Read Khoekhoegowab Levitikus 14 Bible Online

Levitikus 14 - Khoekhoegowab bible

Levitikus 14

¹ǁNās khaoǃgâb ge ǃKhūba Moseb ǃoa ge mî:

²Nēb ge ǂhanub ǃomamaxa-i diba, ǁî-i ǃanuǃanusens di tsēs ai: A-i pristeri tawa ūhāhe ti.

³Ob ge pristera ǁgoeǃkhais ǃaugab ǃoa nî ǃgû; tsî pristeri ga hōǃâ tsî mû ǃomamasis di ǁōb ǃomamaxa-e xu ge ǂgau ǃkhaisa,

⁴ob ge pristera nî mîmā, ǁî-i hîa nî ǃanuǃanuhe-i nî ǀgam ǃanu anira ūbahesa sederhais tsî îǀapab tsî hisob tsîn ǀkha.

⁵Ob ge pristera ǁkhāti nî mîmā, ǀgui anis nî ǃhūsoa-i ǃnâ ǂāhesa ûitsama ǁgam-i ai.

⁶ǁNā ûitsama anisab ge nî ū tsî sederhais tsî îǀapab tsî hisob tsîna; tsîb ge ǁîn tsî ûitsama anis tsîna nî ǂgā ǁnā anis ûitsama ǁgam-i ai ge ǂāhes di ǀaob ǃnâ;

⁷tsîb ge ǁî-i, hîa ǃomamasisa xu nî ǃanuǃanuhe-i ǂama hû ǃnādi kōse nî ǀgapi; ǁnās khaoǃgâb ge ǃanuse nî ǀgoraǃgâ i tsî ûitsama anisa ǃgarob ǃnâ nî ǁkhana kai.

⁸Tsî ǃanuǃanuhe nî i, ǁî-i ge ǁî-i di sarana nî ǁā tsî ǁî-i di ǀûna nî ǂkhom tsî ǁgam-i ǃnâ nî khōsen, o i ge nî ǃanu; ǁnās khaoǃgâ i ge ǁgoeǃkhais ǃnâ nî sī, xawe-i ge tentoms â-i ǃauga nî hâ, hû tsēdi kōse.

⁹O i ge hûǁî tsēs ai nî ī, ǁî-i di ǀûn hoana i nî ǂkhom ǃkhaisa, ǁî-i danas din tsî ǁî-i ǀhaub din tsî ǀgâugu tsîna; ā, ǁî-i di ǀûn hoana ǂkhom tsî i ge ǁî-i sarana nî ǁā tsî ǁî-i ǁgansa ǁgam-i ǀkha nî ǁā, o i ge nî ǃanu.

¹⁰Tsî ǁkhaisaǁî tsēs ai i ge ǀgam ūo ǁkhaokha tsî ǀgui kurixa ūo gūsa nî ū, ǃnona disiǁî ǃâdi tsampereb didi ǀkha, ǂûǁguibase olib ǀkha ǂnâ-aihe hâǃâ tsî ǃnona disiǁî ǃâb ǀgui liter oli-i dib xa.

¹¹Ob ge pristeri hîa ǃanuǃanusensa ra dība ǁnā khoeb, ǃanuǃanuhe nîb, tsî xūn tsîna nî mâi ǃKhūb di ais aiǃâ, tentoms ǀhûs dis di dao-ams aiǃâ.

¹²Tsî pristeri ge ǁnā ǀgui ǁkhaoba ū tsî nî ǁîba ǁguiba ǀhapiǁguibase ǁnā ǃnona disiǁî ǃâb ǀgui liter oli-i dib ǀkha; tsîb ge ǁîna gongonǁguibase ǃKhūb di ais aiǃâ nî gongon.

¹³ǁNās khaoǃgâb ge ǁkhaoba nî ǂā, ǁoreǁguibas tsî khauǁguibas ra ǂāhe ǃkhais ai, ǃanu ǃās ǃnâ; ǀhapiǁguibas ge ǁoreǁguibas khami a pristeri di; ǃanusin di ǃanusi-i ge a ǁî.

