Read Khoekhoegowab Levitikus 13 Bible Online

Levitikus 13 - Khoekhoegowab bible

Levitikus 13

¹Aiǃâb ge ǃKhūba Moseb tsî Aronni tsîkha ǃoa ge mî:

²Khoe-i ga ǁgans â-i di khōb ai xâi-i kas, ū-ū-i kas, ǃuri khawu-i kas hoasa ǂnauǂoabahe, ǁgans â-i di khōb ǃnâ ǃomamasis di ǁō kai nîse ī-e, o i ge prister Aronni ǃoas kas, ǁîb ôagu, pristergu di ǀguib ǃoas kas hoasa nî ūsīhe.

³Ob ge pristera ǁgans di khōb ǃnâ hâ ǁōba nî kō, tsî ǁnā ǃkhais ai hâ ǀûn ga ǃurib ǃnâ ǀkharaǀkharaheo, tsî ǁōb di ais ga ǁgans â-i di khōb xa ǃgamo, o i ge a ǃomamasis di ǁō; pristeri ga ǁî-e kō-o, ob ge ǃanuoǃnâse ǁî-e nî ǂhaiǂhai.

⁴Xawe ǁgans â-i di khōb ǃnâ hâ khawub ga ǃurio, tsî ais âb ga khōb xa ǃgam tama io, tsî ǀûn ga ǃurib ǃnâ ǀkharaǀkharahe tama io, ob ge pristera ǁî-i ǁnā ǁōba ūhâ-e hû tsēdi kōse nî ǂganamǂgā.

⁵ǁNās khaoǃgâb ge pristera ǁî-e hûǁî tsēs ai nî kō; tsî mû ǁōb ga mûb ra khami mâo, tsî ǁōb ga khōb ǃnâ ǃaruǀî kai tama io, ob ge pristera ǀnî hû tsēdi kōse ǁî-e nî ǂganamǂgā.

⁶Tsî pristeri ge ǁî-e hûǁî tsēs ai ǁkhawa nî kō; tsî mû; ǁōb ga ǀkhaio, tsî ǁōb ga khōb ǃnâ kai tama io, ob ge pristera ǁî-e ǃanuse nî ǂhaiǂhai, ǀgoros ǀguis go i xui-ao; tsî i ge saran â-e nî ǁā, o i ge nî ǃanu.

⁷Xawe ǀgoros ga khōb ǃnâ ǃaruǀîǀgui kai, pristera i nî ǃanuǃanusens â-i ǃoa ǁgauhes khaoǃgâo, o i ge ǁkhawa pristera nî ǁgausen.

⁸Tsî pristeri ga hōǃâ tsî mû, ǀgoros ge khōb ǃnâ kai ǃkhaisa, ob ge pristera ǁî-e ǃanuoǃnâse nî ǂhaiǂhai; ǃomamasis komo.

⁹ǁŌb ǃomamasis dib ga khoe-i ǃnâ hâo, o i ge pristeri ǃoa nî ūsīhe.

¹⁰Tsî pristeri ga hōǃâ tsî mû, ǃuri xâib khōb ǃnâ hâsa, ǀûna ǃurib ǃnâ ge ǀkharaǀkharab tsî ǂurusib ûitsama ǁgans dib xâib ǃnâ hâsa,

¹¹kaira ǃomamasi-i ge a ǁî, ǁgans â-i di khōb ǃnâ; ǁnā-amagab ge pristera ǁî-e ǃanuoǃnâse nî ǂhaiǂhai; ǁî-eb ge ǂganamǂgā kai tide, ǃanuoǃnâ i a xui-ao.

¹²Tsî ǃomamasis ga hoaragase khōb ǃnâ ǀhapiǀhapio, tsî ǃomamasis ga khōb ǃomamasisa ūhâ-i dib hoaba ǀoaǀoao, ǁî-i di danasa xu ǁî-i di ǂaira kōse, pristeri di mûdi di kōs hoas ǃoa,

¹³tsî pristeri ga hōǃa tsî mû ǃomamasis ge ǁî-i di ǁgans hoasa ǀoaǀoa ǃkhaisa, ob ge ǁnā-i, ǁōba ūhâ-e ǃnūse nî ǂhaiǂhai; hoaragases ge ǃurib ǃnâ ge ǀkhara. ǁÎ-i ge a ǃanu.

¹⁴Xawe ûitsama ǁgans ga ǀguitsē ǁîs ǃnâ mûheo, o i ge nî ǃanuoǃnâ.

