Read Khoekhoegowab Levitikus 11 Bible Online

Levitikus 11 - Khoekhoegowab bible

Levitikus 11

¹Tsî ǃKhūb ge Moseb tsî Aronni tsîkha ǁga ge ǃhoa, mîǀî kha raǃâ:

²ǃHoa re Israeli ôan ǃoa î kho mî: Nēn ge ǀgurun ǂû du nîna, ǀgoan ǃhūbaib ai hân hoan xa.

³ǀGoan ǃnâ ǁkhorasa ra ǂkhawen hoan tsî ǂkhawes ǁkhoras disa ǀgam ǃâra ǃnâ ǀgoran tsî ra ǃgaiǁgaen, ǁîna du ge nî ǂû.

⁴Xawe nēna du ge ǂû tide: ǁÎn hîa ra ǃgaiǁgaen tsî ǁkhoradi ra ǂkhawen xa: ǃNai-i, ǃgaiǁgae i ra xawe ǁkhorasa ǀgora tama xui-ao, ǁî-i ge ǃanuoǃnâse nî ība du;

⁵ǃâus, ǃgaiǁgaes ra xawes ǁkhorasa ǀgora tama xui-ao, ǁîs ge ǃanuoǃnâse nî ība du;

⁶tsî ǃôas, ǃgaiǁgaes ra xawes ǁkhorasa ǀgora tama xui-ao, ǁîs ge ǃanuoǃnâse nî ība du;

⁷Hāgūb tsîn, ǁkhorasab ra ǀgora tsî ǂkhawes ǁkhoras disab ra ǀgam ǃâra ǃnâ ǀgora, xawe ǁgaeb ranab ǃgaiǁgae tama hâ xui-ao; ǁîb ge ǃanuoǃnâse nî ība du.

⁸ǁÎn di ǁgans xa du ge ǂû tide, tsî ǁō hâ soros âna du ge tsâǀkhā tide; ǁîn ge ǃanuoǃnâse nî ība du.

⁹Nēna du ge nî ǂû ǁgam-i ǃnâ hân hoan xa: ǁGam-i ǃnâ hâ-i, hurigu ǃnâ tsî ǃāgu ǃnâ ǀgaregu tsî ǂhapirogu tsîna ūhâ-i hoa-i, ǁnā-e du ge nî ǂû.

¹⁰Xawe hurigu ǃnâ tsî ǃāgu ǃnâ ǀgaregu tsî ǂhapirogu tsîna ūhâ tama hâ-i hoa-i, ǁgamgu ǃnâ ra gon xūn hoan xa, tsî ûitsama ǀom-i ǁgamgu ǃnâ hâ-i hoa-i, ǁnā-i ge ǃuriǃurisase nî ība du.

¹¹Ā, ǁgaiǁgaisan asen ge nî ība du; ǁîn di ǁgans xa du ge ǂû tide tsî ǁîn di ǁō hâ sorosa du ge nî ǃuri.

¹²ǁGamgu ǃnâ hâ-i, ǀgaregu tsî ǂhapirogu tsîna ūhâ tama hâ-i hoa-i, ǁî-i ge ǃurisase nî ība du.

¹³Tsî anin ǃnâ du ge nēn xa nî ǁgaiǁgaisabahe; ǁîn ge ǂûhe tide, ǁîn ge ǃurisase nî ība du: ǃAriǃkhās tsî ǀhaiǀnūb tsî huriǃariǃkhās,

¹⁴tsî giri tsî ǃurigoras tsîn, ǁîn di ǃnôab ǃoa;

¹⁵tsî gorab hoab, ǁîb di ǃnôab ǃoa;

¹⁶tsî ǀamis tsî ǃhûros tsî kukub tsî ǀgîǁgâub, ǁîb di ǃnôab ǃoa;

¹⁷tsî ǁhoaǃhûros tsî ǂuwib tsî kai ǀhonos,

¹⁸tsî surusuruǃgubes tsî xurdommi tsî pelikanni,

¹⁹tsî oivari tsî reiri, ǁîb di ǃnôab ǃoa, tsî ǁkhūǃgōǃgōs tsî swabeli tsîna.

