Read Khoekhoegowab Jesajab 65 Bible Online

Jesajab 65 - Khoekhoegowab bible

Jesajab 65

¹Tita ge ge hōhe ǁnān tita dîǃgâ taman xa; tita ge ge hōhe ǁnān tita ôa taman xa. ǁNā ǁaes, ti ǀons ǀkha ǂgaihe tamas ǁga ta ge tita: Nē ta ge hâ, nē ta ge hâ, ti ge mî.

²Tita ge ti ǃomkha tsēs hoasa ge khoraǂui mâǃoaxa ǁaesǀî. ǁNān, daob hîa ǃgâi tamab ai ǁîn ra ǂâixase ra ǃgûnǀî;

³ǁaes, hîa tita hugaǀgui ti ais ǃnâ ra ǂoeǂoesa, ǃhanagu ǃnâ ra ǁguibaǃâ tsî ǁganǀuidi ai ra ǀanǀanǃâ;

⁴ǀhobadi tawa ǂnû tsî ǁnān hîa ra sâuhen ǀkha ra hâǁgoaǃâ; hāgūn di ǁgan-e ra ǂûǃâ, tsî ǁgaiǁgaisa xūn di tsāb ge xapadi ân ǃnâ hâ;

⁵ǁnān hîa: ǁNāpa hâbasen, îts tā ǀgū te, sats xa ta a ǃanu xuige ti ra mîna. Nēn ge ǀanni khami ī ti ǂguis ǃnâ, ǀaes hoaraga tsēsa ra khaus khami.

⁶Mû, nēs ge ti ais aiǃâ xoahe hâ: Tita ge ǃnō tide, tita ge nî mādawa-am; ā, ǁîn di tîǂams ǃnâ ta ge tita nîra mādawa-am,

⁷sadu ǂhanuoǃnâsin tsî sadu îgu di ǂhanuoǃnâsin tsîn hoana tib ra ǃKhūba mî. ǁÎgu ǃhomgu ai ge ǀanǀangu tsî tita ǃnomdi ai ge ǀaogu, ǁnā-amaga ta ge ǁîn di aibekam amǃnâsa ǁîn tîǂams ǃnâ ǁkhawa nîra ǀnō.

⁸Nētib ra ǃKhūba mî: ǂKhon ǂauxûibats ga ǂauxûiǂûhais ǂû-i ǃnâ hō, on ra: Tā ǁî-e hîkākā ǀkhae-i ǁî-i ǃnâ hâ xuige, ti mî khami, ǁnās ǁkhās khami ta ge ti ǃgāgu ǃaroma nîra dī; hoatsama gu tita xa hîǀhuruhe tidega.

⁹Tsî tita ge Jakoba xu ǃkhomma nîra ūǀkhī, tsî Judaba xu ti ǃhomgu di ǀumi-aoba; tsî ti ǃkhōǂuisaben ge ǁîga ǀumise nîra ūhâ, tsî ti ǃgāgu ge ǁnāpa nîra ǁan.

¹⁰Saronni ge nîra gūǃhara kai, tsî ǃgoaǃnāb Axori dib ge ti ǁaes, tita ge ôasa nî ǀaru kaiba.

¹¹Xawe sadu ǃKhūba ra ǁnāxūdo, sadu, ti ǃanu ǃhomma ra ǀurudo, sadu, ǁnā ǂnubisa tāba ra ǁāǁābado, tsî sadu, ǁnā habasa xûiba ra ǂnâǀoaǀoabado:

¹²Tita ge sadu ona gôaba nîra ǃgôaba, hoatsama du nî ǂāǃnaoba ǃgambahes kōse; tita ge ǂgai, xawe sadu ge ǃeream tama hâ xui-ao, tita ge ǃhoa, xawe sadu ge ǃgâ tama hâ, tsî ti mûǁae a ǂkhabana gere dī tsî tita ǃgâiba tamana du ge ǁhûiǂuibasen amaga.