¹⁵Tsî pristeri ga ǁnā ûitsama ǁgansa mûo, ob ge ǁî-e ǃanuoǃnâse nî ǂhaiǂhai; ǁnā ûitsama ǁgans ge a ǃanuoǃnâ; ǃomamasis komo.

¹⁶Tsî ûitsama ǁgans ga ǀkhara tsîs ga ǃurib ǃnâ ǀkharaǀkharasen, o i ge pristeri tawa nî hā.

¹⁷Tsî pristeri ga ǁî-e kō tsî mû ǁōb ǃurib ǃnâ ǀkharaǀkharasen hâsa, ob ge pristera ǁî-i ǁnā ǁōba ūhâ-e ǃanuse nî ǂhaiǂhai; ǁî-i ge a ǃanu.

¹⁸Tsî ǁgans di khōb ga ǁkhāti ū-ū hâ tsî i ga ǂuruo,

¹⁹tsî ǁnā ū-ū-i di ǃās ǃnâ ga ǃuri xâib kas, ǀapaǃnâ khawu-i kas hoasa ǀkhīo, o i ge pristera nî ǁgauhe.

²⁰Tsî pristeri ga hōǃâ tsî mû, ais â-i khōb xa a ǃgam ǃkhaisa, tsî ǀûn â-i ǃurib ǃnâ ǀkharaǀkharasen hâsa, ob ge pristera ǁî-e ǃanuoǃnâse nî ǂhaiǂhai. ǃOmamasis di ǁōb ge a ǁî, ū-ūba xu i ge ge ǀhapiǀhapi.

²¹Tsî pristeri ga ǁîba kō tsî mû, ǃuri ǀû-i xare-i ǁîb tawa hâ tamasa, tsî khōb xa ǃgam tama tsîb a ǀhai ǃkhaisa, ob ge pristera ǁî-e hû tsēdi kōse nî ǂganamǂgā.

²²Tsî hoaragases ga ǁnās khaoǃgâ khōb ǃnâ kaio, ob ge pristera ǁî-e ǃanuoǃnâse nî ǂhaiǂhai. ǁŌb komo.

²³Xawe khawub ga ǁîb di ǃkhais ai mâhâhâ tsî kai tama io, o i ge ǁnā-e ū-ūb di sao, ob ge pristera ǁî-e ǃanuse nî ǂhaiǂhai.

²⁴Tsî ǁgans di khōb ǃnâb ga ǀaeba hâo, tsî ǂgau-i ǁnā ǀaeb di-i ga ǃuri ǀapaǃnâ tamas ka io ǃuri khawu io,

²⁵tsî pristeri ga ǁî-e kō tsî mû khawub ǃnâ hâ ǀûn ge ǃurib ǃnâ ǀkharaǀkharasen tsî ais âb khōb xa a ǃgam ǃkhaisa, ǃomamasis ge a ǁî; ǀaeb ǀkhas ge ge ǀkhī; ǁnā-amagab ge pristera ǁî-e ǃanuoǃnâse nî ǂhaiǂhai; ǃomamasis di ǁōb ge a ǁî.

²⁶Xawe pristeri ga hōǃâ tsî mû, khawub ǃnâ ǃuri ǀû-i xare-i hâ tama tsî khōb xa i ǃgam tamasa tsî ǀkhai i a ǃkhaisa, ob ge pristera ǁî-e hû tsēdi kōse nî ǂganamǂgā.

²⁷ǁNās khaoǃgâb ge pristera ǁî-e hûǁî tsēs ai nî kō; hoaragaseb ga ǁōba khōb ǃnâ kaio, ob ge pristera ǁî-e ǃanuoǃnâse nî ǂhaiǂhai; ǃomamasis di ǁōb ge a ǁî.

²⁸Xawe khawub ga ǁîb di ǃkhais ai mâhâhâ, goroseb ga khōb ǃnâ kai xaweb ga ǂgâ hâ io, ǀaeb di xâib ge a ǁî; ǁnā-amagab ge pristera ǁî-e ǃanuse nî ǂhaiǂhai, ǀaeb di sao-i ge a ǁî.

²⁹ǃAruǀî, aob ǃnâs kas, taras ǃnâs kas hoasa iga ǁō-e hâ, danas ǃnâs kao, ǀhaus ǃnâs kao;

³⁰tsî pristeri ga ǁōba kō tsî mû, khōb xa i a ǃgamsa, tsî ǃhuniǃnâ ǀui ǀûn ǁîs ai hâsa, ob ge pristera ǁî-e ǃanuoǃnâse nî ǂhaiǂhai. ǀGoros ge a ǁî, ǃomamasis danas dis kas, ǀhaub dis kas hoas ge a ǁî.