¹⁴Tsî pristeri ge ǀhapiǁguibas di ǀaob xa nî ū, ǁîbab ge pristera ǁnā-i hîa nî ǃanuǃanuhe-i di ǂgaeǂaos amǀkhāb ǂgaes dis ai nî dī tsî ǁî-i amǀkhāb ǃommi di kaitsiǁgubes ai tsî ǁî-i amǀkhāb ǂais di kaitsiǁgubes ai.

¹⁵Pristeri ge ǁkhāti ǃnona disiǁî ǃâb ǀgui liter oli-i diba xu ū tsî nî pristeri di ǁareǀkhāb ǃommi ai ǂnâ.

¹⁶ǁGoasib ge pristera amǀkhāb ǀkhunub âba nî ǂgā, olib xa ra ūse, ǁareǀkhāb ǃommi âb ǃnâ hâb xa tsî nî ǁîb di ǀkhunub ǀkha ǁnā olib xa hû ǃnādi kōse ǀgapi, ǃKhūb di ais aiǃâ.

¹⁷Tsî olib xa ga ǃgau-i, ǁîb ǃommi ǃnâ hâb dib xa, ǁî-eb ge pristera nî dī amǀkhāb ǂgaes ǁnā-i, ǃanuǃanuhe nî-i dis ai tsî ǁî-i amǀkhāb ǃommi di kaitsiǁgubes ai, tsî kaitsiǁgubes ǁî-i amǀkhāb ǂais dis ai, ǀhapiǁguibas di ǀaob ǂama.

¹⁸Tsî olib xa ga ganupe ǃgau-i, pristeri ǃomǁae hâ go ib xa, ǁî-eb ge ǁnā-i hîa nî ǃanuǃanuhe-i di danas ai nî dī; nētib ge pristera ǁî-i ǂama ǂkhîbagusa nî dī, ǃKhūb di ais aiǃâ.

¹⁹Pristeri ge ǁkhāti ǁoreǁguibasa ǁāǁā tsî ǁnā-i, ǁî-i di ǃanuoǃnâsiba xu nî ǃanuǃanuhe-e ǂkhîbagusa nî dība; ǁnās khaoǃgâb ge khauǁguibasa nî ǂā.

²⁰Tsî pristeri ge ǁnā khauǁguibas tsî ǁnā ǂûǁguibas tsîra altars ai nî ǁguiba; nētib ge pristera ǁî-e ǂkhîbagusa nî dība, o i ge nî ǃanu.

²¹Xawe ǀgâsa i kao tsî ǃommi â-i ga sīǃnâ ǁoao, o i ge ǁkhaoba ǀhapiǁguibase nî ū, gongonhe nîse, ǁî-eb nî ǂkhîbagusa dīse; tsî ǁîn tawa disiǁî ǃâs tsampereb disa, olib ǀkha ǂnâ-aihe hâǃâ ǂûǁguibase, tsî ǃnona disiǁî ǃâb ǀgui liter oli-i dib tsîn.

²²Tsî ǀgam ǂnaira kas, ǀgam ǂkham ǂnabura kas hîa ǁî-i ǃommi hō ǁkhā ra; ǁîra di ǀguis ge ǁoreǁguibase tsî naus ge khauǁguibase nî ī.

²³Tsî i ge ǁîra ǁî-i ǃanuǃanusens di ǁkhaisaǁî tsēs ai pristeri tawa nî sī-ū, tentoms ǀhûs dis di dao-ams tawa, ǃKhūb di ais aiǃâ.

²⁴Ob ge pristera ǁkhaob ǀhapiǁguibas dib tsî ǃnona disiǁî ǃâb ǀgui liter oli-i dib xa nî ū, tsî pristeri ge ǁîna gongonǁguibase nî gongon ǃKhūb di ais aiǃâ.

²⁵ǁNās khaoǃgâb ge ǁkhaob ǀhapiǁguibas diba nî ǂā, tsî pristeri ge ǀhapiǁguibas di ǀaob xa ū tsî nî dī ǁnā-i, ǃanuǃanuhe nî-i di amǀkhāb ǂgaeǂaos ai tsî amǀkhāb ǃommi â-i di kaitsiǁgubes ai tsî kaitsiǁgubes ǁî-i amǀkhāb ǂais dis ai.

