Read Khoekhoegowab Jesajab 7 Bible Online

Jesajab 7 - Khoekhoegowab bible

Jesajab 7

¹Tsî i ge Axasi, Jotammi ôab, Usiab ôab, Judab gao-aob di tsēdi ǃnâ ge ī, Resinni, Siriab di gao-aob, tsî Pekab, Remaliab ôab, Israeli gao-aob tsîkha ge Jerusalems ǃoa ǃapa ǃkhaisa, torodī-ū sī nîse; xaweb ge ǁîba ǁîsa ǃkhamdā ǁoa ge i.

²Ob ge Davib omma ge ǂhôahe tsî: Siriaǁîn ra ǂhomisen Efraimmi ǃoagu, ti ge mîbahe; ǃnubaib ge ǁîb di ǂgaob tsî ǁaes âb on di ǂgaoba ge gon, haidi ǁoes didi ǂoab ǃnâ ra gon khami.

³Ob ge ǃKhūba Jesajab ǃoa ge mî: ǂOa îts Axasa ǃgûǃoa, sats tsî sa ôab Sear-Jasub tsîkho dâu ra ǁgammi di daob ǀgapise ǁgoe ǁgamǁgorob di ǀams ǀgapi daob, Ananaob di ǃhanab dib tawa.

⁴Îts ǁîb ǃoa mî: ǂAnbasen îts sâ, tā ǃao, îts tā ǂkhabuǂâi ǁnā ǀgam ǂarekha disiǀgamǀan ra ǃamamǀaera dikha xa, Resinni, Siriab gao-aob di ǁaib, tsî Remaliab ôab dib ǃaroma.

⁵Siriaǁîb ge ǂkhabase satsa ge ǂâibasenū amaga, Efraimmi tsî Remaliab ôab tsîkha ǀkha, mî raǃâ:

⁶A ge ǃapa Judab ǃoagu, î ge ǁîba ǂōǂō, î ge ǁîba sage ǃnâ ǀgora, î ge Tabeali ôaba gao-aodī ǁîn ǁaegu.

⁷Nētib ra ǃKhūb ǃKhūba mî: ǃKhai-i ge mâhō tide, tsî i ge ǃnae tide,

⁸tsî Damaskus ge Siriab di danase nîra ī, Resinni a Damaskus di danase. Tsî ganupe ǃnanidisikoroǀa kurigu ǃnâb ge Efraimma nîra khôahe, on ge ǁae tamase nîra ī.

⁹Tsî Samarias ge Efraimmi di danase nîra ī, tsî Remaliab ôaba Samarias di danase. ǂGom tama du ka io, o du ge mâǁapo tide.

¹⁰ǃAruǀîb ge ǃKhūba Axasi ǁga ǃhoa tsî ge mî:

¹¹Sao-e ǂganbasen ǃKhūb sa Eloba xu, ǂganbasen ǃnagab ǃgammi ǃnagas ka xawe, ǂganbasen ǀgapiseb ǃnâs ka xawe.

¹²Xaweb ge Axasa ge mî: Tita ge ǁî-e ǂganbasen tide, ǃKhūba ta ǃâitsâ tidega.

¹³Ob ge ge mî: ǁNâu sadu Davib ommi dido: ǂÂuba du tama ǃkhaisa kha khoena du ra ǀhupuǀhupusa, o du ti Elob ona nî ǀhupuǀhupu?

¹⁴ǁNā-amagab ge ǃKhūba ǁî-aitsama sado sao-e nîra mā: Mû, ǂkhamkhoes ge nîra ǀgamǀkhā, tsîs ge ǀgôaba nîra ǁora tsî ǁîba Imanuel ti nîra ǂgai.

¹⁵Ora ǁnuib tsî danib tsîkhab ge nîra ǂû, ǂkhababa aoxūs tsî ǃgâiba ǁhûiǂuibasensab nîra ǂans kōse.

¹⁶Amase, nē ǀgôarob ǂkhababa aoxūs tsî ǃgâiba ǁhûiǂuibasensa nî ǂans aiǃâb ge ǁnā ǃhūb, ǁîb di ǀgam gao-aokha xats ra ǃaoba nîra ǁnāxūhe.

¹⁷Xawe ǃKhūb ge sats ǂama, tsî sa ǁaes ǂama, tsî sa îb di ommi ǂama, tsēde nîra hā kai, ǁnāti īdi hā tama hâ ge ide, ǁnā tsēs Efraimmi ǁîs ai Judaba xu ge ǁnāǁgôasa xu: Gao-aob Asiriab diba xu.

¹⁸Tsî i ge ǁnātsē nîra ī, ǃKhūb ǁnā ǀgînadi Egipteb ǃāgu di ǀams tawa hâdi, tsî ǁnā ǃhabugu Asiriab di ǃhūb ǃnâ hâgu tsîna nîra ǂnamhā ǃkhaisa.

¹⁹On ge nîra hā, tsîn ge hoatsama nîra sâ ǃū-aisa ǃgoaǃnāgu ǃnâ, tsî ǃhaogu di ǁhāgu ǃnâ tsî ǁkhūǃharadi hoadi ǃnâ, tsî ǃgâi ǃûǃkhaidi hoadi ǃnâ.

²⁰ǁNātsēb ge ǃKhūba ǃgaehe hâ ǂkhomgôas, ǃāb nauǃanib dis ǀkha Asiriab di gao-aoba xu nîra ǂkhomǁnâ danas tsî ǀûn ǂaidi din tsîna, ā, ǀhō-ams onas ge nîra ūbēǃari.

²¹Tsî i ge ǁnātsē nîra ǃnae, khoe-i ga ǀgui tsâusa ûib ǃnâ ūhâ hâo, tsî ǀgam gūra,

²²o i ge nîra ī, ǁnā ǀoasa daib, ǁîn tawab nî hōb xab ora ǁnuiba nîra ǂû ǃkhaisa; ā, ǃhūb di ǁaegub ǃnâ ga ǃgau-i hoa-i, ǁnā-i ge ora ǁnuib tsî danib tsîkha nîra ǂū.

²³Tsî i ge ǁkhāti ǁnātsē nîra ī, mâ ǃkhai-i ǀoadisi ǂauxûiǂûhaidi ge mâ i-i hoa-i ǀoadisi ǀhaiǀurimarina ūhâ-i nîra ǁkhū tsî ǀgami kai ǃkhaisa.

²⁴ǂĀgu tsî khās tsîn ǀkhats nî sats khoetsa ǁnāpa sīs kōse, ǃhūb hoab ǁkhū tsî ǀgami ǀgui xui-ao.

²⁵Tsî ǁnā ǃhomgu khao-ūxūn ǀkha ra khaohegu on tawan ge khoena sī tide, ǁkhūn tsî ǀgamin tsîna ǃaob xa, tsî gu ge nîra gomab di ǃûǃkhai tsî ǀgoan xa ra dāǂkhūǂkhūhe ǃkhai kai.