³¹Xawe pristeri ga ǁōb ǀgoros diba kō tsî mû khōb xa i ǃgam tamasa, xawe ǂnū ǀûn ga ǁîb ai hâ tama io, ob ge pristera ǁnā-i ǀgoros di ǁōba ūhâ-e hû tsēdi kōse nî ǂganamǂgā.

³²ǁNās khaoǃgâb ge pristera ǁnā ǁōba hûǁî tsēs ai nî kō, tsî mû, ǀgoros ga kai tama io, tsî ǃhuniǃnâ ǀûn ga ǁîb ai hâ tama io, tsî ǀgoros ga khōb xa ǃgam tama io,

³³o i ge nî ǂkhomsen, xawe ǀgorosa i ge ǂkhom tide; tsî pristeri ge ǁnā-i ǀgorosa ūhâ-e ǁkhawa hû tsēdi kōse nî ǂganamǂgā.

³⁴ǁNās khaoǃgâb ge pristera ǁnā ǀgorosa hûǁî tsēs ai nî kō, tsî mû, ǀgoros ga khōb ai kai tama io, tsî khōb xa ǃgam tama io, ob ge pristera ǁî-e ǃanuse nî ǀgoraǃgâ; o i ge ǁî-i di sarana ǁā tsî nî ǃanu.

³⁵Xawe ǀgoros ga hoaragase khōb ǃnâ kaio, ǃanuǃanusens â-i khaoǃgâ,

³⁶tsî pristeri ga ǁî-e kō tsî mû ǀgoros khōb ǃnâ a kai ǃkhaisa, ob ge pristera ǃhuniǃnâ ǀûna ôama tide; ǁî-i ge a ǃanuoǃnâ.

³⁷Xawe ǀgoros ga mû ǁkhāb a khami mâhâhâ io, tsî ǂnū ǀûn ga ǁîs ǃnâ ǀom hâ io, os ge nē ǀgorosa ǂgau hâ, ǁî-i ge a ǃanu. ǁNā-amagab ge pristera ǁî-e ǃanuse nî ǀgoraǃgâ.

³⁸ǃAruǀî aob kas, taras kas hoas ga ǁî-i ǁgans di khōb ai khawuga ūhâo, ǃuri khawuga,

³⁹tsî pristeri ga hōǃâ tsî mû, ǂgâ go ǃuri khawugu ǁîn di ǁgans di khōb ǃnâ hâsa, ǃuri ǁhumis ge a ǁî, khōb ǃnâ go ǀhapiǀhapisa; ǁî-i ge ǃanu.

⁴⁰Tsî aob di danaǀûn ga ǁnāǂoao; ǃgorab ge a ǁî, ǁîb ge a ǃanu.

⁴¹Tsî aisǀkhāb ain ga ǀûna danasa xu ǁnāǂoao, ǂgāb ge a ǁî, ǁîb ge a ǃanu.

⁴²Xawe ǁnā ǃgoradanasib ǃnâs kas, ǂgās ǃnâs kas ga ǃuri ǀapaǃnâ ǁō-e hâo, ǁîs ge a ǃomamasi, ǃgoradanasib ǃnâs kas, ǂgās âb ǃnâs kasa ra ǀhapiǀhapise.

⁴³Tsî pristeri ga kō bi tsîb ga mû ǁîb di ǃgoradanasib ǃnâs kas, ǂgās ǃnâs kasa hâ xâib ǁōb dib a ǃuriǀapaǃnâ ǃkhaisa, ǃomamasis ǁgans khōb dis ī khami,

⁴⁴ǁnā khoeb ge a ǃomamaxa, ǁîb ge a ǃanuoǃnâ; pristeri ge ǁîba hoaragase ǃanuoǃnâse nî ǀgoraǃgâ, ǁîb di ǁōb ge danas âb ai hâ.

⁴⁵ǃAruǀîn ge saran ǃomamaxa-i, ǁōb ǁî-i ǃnâ hâ-i dina nî ǀkhauhe tsî danas â-i ge nî ǀkhaiǀkhā, tsî i ge ǁî-i di amǁgaub ǀgapise hâba nî ǃgū-ai; tsî i ge: ǃAnuoǃnâ! ǃAnuoǃnâ! ti nî ǂgai.