²⁶ǁKhātib ge pristera olib xa ǁîb di ǁareǀkhāb ǃommi ai nî ǂnâ.

²⁷ǁNās khaoǃgâb ge pristera ǁîb amǀkhāb ǀkhunub ǀkha ǁnā olib, ǁîb ǁareǀkhāb ǃommi ai hâb xa nî ǀgapi, hû ǃnāde ǃKhūb di ais aiǃâ.

²⁸Tsî pristeri ge ǁnā olib, ǃommi ai hâb xa nî dī ǂgaeǂaos ǁnā-i, ǃanuǃanuhe nîse ī-i amǀkhāb ǂgaes dis ai tsî ǁî-i amǀkhāb ǃommi di kaitsiǁgubes ai, tsî kaitsiǁgubes ǁî-i amǀkhāb ǂais dis ai, ǀaob ǀhapiǁguibas dib di ǃkhais ai.

²⁹Tsî olib xa ga ǃgau-i, pristeri di ǃommi ǃnâ hâb xa, ǁî-eb ge nî dī danas ǁnā-i, ǃanuǃanuhe nî-i dis ai, ǂkhîbagusab nî ǁî-e dībase, ǃKhūb di ais aiǃâ.

³⁰ǁNās khaoǃgâb ge ǀguis ǂnaira dis kas, ǂkham ǂnabura dis kas hoasa nî ǁāǁā, ǁî-i ǃommi nî hō ǁkhā hâ is kōse.

³¹ǁÎ-i ǃommi nî hō ǁkhā hâ isa xus ge ǀguisa ǁoreǁguibase tsî nausa khauǁguibase nî ī ǂûǁguibas ǂama; nētib ge pristera ǁnā-i hîa nî ǃanuǃanuhe-e ǂkhîbagusa nî dība, ǃKhūb di ais aiǃâ.

³²Nēb ge ǂhanub ǁnā-i, ǃomamasis ǁōba ǁî-i ǃnâ ūhâ-i, ǁî-i ǃommi ǃanuǃanusens â-i ǃnâ ǀnî xū-e hō ǁoa nî ī-i diba.

³³ǃAruǀîb ge ǃKhūba Moseb tsî Aronni tsîkha ǃoa ge mî:

³⁴Kanaanǃhūb ǃnâ du ga sīo, sadu dise ta nî mā duba, tsî tita ga ǃomamasi ǁōba ǁnā ǃhūb, ūhâ du nîb di ommi ǃnâ hā kaio,

³⁵ob ge ǁnā ommi di ǀhonkhoeba hā tsî nî ǁîsa pristera ǂanǂan, mî rase: ǁŌ-i ommi ǃnâ hâ khami i ge ra ība te.

³⁶Ob ge pristera nî mîmā, îb omma ǀkhaiǃnâ kaihe ti, pristeri nî sīs aiǃâ, ǁōbab nî kōse, în ǁnā ommi ǃnâ hâ xūn hoana tā ǃanuoǃnâ; tsî ǁnās khaoǃgâb ge pristera nî hā ǁnā ommab nî kōse.

³⁷Tsî ǁnā ǁōba kō tsîb ga mû, ǁōb ǁnā ommi di ǂnubiǂgoagu tawa hâb ǃamǃnâ ǀapaǃnâ ǃgam ǃkhairode ūhâsa, tsî ais âdi ǂnubiǂgoagu xa a ǃgam ǃkhaisa,

³⁸ob ge pristera ǁnā omma xu nî ǂoa, dao-ams ommi disa-ū, tsîb ge ǁnā omma hû tsēdi kōse nî ǂganam.

³⁹ǁNās khaoǃgâb ge pristera hûǁîtsēs ai nî oahā; tsî hōǃâ tsîb ga mû ǁnā ommi ǂnubiǂgoagu tawa hâ ǁōb a kai ǃkhaisa,

⁴⁰ob ge pristera nî mîmā, ǀuidi ǁnā ǁōb ǁîdi ǃnâ hâdi nî khôaǂuihe tsî ǃās ǃauga aoǂuihesa, ǃanuoǃnâ ǃkhai-i tawa;

⁴¹tsî ǁnā omman ge ǃnāb ǃnâ nî ǁkharoǃnâǂnamipe tsîn ge ǂgoatsarab, hîan go ǁkharoǁnâba ǃās ǃauga, ǃanuoǃnâ ǃkhai-i tawa nî tsoroxu.

