Read Khoekhoegowab Jesajab 9 Bible Online

Jesajab 9 - Khoekhoegowab bible

Jesajab 9

¹ǁNā ǁaes ǃkhaenab ǃnâ ra ǃgûs, ǁîs ra kai ǃnâ-e mû; ǁnān ǁōb sommi di ǃhūb ǃnâ ǁan hân, ǁîn ǂamab ge kai ǃnâba go ǁhai.

²Sats ge nē ǁaesa ge ǂguiǂgui, xawets ge ǃgâiaǂgaoba kaikai tama hâ; xawen ge sa ais aiǃâ nîra ǃgâiaǂgao, khoen ra ǃgaos ǃnâ ǃgâiaǂgao xase, khoen ra dâ xase ǁkhâuǁnâ-i ra ǀgoraǂuihe ǃnubai.

³ǃNaob ǁîn di ǃgommi dib, tsî hais ǁîn di ǃhōdi dis tsî hais ǁîna ge doeǁgan dis, ǁîsats go satsa khôa xui-ao, Midiaǁîn di tsēs khami.

⁴ǃKhammi ǁnān hîa ra ǃkhamn dib hoab ge ǀōb ǀkha hā ǃnubai, tsî saran ge ǀaob ǃnâ ǂgomhe tsî khauǃkhūhe ǃnubai ǀaes di ǂûxūse.

⁵ǀGôa-e da ge ǁorabahe hâ, ǀGôaba da ge māhe hâ, tsî gaosis ge ǃhōb âb ai hâ. Tsîn ra ǀons âba: Buruburuxab, ǀApemā-aob, ǀGaisa Elob, ǀAmo ǁGûb, ǂKhîb Gao-aob, ti ǂgai xui-ao.

⁶Kaisib nē gaosis tsî ǂkhîb tsîra dib ge ǀam tide Davib di trons ai tsî ǁîb di gaosib ǃnâ, ǁîbab ǁāǁā tsî nî ǀgaiǀgaise ǂhanub tsî ǂhanu-aisib tsîkha ǀkha nēsisa xu ǀamosib kōse. Ôasasib ǂnubidi di ǃKhūb dib ge nēsa nîra dī.

⁷ǃKhūb ge mî-e ge sî Jakob ǃnâ, tsî i ge Israeli ǃnâ ge ǁnā.

⁸Tsî nē ǁaes hoas ge ǁî ǃkhaisa nîra hōǃâ, Efraimmi tsî Samarias di ǁansaben tsîna, on ge ǃgurib tsî kaisib ǂgaob dib ǃnâ ǃhoa tsî:

⁹ǂGoaǀuidi ge ge ǁnā ti nî mî, xawe da ge ǁhāǂhauǂhauhe hâ ǀuidi ǀkha ǁîde ǁkhawa nî ǂnubi; ǀgopehaidi ge ge ǁhāǁnâhe, xawe da ge ǁîde sederhaidi ǀkha nî ǃkhōǃkhuni.

¹⁰ǃKhūb ge Resinni di mâǃoasabena ǁîb ǃoagu nîra ǀgapiǀgapi, tsî khākhoen âba nîra khâikhâiǃnâ.

¹¹Siriaǁîn aiǃâba xu tsî Filisteǁîn khaoǃgâba xu, în Israela hapu khowasa ams ǀkha. Nēn hoan tawab ge ǁaib âba ǁkhaedawasen tama hâ, tsî ǃommi âb ge gorose ǀhōǂuihe hâ.

¹²Nē ǁaes ge ǁnāb ǁîna ra ǂnaubǀî ǂnan tama hâ xui-ao, tsî ǃKhūb ǂnubidi diban ôa tama hâ xui-ao.

¹³ǁNā-amagab ge ǃKhūba Israela xu nîra ǁhāǁnâ danas tsî ǂareb tsîra hoara, ǂgonab tsî ǀharub tsîkha, ǀgui tsēs ǀguis ai.

¹⁴Kairagu tsî ǀgapiǃgôasagu, ǁîgu ge a dana, xawe ǁnā kēbo-aob, hîa ǂkhabase ge ǁkhāǁkhāb, ǁîb ge a ǂare.

¹⁵ǂGaeǂgui-aogu nē ǁaes digu ge a ǂgaeǂhapu-ao xui-ao, tsî ǁîgu xa ra ǂgaeǂguihen, ǁîn ra ǂgaeǂhapuhe.

¹⁶ǁNā-amagab ge ǃKhūba ǃgâiaǂgao tide ǁîn di ǂkhamkhoegu ǂama, tsî ǁîn di ǃoaǀgôan ǂama tsî ǁîn di ǃoataradeb ge ǀkhom tide, hoatsaman a hînaxaǃnâ tsî a ǂkhabadī-ao, tsî mâ ams hoas ra gârese ǃhoa xui-ao. Nēn hoan tawab ge ǁaib âba ǁkhaedawasen tama tsî ǃommi âb ge ganupe ǀhōǂuihe hâ.

¹⁷Eloxoresasib ra ǀaes axase khau xui-ao, ǁkhūn tsî ǀgamin tsînab nîra hapu tsîb ǁoes di ǂgapuǃnâgu hâ haide nîra ǂhubi, ǀanni ra ǃapa khami di nî ǃapas kōse.

¹⁸ǁAixasib ǂnubidi di ǃKhūb dib xab ge ǃhūba nîra ǃkhaeǃkhaehe xui-ao, tsî ǁaes ge ǀaes di ǂûse nîra ī; nēb ge nauba sâu tide.

¹⁹Tsî ǀguib ga amǀkhāb ai ǃgao xaweb ge nîra ǃâ; tsî ǁareǀkhāb aib ga ǂû xaweb ge ǁâ tide; mâb hoab nî ǁôab âb di ǁgansa ǂû:

²⁰Manaseb ra Efraimma ǂû, tsî Efraimma Manaseba, tsî ǀhûpen ra Judaba hāǂam. Nēn hoan tawab ge ǁaib âba ǁkhaedawasen tama hâ, tsî ǃommi âb ge gorose ǀhōǂuihe hâ.