Read Khoekhoegowab Jesajab 8 Bible Online

Jesajab 8 - Khoekhoegowab bible

Jesajab 8

¹ǃAruǀîb ge ǃKhūba tita ǃoa ge mî: Ū kai ǀuiǂgapa-e, îts ǁî-i ai khoe-i di grifis ǀkha xoa: ǃNaris ǃoa a ǃhae, ǁkhâuǁnâsa a ǃnoesaba.

²ǃNubai ta ge îǂhôa ǀhûǀguitimî-aokha ge ū, Uriab, pristeri, tsî Saxariab, Jeberexjab ôab tsîkha.

³Tsî ta ge kēbo-aosa ge ǀgū, os ge ǁîsa ǀgamǀkhā tsî ǀgôaba ge ǁora. Ob ge ǃKhūba tita ǃoa ge mî: ǀOns âba Maher-Salal-Has-Bab ti ǂgai.

⁴ǀGôarob: Ti îtse, tamas ka io: Ti îse, ti ǂgai ǁkhā tama hîan ge khoena ǃkhūsib Damaskus dib tsî ǁkhâuǁnâs Samarias dis tsîna nîra tani Asiriab gao-aob di ais aiǃâ.

⁵Tsî ǃKhūb ge ǃaruǀî tita ǃoa ge mî:

⁶Nē ǁaes ge ǁgamgu Siloams digu ǂause ra dâuga ra ǃharaxū, tsî Resinni tsî Remaliab ôab tsîkha ǃnân ge ǃgâiaǂgao hâ amaga.

⁷ǁNā-amaga mû, ob ge ǃKhūba ǁîna nîra hāǂam kai ǁnā ǀgaisa tsî ǁgarisa ǁgamgu ǃāb diga, Asiriab di gao-aob tsî ǁîb di ǂkhaisib tsîkha. Ob ge ǁîb di ǃarogu hoaga nîra dâuǂam, tsî amǃgâkha âb hoakha nîra ǃnā.

⁸Tsîb ge Judab kōse nîra ǃgûsī, ǁîb ge ǁîba nîra dâuǂam tsî ǃnā, tsîb ge ǃaob kōse nîra sī. Tsî ǁgabokha âb di ǃāǂuidi ge ǂhabasib sa ǃhūb diba nîra ǀoaǀoa, Imanueltse.

⁹ǃGaeǀhaosen, saso ǁaeso, xawe du ge nîra khôahe; ǁnâu sadu ǃnū ǃhūgu ǃnâ hâdu hoado, ǃgaesen, xawe du ge nîra khôahe! ǃGaesen xawe du ge nîra khôahe.

¹⁰ǀApe-ai-e ǀapeǀape, xawe i ge nîra ǁauǁauhe, mî-e ǃhoa, xawe i ge mâhō tide, Elob sida ǀkha hâ xui-ao.

¹¹Nētib ge ǃKhūba tita ǁga ge mî, ǀgaisa ǃommi ǀkha, tsî ǁîb ge tita ge ǁgau, nē ǁaes di daob ai ta ǃgû tide ǃkhaisa, mî raǃâ:

¹²Sadu ge: ǃGaeǀhaosen-i ge nē-e ti mî tide. Nē ǁaes ra mâ ǃkhai-i hoa-i xa: ǃGaeǀhaosen-i ge nē-e ti mî, xawe ǁîn di ǃaoba tā ǃao î du tā ǃhuri.

¹³ǃKhūb ǂnubidi dib, ǁîba du ge nî khai, îb ǁîba sadu di ǃaose, îb sadu di ǃhurise ī.

¹⁴ǃNubaib ge ǁîba sado nîra ǃanusi kaiba, xaweb ge ǁgonǁgonǂgaoǀuise tsî ǃnôas di ǃhaose nîra ība ǁnā ǀgam omkha Israeli dikha, ǂhamse tsî ǀûise Jerusalems di ǁansabena.

¹⁵Tsî ǂguin ân ge ǃnôa tsî nîra ǁnā, tsî khôahe tsî nîra tamisen, tsî nîra ǃkhōhe.

¹⁶ǃGae-am ǃkhō-amsa, ǂganamǀgaiǀgai ǂhanuba ti ǁkhāǁkhāsaben ǃnâ.

¹⁷ǁNā-amaga ta ge ǃKhūb, ais âba Jakob di ommi aiǃâ ra gaugauba nî ǃâu. Ā, ǁîba ta ge nî ǃâu.

¹⁸Mû, tita tsî ǁnā ǀgôan, ǃKhūb ge tita mān, tsîda ge saose tsî buruxa dīse ī Israeli ǃnâ, ǃKhūb ǂnubidi dib, Sionǃhommi ai ǁan hâba xus ge nēsa ge ī.

¹⁹Tsî sadu ǃoan ga mîo: Aimûǀgaru-aon tsî ǁgâua ǁāǁāǁkhāsaben hîa ǀhoeǃhoa tsî ams ǃnâ ra ǃhoana dî, ǁae-e kha ǁîn di Eloba dî i tide? ǁNâi ûitsaman di amǃnâs ain ǁō hâna nî dî?

²⁰ǂHanub tsî ǀhûǀguitimîs tsîra ǃoa! Nē mîs ǃoan ga ǃhoa tama io, o i ge nîra ī ǁgoaǂnobo-en ūhâ tide ǃkhaisa.

²¹O i ge mâ-i hoa-i âna nîra ǃhūba ǃgûǃganu tsûaǂgao tsî ǃâ hâse, o i ge nîra ī, ǃâ i ga on ge kaise ǁaixa, tsî ǁî-i di gao-aob tsî ǁî-i di Eloba nîra ǀâxare, ǁnāǃnubain ge nî kōǃapa.

²²ǃHūba i ga kōǀîo, mû, o kha ge ǂōǂōsib tsî ǃkhaenab tsîkha nîra hâ, o i ge ǃaob xa nîra ǃkhae tsî ǃkhaenab xa nîra doeǁgabēhe.

²³Xawe ǁnā ǃkhai-i, ǂōǂōhe hâ ge i-i, ǁî-i ge ǃkhaeǃari tide; ǁîb ge ǁî-i ǂguro ǃharaxūsase dī khami Sebulonni di ǃhūba xu tsî Naftalib di ǃhūba xu, ǁnās ǁkhās xaseb ge ǁîba ǀunis ai ǁî-e ge ǂkhaisa kai huribǀî garu daob ai, ǁnā ǃhūb Jordanǃāb nauǃani ǁgoeb, ǀūben di Galileab tawa.