¹³ǁNā-amagab ra ǃKhūb ǃKhūba nēti mî: Mû, ti ǃgāgu ge nîra ǂû, xawe sadu ge nîra ǃâ; mû, ti ǃgāgu ge nîra ā, xawe sadu ge nîra ǁgâ; mû, ti ǃgāgu ge nîra ǃgâiaǂgao, xawe sadu ge nîra tao.

¹⁴Mû, ti ǃgāgu ge ǃgâiaǂgaoba xu nîra dâ, xawe sadu ge tsûaǂgaoba xu nîra ǃau, tsî khôaǂkhūs gagas disa xu du ge nîra ā.

¹⁵Tsî du ge sadu di ǀonsa ti ǃkhōsabena nūse nîra ǁnāxūba; tsî ǃKhūb ǃKhūb ge sado nîra ǃgam, xawe ǁîb di ǃgāgab ge ǁîba ǀkhara ǀons ǀkha nîra ǂgai.

¹⁶O i ge ǁnā-i ǃhūbaib ai ga ǀkhaesen ǂgao-i hoa-e Elob amab dib ǃnâ nî ǀkhaesen; tsî ǃhūbaib ai ga nū-i hoa-i, ge Elob amab dib tawa nîra nū, aibekam ǂōǂōsigu ǀuruhe hâ amaga, tsî ǁîgu ge ti mûsa xu kā amaga.

¹⁷Tsî kō tita ge ǀasa ǀhommi tsî ǀasa ǃhūbaib tsîga ra kuru, tsî aibekam xūn xa i ge ǃaruǀî ǂâihe tide, tsîn ge ǂgaob ǃnâ khâi tide.

¹⁸Xawe sado, ǃgâiaǂgao î du dâ ǀamosib kōse ǁnān tita ra kurun ǃnâ; kō tita ge Jerusalemsa dâ-e ra kuruba, tsî ǁaes âsa ǃgâiaǂgao-e.

¹⁹Tsî tita ge Jerusalems ǂama nîra dâ tsî ti ǁaes ǂama ǃgâiaǂgao; tsî ǁîs ǃnâ i ge ǃaruǀî ǁnâuhe tide dommi ās dib tsî dommi ǃaus diba.

²⁰ǁNā ǃnūba xu i ge ǃaruǀî dai ra-i ǀoro tsērode ūhâ-i tsî kaira-i, tsēdi â-e ǀoaǀoa tide-e hâ tide: ǂKhamkhoeb ge ǀguikaidisi kurixase nîra ǁō; tsî ǁore-aob ǀguikaidisi kurixab kao nîra ǀâxarexuhe xui-ao.

²¹Tsîn ge omde ǂnubibasen tsî ǁîde nîra ǁanǃnâ, tsî ǂauxûiǂûǃhanaga ǂgābasen, tsî ǂûn âgu xa nîra ǂû.

²²ǁÎn ge ǂnubi tide, naub xa i nî ǁanǃnâhese, ǁîn ge ǂgā tide, naub xa i nî ǂûhese. Tsēdi ti ǁaes didi tsēdi hais didi khami nîra ī xui-ao; tsî ti ǃkhōǂuisaben ge sîsenni ǁîn ǃomgu diba nîra sîsenūtoa.

²³ǁÎn ge ǁause sîsen tide tsî hîkākāsa ǁoraba tide; ǁîn ge ǃkhommi ǃKhūb ǀkhaehesan diba xui-ao, tsî surib ân ǁîn ǀkha.

²⁴Tsî i ge nîra ī, ǁîn ǂgai tamas aiǃâ ta nîra ǃeream ǃkhaisa; ganupen ra ǃhoa hîa ta nîra ǁnâu ǃkhaisa.

²⁵ǂHiras tsî ǁkhaob tsîra ge nîra ǀguipa ǃû, tsî xammi nî gomab khami ǀgâǃû ǃkhaisa, tsî tsarab nî ǀaob di ǂûse ī ǃkhaisa. ǁÎn ge tsū xū-i xare-e dī tide tsî ǁgaoǁgao-i xare-e dī tide ti ǃanu ǃhommi hoab ai, tib ra ǃKhūba mî.