami ī; sida hoada ge ra ǁnā hais ǂnare-i khami, sida di dīsādi xa da ge ǂoab xas axase ra doeǁgabēhe.

⁷Tsî khoe-i sa ǀonsa ra ǂgaiǀî-i xare-i ge a ǀkhai, khoe-i hîa ga ǃgariǃgarisen-e satsa i nî ǃkhōse, sats ra ais âtsa sida xu gaugau xui-ao, tsî sats ra sida tsunitsuni sida ǂhanuoǃnâsigu ǃaroma.

⁸Xawe nēsi, ǃKhūtse, sats ge a sida di Î. Sida ge a ǂgoa, tsî sats ge a sida di sūǂnubi-ao; tsî sida hoada ge a sa ǃommi di sîsenai.

⁹ǃKhūtse, tā nētikōse ǁaixa re, îts tā ǀamose ǂâi re ǂhanuoǃnâsigu xa; kō îts kōǀî re, sida hoada ge a sa ǁae.

¹⁰Sa ǃanu ǃādi ge ge ǃgaroǃhū kai; Sions ge ge ǃgaroǃhū kai, Jerusalems ge ge ǃū-aisa ǃkhai kai.

¹¹Sida di ǃanu tsî ǂkhaisa ommi, sida în ge satsa ǁîb ǃnâ koab, ǁîb ge ge khauǃkhūhe, tsî ǃgâiba da xūn hoan ge hîkākāhe hâ.

¹²ǃKhūtse ūdawasents kha nî nē xūn ǃaroma? ǃNōts kha nî satsa tsî nētikōsets kha nî ǁgâiǀā da?