²⁰ǁGaboxa ǁgamaben, haka ǀnūgu ai ra ǃgûn hoan, ǁîn ge ǃuriǃurisase nî ība du.

²¹Nēn ǀguina du ge nî ǂû, ǂhana ra ǁgaboxa xūn, haka ǀnūgu ai ra ǃgûn hoan xa: ǃGurise ǀnūgu ân tawa tîde ūhân, ǁîgu ǀkhan nî ǃhūb ai urise.

²²ǁÎn xa du ge nēna nî ǂû: ǂHomsa, ǁîs di ǃnôab ǃoa tsî solhams, ǁîs di ǃnôab ǃoa tsî kai ǃhomǂais, ǁîs di ǃnôab ǃoa tsî ǂkhari ǃhomǂais, ǁîs di ǃnôab ǃoa.

²³Xawe nau ǂhana ra ǁgaboxa xūn, haka ǀnūgu â-in hoan, ǁîn ge ǃuriǃurisase nî ība du.

²⁴Tsî nēn tawa du nî ǀuriǀurisen; ǁîn di ǁō hâ sorosa ga tsâǀkhā-i hoa-i ge nî ǃanuoǃnâ, ǃuis kōse.

²⁵ǁÎn di ǁō hâ soros xa ga tani-i hoa-i ge ǁî-i di sarana ǁā tsî nî ǃanuoǃnâ, ǃuis kōse.

²⁶Mâ ǀguru-i ǁkhorasa ra ǂkhawe xawe ǁkhorasa ǀgam ǃâra ǃnâ ǀgora tama tsî ǃgaiǁgae tama-i, ǁî-i ge nî ǃanuoǃnâ; ǁî-e ga tsâǀkhā-i hoa-i ge nî ǃanuoǃnâ.

²⁷Tsî xanidi â-i ai ra ǃgû-i hoa-i, ǀgurun ǃnâ, haka ǀnūgu ai ra ǃgûse, ǁî-i ge sado ǃanuoǃnâse nî ība; ǁî-i di ǁō hâ sorosa ga tsâǀkhā-i hoa-i ge nî ǃanuoǃnâ, ǃuis kōse.

²⁸ǁKhāti ǁō hâ soros â-e ga tani-i ge ǁî-i di sarana ǁā tsî nî ǃanuoǃnâ, ǃuis kōse; ǁîn ge ǃanuoǃnâse nî ība du.

²⁹ǃAruǀîn ge nēna ǂhanaben ǃhūb ai ra ǂhanan ǃnâ ǃanuoǃnâse nî ība du: Weselros tsî durus tsî ǂnobob tsîn, ǁîn di ǃnôab ǃoa;

³⁰tsî ǃnoab tsî ǃnonab tsî ǂnobob tsî ǁkhâxaes tsî khurutsikhubeb tsîna.

³¹ǁÎn ge ǃanuoǃnâse nî ība du ǂhanaben hoan ǃnâ; ǁîna ga tsâǀkhā-i, ǁō i hâ hîa, ǁnā-i ge nî ǃanuoǃnâ, ǃuis kōse.

³²Tsî ǁkhāti ǁnā-i, ǁîn di xū-i ga ǁî-i ai ǁnā-i ǁō i hâ hîa, ǁî-i ge nî ǃanuoǃnâ, haisoa-i xas kas, sara-i xas kas, khō-i xas kas; ǁgam-i ǃnâ i ge ǂgāhe tsî nî ǃanuoǃnâ, ǃuis kōse; ǁnās khaoǃgâ i ge nî ǃanu.

³³Tsî mâ ǃhūsoa-i hoa-i, ǁî-i ǃnâ ga xū-e ǁnā-i, ǁî-i ǃnâ ga hân hoan ge nî ǃanuoǃnâ tsîts ge ǁîna nî khôa.

