Read Khoekhoegowab Levitikus 12 Bible Online

Levitikus 12 - Khoekhoegowab bible

Levitikus 12

¹ǃAruǀîb ge ǃKhūba Moseb ǃoa ge mî:

²ǃHoa re Israeli ôan ǃoa îts mî: Taras ga ǀgamǀkhā tsîs ga aore ǀgôaba ǁorao, os ge hû tsēdi kōse nî ǃanuoǃnâ, ǀaesenni âs di khaitsēdi ǃoas ge nî ǃanuoǃnâ.

³Tsî ǁkhaisaǁî tsēs ais ge ǁgans aikhōb âb disa nî ǃgaohe.

⁴ǁNās khaoǃgâs ge ǃnonadisiǃnonaǀa tsēdi kōse ǃanuǃanusens âs di ǀaob ǃnâ nî hâ; ǃanu xū-i xare-es ge tsâǀkhā tide, tsî ǃanusib tawas ge sī tide, ǃanuǃanusens âs tsēdi nî ǀoas kōse.

⁵Xawe tarare ǀgôasas ga ǁorao, os ge ǀgam wekhekha kōse nî ǃanuoǃnâ, ǁîs di khaisa ǃoa; ǁnās khaoǃgâs ge ǃnanidisiǃnaniǀa tsēdi kōse ǀaob ǁîs ǃanuǃanusens dib ǃnâ nî hâ.

⁶Tsî ǃanuǃanusens âs di tsēdi ǀgôab ǂamas kas, ǀgôas ǂamas kas ga ǀoao, os ge ǀgui kurixa ǁkhao-e khauǁguibase, tsî ǂkham ǂnabu-i kas, ǂnai-i kas hoasa ǁoreǁguibase nî ūhā, tentoms ǀhûs dis di dao-ams aiǃâ, pristeri ǃoa.

⁷ǁÎb ge ǁî-e nî ǁguiba ǃKhūb di ais aiǃâ, tsîb ge ǁîsa ǂkhîbagusa nî dība, os ge nî ǃanu ǀaob âs di ǂnâsa xu. Nēb ge ǂhanub ǁnās, ǀgôab kas ǀgôas kas hoasa ga ǁoras diba.

⁸Tsî ǁkhao-es ga hō ǁoao, os ge ǀgam ǂnaira kas ǀgam ǂnabura kas hoasa nî ū, ǀguisa khauǁguibase tsî nausa ǁoreǁguibase; tsî pristeri ge ǁîsa ǂkhîbagusa nî dība, nētis ge nî ǃanu.