Read Khoekhoegowab Levitikus 15 Bible Online

Levitikus 15 - Khoekhoegowab bible

Levitikus 15

¹ǃAruǀîb ge ǃKhūba Moseb tsî Aronni tsîkha ǃoa ge mî:

²ǃHoa re Israeli ôan ǀkha î kho mî ǁîn ǃoa: Mâ khoeb, ǁgans âb ǃnâ ga ǂnâb hoab, ǁîb ge ǂnâs âb ǃaroma nî ǃanuoǃnâ.

³Tsî nēb ge ǃanuoǃnâsib âb ase nî ī ǂnâs âb ǃaroma. ǁGans âb ga ǂnâs âsa ǀaudâu, ǁgans âb ga ǂnâs âs ǀkha ǀûo, ǁîs ge a ǃanuoǃnâsi.

⁴Mâ ǁgoeǃkhai-i ǂnâsa ūhâb ga ǁî-i ai ǁgoe-i hoa-i, ǁnā-i ge a ǃanuoǃnâ, tsî mâ xū-i ǁî-i aib ga ǂnû-i ge a ǃanuoǃnâ.

⁵Tsî mâ-i ǁgoeǃkhais âba ga tsâǀkhā-i hoa-i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ ǃuis, kōse.

⁶Tsî ǁnā xū-i ǂnâsa ūhâb go ǁî-i ai ǂnôa i-i ai ga ǂnû-i hoa-i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ, ǃuis kōse.

⁷Tsî ǁnā-i ǂnâsa ūhâb di ǁgansa ga tsâǀkhā-i hoa-i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ, ǃuis kōse.

⁸Tsî ǁnāb ǂnâsa ūhâb ga ǃanu-i ai ǂarao, o i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ, ǃuis kōse.

⁹Tsî ǁkhāti mâ ǃarodas ǁîb aib ga ǁnāb, ǂnâsa ūhâba ǃgapis hoas ge nî ǃanuoǃnâ.

¹⁰Tsî mâ-i ǁîb ǃnaga hâ xū-e ga tsâǀkhā-i hoa-i ge nî ǃanuoǃnâ, ǃuis kōse; tsî ǁî-e ga tani-i hoa-i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ ǃuis kōse.

¹¹Tsî mâ-i ǁnāb, ǂnâsa ūhâba ga tsâǀkhā-i hoa-i, ǁgam-i ǀkha ǁānǃom tama hâse, ǁî-i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ, ǃuis kōse.

¹²Tsî ǁnā ǂgoasoa-i, ǁnāb ǂnâsa ūhâb ga tsâǀkhā-i hoa-i on ge nî khôahe; xawe haisoan hoan ge ǁgam-i ǀkha nî ǁāǃnâhe.

¹³Tsî ǁnāb, ǂnâsa ūhâb ga ǂnâs âba xu ǃanuo, ob ge hû tsēde nî ǃgôabasen, ǃanuǃanusens âb kōse, tsî saran âba ǁā, tsî nî ǁgans âba ûitsama ǁgam-i ǀkha khō, ob ge nî ǃanu.

¹⁴Tsî ǁkhaisaǁî tsēs aib ge ǀgam ǂnaira kas, ǀgam ǂkham ǂnabura kas hoasa ūbasen, tsî nî ǃKhūb di ais aiǃâ sī, tentoms ǀhûs dis di dao-ams tawa tsî ǁîra pristera nî mā.

¹⁵Ob ge pristera ǁîra nî ǁāǁā, ǀguisa ǁoreǁguibase tsî nausa khauǁguibase. Nētib ge pristera ǃKhūb di ais aiǃâ ǂnâs âb ǃaroma ǂkhîbagusa nî dība bi.

¹⁶Aiǃâb ǃoa: Khoeb ga ǁgoeǀkhās di ǃkhommi xa ǂoaxūheo, ǁnāb ge ǁîb di ǁgans hoasa ǁgam-i ǀkha ǁā tsî nî ǃanuoǃnâ, ǃuis kōse.

¹⁷Tsî mâ sara-i hoa-i tsî mâ khoe-i hoa-i, ǁî-i ai i ǁgoeǀkhās di ǃkhom-e hâ-i ge ǁgam-i ǀkha ǁāhe tsî nî ǃanuoǃnâ, ǃuis kōse.

¹⁸Tsî ǁkhāti ǁnā taras, aob xa ǁgoeǀkhās di ǃkhommi ǀkha ge ǁgoeǀkhāhes; ǁîra ge ǁgam-i ