Read Khoekhoegowab Jesajab 66 Bible Online

Jesajab 66 - Khoekhoegowab bible

Jesajab 66

¹Nētib ra ǃKhūba mî: ǀHommi ge a ti tron, tsî ǃhūbaib ge a ti ǂaira di dā-aiǃnao. Mati ī omma kha nî ī, sadu nî tita ǂnubibaba? Tsî mâsa kha ti sâb di ǃkhai?

²Ti ǃommi ge nē xūn hoana gere dī, tsî nē xūn hoan ge ī ge i, tib ra ǃKhūba mî. Xawe nēn ai ta ge tita nîra kō: ǀGâsa-i tsî khôaǂkhūhesa gagasa ūhâ-i, tsî ti mîs aiǃâ ra ǀkhū-i ai.

³Gomaba ga ǂā-i ge aoba ra ǃgam-i axase ī, ǁkhao-e ga ǁguiba-i, ǁnā-i ge ari-e ra khôaǃao-i axase ī; ǂûǁguiba-e ga ǁguiba-i, ǁnā-i ge hāgūǀaoba ra ǁguiba-i axase ī, wiroka ga ǂâiǂâisenǁguibase ǁguiba-i ǁnā-i ge ǁgôa-elo-e ra ǀkhae-i axase ī. Nēn on ge daogu âna ǃkhōǂuibasen hâ, tsî ǀoms ân ge ǁgaiǁgaisan ân ǃnâ ra ǃgâiǃgâisen.

⁴Tita on ge nî ǁhûiǂuibasen ǁîn dīgu di amǃnâsa, tsî ǁîn ǃaoba ta nî ǁîn ǂama hā kai, tita ge ǂgai, xawe khoe-i xare-i ge ǃeream tama ge i, tita ge ǃhoa, xawen ge ǁîna ǃgâ tama hâ. Tsî ti mûǁae a ǂkhabanan dī, tsî tita ǂgao tamanan ge ǃkhōǂuibasen amaga.

⁵ǁNâu du re ǃKhūb di mîsa, sadu mîs âb aiǃâ ra ǀkhūdo. Sadu ǃgâsagu sado ra ǁkhangu, hîa sado ǃnūse ti ǀons ǃaroma ra aoxūgu ge: Ab ǃKhūba ǂkhaisa, ti ra mî. Ob ge ǁîba nîra ǂhai sadu di ǃgâiaǂgaose, xawe ǁîn ge nîra taotaohe.

⁶Dommi kai ǂkhupib dib ge nîra hâ ǃāsa xu, dommi tempela xu! Dommi ǃKhūb dib, ǁîb di khākhoena amǃnâs âna ra matareba.

⁷ǁOratsû-es ūhâ tamas aiǃâs ge ge ǁora; tsûb hāǂam si tama hîas ge ǀgôaroba ge hō.

⁸Tari-e ǁnāti ī xū-e ǁnâu hâ? Tari-e nēti ī-e mû hâ? ǃHū-e kha xare ǀgui tsēs ǀguis ai ǃnae ǁkhā i a? ǁAe-e kha xare ǀgui ǃnās ǀguis ai ǁorahe ǁkhā i a? Xawes ge Sionsa tsûga hō tsî ǁîs ôana ge hō.

⁹Tita hîa ǁgûsa ra ǁkhowa-amta kha ǁnâi ǀkhī kai ta tide? tib ra ǃKhūba mî; tita hîa ra ǁora kai ta kha ǁnâi ǂganam ta nî? tib ra sa Eloba mî.

¹⁰ǃGâiaǂgao re Jerusalems ǀkha, î du ǁîs ǂama dâ, sadu ǁîs ǀnamsabedu hoado; î du dâb ǀkha ǁîs ǂama ǃgâiaǂgao, sadu ǁîs ǂama ge ǃoa hâ idu hoado.

¹¹Dai tsî du nî ǁâse samra ǁîs di ǁkhaeǂgaodi dira xa; daiǂui tsî du nî ǃgâiǃgâisenga ǂkhaib ǁîs ǂkhaisib dib xa.

¹²Nētib ǃKhūba ra mî xuige: Mû, tita ge ǂkhîba ǃāb axase ǁîs ǂama nîra hā kai, tsî ǂkhaisib ǀūben diba dâuǂam ra ǃārob axase; ǃnubai du ge nîra dai, o du ge ǁîs di ǂhoweb ai nîra tanihe, o du ge ǁgoakha ai nîra o-ohe.

¹³ǀGui-i ǁgûs xa ra ǁkhaeǂgaohe-i axase ta ge tita sado nîra ǁkhaeǂgao; ā, Jerusalems tawa du ge nîra ǁkhaeǂgaohe.

¹⁴Tsî du ge ǁî ǃkhaisa nîra mû, tsî ǂgaob âdu ge nîra ǃgâiaǂgao, tsî sadu ǂkhōgu ge nîra ǀomkhâi ǃam ǂkham ǀgâb khami; ǃnubaib ge ǃKhūb di ǃomma nîra ǂansa ǁîb di ǃgāgu tawa, tsî ǁîb ge khākhoen âba nîra ǁaixaǂam.

¹⁵Mû, ǃKhūb ge ǀaes ǀkha nîra hā, tsî kunidi âba sare-i khami; ǁaib âbab nî ǁgôasib ǀkha mādawa-amga, tsî ǃkhâis âba ǁhabugu ǀkha.

¹⁶ǀAes ǀkha tsî ǁîb gôab ǀkhab ǃKhūba ǁgans hoasa nîra ǀgoraǃgâ xui-ao, tsî ǃgamhesan ǃKhūb din ge nîra ǂgui.

¹⁷ǁNān, ǁî-aitsama ra khaisenn tsî ǁî-aitsama ra ǃanuǃanusenn ǃhanagu ǃnâ ǀguib khaoǃgâ ǁaegub ân ǃnâ, ǁnān, hāgūǁgan-i tsî ǁgaiǁgaisan tsî durun tsîna ra ǂûn, ǁîn ge nîra hapuhe tib ra ǃKhūba mî.

¹⁸Tita ge sîsengu ân tsî ǂâidi âna a ǂan, o i ge nîra hā, tita ǁaedi tsî namdi tsîn hoana nîra ǀhaoǀhao ǃkhaisa, on ge ǁîna hā tsî ti ǂkhaisiba nîra mû.

¹⁹Tsî tita ge sao-e ǁîn ai nîra ǂnûi tsî ǁnān ǁîn din, hîa nî ûin, ǁîna ta ge tita ǀūben ǃoa nîra sî Tarsib tsî Puti tsî Ludi din, khāǁkhâu-aon ǃoa, Tubali tsî Javanni tsîkha din ǃoa, ǃnūse ǁgoe ǃnāǃnuidi din, ti gomma ǁnâu taman tsî ti ǂkhaisiba mû taman ǃoa, tsîn ge ti ǂkhaisiba ǁaedi ǃnâ nîra aoǁnâ.

²⁰Tsîn ge sa ǃgâsan hoana ǁaedi hoade xu ǃKhūba ǂûǁguibase nîra ūhāba, hān ai tsî kunidi ai tsî tanixūdi ǃnâ tsî hā-eseln ai tsî ǁgaisise ra ǃkhoe xūn ai ti ǃanu ǃhommi ǃoa Jerusalems ǁga, tib ra ǃKhūba mî, Israeli ôan ǂûǁguibasa ǃanu xapa-i ǃnâ ǃKhūb di ǃommi ǃoa ra ūhā khami.

²¹Tita ge ǁkhāti ǁîna xu ǀnîna pristerse tsî Leviǁîse nîra ū, tib ra ǃKhūba mî.

²²ǁNā ǀasa ǀhommi tsî ǁnā ǀasa ǃhūbaib tsîkha, tita nî dīkha, ti ais aiǃâ nîra mâ khami, tib ra ǃKhūba mî, ǁnās ǁkhās khami ra ge sadu ǃkhommi tsî sadu ǀons tsîra nîra mâ.

²³Tsî i ge nîra ī, nē ǂkham ǁkhâba xu nau ǂkham ǁkhâb ǃoa tsî nē sâtsēsa xu nau sâtsēs ǃoas ǁgans hoasa nîra hā ǃkhaisa, ti ais aiǃân nî ǀgoreǀîse, tib ra ǃKhūba mî.

²⁴Tsîn ge nîra ǂoa, tsîn ge ǁō hâ sorodi ǁnā khoen, ti ǃoagu ge ǃûǂamn dide nîra mû; ǁîn ǂunib ǁō tide, tsî ǁîn ǀaes ǀari tide xui-ao, tsîn ge ǁgans hoasa ǁgaiǁgaixūse nîra ība.