³⁴ǁNā ǂûn hîats ga ǂûn, ǁgam-i xa sī-aihe hân hoan, ǁnān ge nî ǃanuoǃnâ, tsî mâ āxū-i, hîats ga ā-i hoa-i, ǁnā-i ge mâ xapa-i hoa-i ǃnâ nî ǃanuoǃnâ.

³⁵Tsî ǁō hâ soros ân xa ga xū-e ǁî-i ai ǁnā-i, ǁî-i ge nî ǃanuoǃnâ, ǁnā ǁganoms kas, ǃhūsoas kas hoas ge nî khôahe; ǁîn ge a ǃanuoǃnâ; ǁnā-amagan ge ǃanuoǃnâse nî ība du.

³⁶ǀAu-i tamas ka io tsau-i, ǁgam-i di hâǃkhai-i ge nî ǃanu; xawe ǁîn di ǁō hâ sorosa ga tsâǀkhā-i hoa-i ge nî ǃanuoǃnâ.

³⁷Tsî ǁîn di ǁō hâ soros xa ga xū-i tsorosa ǃkhom-i, hîa ra tsorohe-i hoa-i ai ǁnā-i, ǁî-i ge nî ǃanu.

³⁸Xawe ǁgam-i ga ǃkhom-i ai dīhe tsî ǁō hâ soros ân xa ga xū-e ǁî-i ai ǁnāo, ǁî-i ge nî ǃanuoǃnâse ība du.

³⁹Tsî ǁnā ǀgurun, ǂûse sado īban xa i ga xū-e ǁō-o, ǁnā ǁō hâ xū-i âna ga tsâǀkhā-i hoa-i, ǁnā-i ge nî ǃanuoǃnâ, ǃuis kōse.

⁴⁰ǁKhāti ǁîn di ǁō hâ soros ân xa ga ǂû-i ge ǁî-i di sarana ǁā tsî nî ǃanuoǃnâ, ǃuis kōse; tsî ǁîn ǁō hâ sorosa ga tani-i hoa-i, ǁî-i ge ǁî-i di sarana ǁā tsî nî ǃanuoǃnâ, ǃuis kōse.

⁴¹ǃAruǀî ǂhanaben, ǃhūb ai ra ǂhanan hoan ge ǃuriǃurisase nî ība du, ǁîn ge ǂûhe tide.

⁴²ǃNāb ai ra ǃgû-i hoa-i tsî ǁî-i, haka ǂaidi ai ra ǃgû-i hoa-i, tsî ǂhanaben ǃhūb ai ra ǂhanan xa ga ǂgui ǂaide ūhâ-i, ǁî-ets ge ǂû tide, ǃuriǃurisasen ī amaga.

⁴³Sadu di ǀomde tā ǃuri kai, ǁnā ǂhanaben hîa ra ǂhanan di-i hoa-i ǀkha; î du ǁîn ǀkha tā ǀuriǀurisen, î du ǁîn ǀkha tā ǃanuoǃnâkaisen.

⁴⁴Tita ge ǃKhūta, sadu Elota; ǁnā-amaga du ge nî khaisen, tsî du ge nî ǃanu, tita a ǃanu xui-ao; tsî du ge sadu di ǀomsa ǂhanabe-i, ǃhūb ai ra gon-i hoa-i tawa ǃanuoǃnâ kai tide.

⁴⁵Tita ge ǃKhūta, Egipteǃhūba xu sado ge doeǃapa kai ta, sadu di Elose ta nî ība duga, tsî ǃanu du nîga, tita a ǃanu amaga.

⁴⁶Nēb ge ǂhanub ǀgurun dib tsî anin dib tsî ûitsama ǀoms ǁgamgu ǃnâ ra gons hoas dib, tsî mâ ǀoms ǃhūb ai ra ǂhanas hoas diba,

⁴⁷ǀgoras nî dīhese, ǃanuoǃnâ-i ǁaegu tsî ǃanu-i ǁaegu tsî ǁnā ǀguru-i hîa nî ǂûhe-i ǁaegu, tsî ǁnā ǀguru-i hîa ǂûhe tide-i ǁaegu.