Read Khoekhoegowab Levitikus 1 Bible Online

Levitikus 1 - Khoekhoegowab bible

Levitikus 1

¹Tsîb ge ǃKhūba Moseba ǂgai tsî ǁîb ǀkha ge ǃhoa, tentoms ǀhûs disa xu mî raǃâ:

²ǃHoa Israeli ôan ǃoa îts ǁîn ǁga mî: Khoe-i sadu di-i ga ǃKhūba ǁguiba-e ǁguiba ǂgao-o, ots ge sa ǁguibasa nî ǁguiba ǀgoan, goman tsî gūn tsîn xa.

³ǁGuibas â-i ga goman xa io, o i ge ūo aoreba nî ǁguiba; dao-ams ǀhûs tentoms dis aiǃâ i ge ǁîba nî ǁguiba ǃKhūb di ais aiǃâ, ǁî-e a ǃgâiba khami.

⁴Tsî i ge ǃommi â-e khauǁguibas di danas ai nî ǁgui, o i ge ǁî-e nî ǃgâiba, ǂkhîbagu kai i nîse.

⁵ǁNās khaoǃgâb ge tsâuba nî ǂā ǃKhūb di ais aiǃâ; o gu ge pristergu, Aronni ôaga, ǀaoba nî ǁguiba tsî ǀaoba altars ǂnamipe nî ǀgapi, tentoms ǀhûs dis di dao-ams aiǃâ mâs tawa.

⁶ǁGoasi i ge khauǁguibasa ǁhauǁnâ tsî nî ǁîsa ǃâdi ǃnâ ǃkhaiǃā.

⁷O gu ge pristergu, Aronni ôaga ǀae-e nî khau altars ai tsî nî ǀaena ǁguiǁae ǀaes ai.

⁸ǁKhāti gu ge pristergu, Aronni ôaga ǁnā ǃâde danas tsî âun tsîn ǀkha nî dī-unu ǁnā ǀaen, altars ai hân ai.

⁹Xawe ǃnāxūn âb tsî ǃūgu âb tsîn ge ǁgam-i ǀkha nî ǁāhe; tsî pristeri ge ǁîn hoana nî ǂhubi altars ai; khauǁguibas ge a ǁî, ǀaeǁguibas, ǀnamǀnamsa ǁamab, ǃKhūba ǃgâibab ase.

¹⁰Tsî ǁguibas â-i ga ǀgoan xa io, gūn xas kao, pirin xas kao, khauǁguibas ǃoa, o i ge aorerob ūoba nî ǁguiba.

¹¹Tsî i ge ǁîba nî ǂā altars xōǀkhā ǀapasǀî ǃKhūb aiǃâ, tsî pristergu, Aronni ôagu ge ǀaob âba altars ai nî ǀgapi.

¹²Tsîb ge ǁîba nî ǃkhaiǃā danas tsî âun âb tsîn ǀkha tsî pristeri ge ǁîna nî ǁguiǁae ǁnā ǀaes, altars ai hâs di ǀaen ai;

¹³xawe ǃnāxūn tsî ǃūgu tsîn ge ǁgam-i ǀkha nî ǁāhe tsî pristeri ge ǁîn hoana ǁguiba tsî nî ǂhubi, altars ai khauǁguibas ase; ǀaeǁguibas ge a ǁî, ǀnamǀnamsa ǁamab ǃKhūb dib ase.

¹⁴Tsî anin xa i ga ǃKhūba ǁguiba-e ǁguiba ǂgao-o, a-i ǁîsa dī ǂnaidi tamas ka io ǂkham ǂnabudi xa.

¹⁵Tsî pristeri ge ǁîsa altars tawa ūsī tsî nî ǁgorob âb ǀkha danas âsa ǁkhīǁnâ tsî altars ai nî ǂhubi si, tsî ǀaob âs ge altars di ǃnammi tawa nî ǂnâǂuihe.

¹⁶Tsî ǁîs di ǁgarus ǀûn âs ǀkha ab dībē îb ǁîna tsoroxū aiǂoasǀî, tsaob ǃkhais ai.

¹⁷Îb ǁîsa ǁgabokha âs tawa ǂgaeǃā, tā ǃkhaiǃā, îb pristera ǁîsa ǂhubi altars tawa ǀaen, ǀaes ai hân ai; khauǁguibas ge a ǁî, ǀaeǁguibas, ǀnamǀnamsa ǁamab ǃKhūb dib ase.