⁴²ǁNās khaoǃgân ge ǀkhara ǀuide ū tsî ǁîde nau ǀuidi di ǃkhais ǃnâ nî dī; tsîn ge ǀkhara ǂgoaba ū tsî nî ǁnā omma ǂkhau.

⁴³Tsî ǁōb ga ǁkhawa hā tsîb ga ǁnā ommi ǃnâ ǁkhawa tsoatsoa, ǀuidi khôaǂuihe hâs khaoǃgâ tsî ǁkharoǃnâs ommi dis khaoǃgâ tsî ǂkhauheb hâs khaoǃgâ,

⁴⁴ob ge pristera nî hā, tsî hōǃâ tsîb ga mû ǁōb ǁnā ommi tawa a kai ǃkhaisa, ora ǃomamasi-i ge ǁnā ommi ǃnâ hâ-e; ǁîb ge a ǃanuoǃnâ.

⁴⁵ǁNā-amagan ge ǁnā ommi tsî ǁîb di ǀuidi tsî ǁîb di hain tsî ǂgoab ommi dib hoab tsîna nî ūǁnâ, tsîn ge ǃās ǃaugaba ǃoa nî ūǂui, ǃanuoǃnâ ǃkhai-i tawa.

⁴⁶Tsî ǁnā ommi ǃnâ ga ǂgâ-i hoa-i, mâ tsēs hoas ai ǂganamheb ges khaoǃgâ, ǁnā-i ge nî ǃanuoǃnâ, ǃuis kōse.

⁴⁷Tsî ǁnā ommi ǃnâ ga ǁom-i hoa-i, ǁî-i ge saran â-e nî ǁā; ǁnās ǁkhās khami ǁnā ommi ǃnâ ga ǂû-i hoa-i, ǁî-i ge saran â-e nî ǁā.

⁴⁸Xawe pristeri ga ǁkhawa ǂgâ tsîb ga mû, ǁōb ǁnā ommi tawa hâb kai tama hâ ǃkhaisa, ommi ge ǂkhauhes khaoǃgâ, ob ge pristera ǁnā omma ǃanuse nî ǀgoraǃgâ, ǁnā ǁōb go ǂgau xui-ao.

⁴⁹ǁNās khaoǃgâb ge ǁnā ommab nî ǁoreokaise, ǀgam anirora nî ū sederhais tsî îǀapab tsî hisob tsîn ǀkha.

⁵⁰Tsîb ge ǀgui anisa ǂgoasoa-i ǃnâ nî ǂā, ûitsama ǁgam-i ai.

⁵¹ǃNubaib ge ǁnā sederhais tsî hisob tsî îǀapab tsî ûitsama anisa ū tsî nî ǁîna ǂāhe hâ anis di ǀaob ǃnâ tsî ûitsama ǁgam-i ǃnâ nî ǂgā; tsîb ge ǁnā omma hû ǃnādi kōse nî ǀgapi.

⁵²Nētib ge ǁnā omma anis di ǀaob ǀkha tsî ûitsama ǁgam-i ǀkha tsî sederhais ǀkha tsî hisob ǀkha tsî îǀapab ǀkha nî ǁoreo kai.

⁵³Tsî ûitsama anisab ge ǃās ǃauga, ǃgarob ǃnâ nî ǁkhana kai; nētib ge ǂkhîbagusa omma nî dība, ob ge nî ǃanu.

⁵⁴Nēb ge ǂhanub ǃomamasis di ǁōgu hoagu dib tsî ǀgoros diba;

⁵⁵tsî ǃomamasis saran tsî omgu dib;

⁵⁶tsî xâib dib tsî ū-ūb dib tsî khawub diba,

⁵⁷ǁkhāǁkhāsents nîga, mâ tsēs ai i xū-e a ǃanuoǃnâ tsî mâ tsēs ai i xū-e a ǃanu ǃkhaisa. Nēb ge ǂhanub ǃomamasis diba.