⁴⁶ǁNā tsēdi, ǁîdi ǃnâb ge nē ǁōba ǁî-i ai hâdi hoadi kōse i ge nî ǃanuoǃnâ; ǃanuoǃnâ i ge ǀguri nî ǁan; ǁgoeǃkhais ǃaugas ge ǁanǃkhais â-e nî hâ.

⁴⁷ǃAruǀî, sara-i tawab ga ǃomamasis di ǁōba hâo, ǀûxa sara-i tawas kas, linesara-i tawas kas,

⁴⁸gaxu ǁapab tawas kas, lineǂgāǃnâguǁapab tawab kas, ǀûb tawas kas, khōb tawas kas, ǀnî khōxū-i tawas kas hoasa,

⁴⁹tsî ǁnā ǁōb hîa sarab tawas kas, khōb tawas kas, gaxu ǁapab tawas kas, ǂgāǃnâguǁapab tawas kas tsî ǀnî khōxū-i tawas kas hoasa hâb ga ǃamǃnâ tsî ǀapaǃnâo, ǃomamasis di ǁōb ge a ǁî; ǁnā-amagab ge ǁîba pristera nî ǁgauhe.

⁵⁰Ob ge pristera ǁōba nî kō; tsîb ge ǁnāb ǁōba ūhâba hû tsēdi kōse nî ǂganamǂgā.

⁵¹ǁNās khaoǃgâb ge hûǁî tsēs ai ǁōba nî kō; ǁōb ga kaio, sarab tawas kas, gaxu ǁapab tawas kas, ǂgāǃnâguǁapab tawas kas, khōb tawas kas, khōb tsî ǁîb ǀkha ra dīhe xūn tawas kas hoasa, ǁnā ǁōb ge a ora ǃomamasi; ǁî xū-i ge a ǃanuoǃnâ.

⁵²ǁNā-amagab ge ǁnā sarab kas, gaxu ǁapab kas, ǀûxa ǂgāǃnâguǁapab kas, lineǃkhaib kas, khōxūn ǁîn ǃnâb ǁōba hân kas hoasa nî khauǃkhū, ora ǃomamasis a xui-ao; ǀaes ǀkhan ge nî khauǃkhūhe.

⁵³Tsî pristeri ga kō tsî mû, ǁōb sarab tawas kas, gaxu ǁapab tawas kas, ǂgāǃnâguǁapab tawas kas, ǀnî khōxūn tawas kas hoasa kai tama ǃkhaisa,

⁵⁴ob ge pristera nî mîmā, ǁnā xū-i, ǁî-i tawab ǁōba hâ-i nî ǁāhe ǃkhaisa, ob ge ǁî-e ǁkhawa hû tsēdi kōse nî ǂganamǂgā.

⁵⁵Tsî pristeri ga ǁāhe i hâs khaoǃgâ ǁōba kō tsî mû ǁōb di īsib ǀkhara tama tsî ǁōb kai tama ǃkhaisa, ǁî-i ge a ǃanuoǃnâ; ǀaes ǀkhats ge ǁî-e nî khauǃkhū; nâ ra xū-i ge a ǁî, khaosǀkhāb ais karao, aisǀkhāb ais karao.

⁵⁶Tsî pristeri ga hōǃâ tsî mû, ǁnā ǁōb ǁāheb hâs khaoǃgâ go ǂgâ ǃkhaisa; ob ge ǁîba saraba xus kas, khōba xus kas, gaxu ǁapaba xus kas hoasa nî ǀkhauǁnâ.

⁵⁷Xawe sarab tawas kas, gaxu ǁapab tawas kas, ǂgāǃnâguǁapab tawas kas, ǀnî khōxūn tawas kas hoasab ga mûhe tama io, ǀhapiǀhapi ra ǃomamasis ge a ǁî; ǁî-i aib ǁōba hâ xū-ets ge ǀaes ǀkha nî khauǃkhū.

⁵⁸Xawe sarab kas, gaxu ǁapab kas, ǂgāǃnâguǁapab kas, khōxūn kas hoas ge nî ǁāhe, ǁōb ga ǁîna xu ǂgō ǃnubain ge ǁāhe hâna ǁkhawa nî ǁāhe, on ge nî ǃanu.

⁵⁹Nēb ge ǂhanub ǃomamasi ǁōb dib, ǀûxa sarab xas kao, linesarab xas kao, gaxu ǁapab xas kao, ǂgāǃnâguǁapab xas kao, khōxūn hoan xas kao, ǁîn nî ǃanuse ǂhaiǂhaihes kas, ǃanuoǃnâsen nî ǂhaiǂhaihes kas hoasa.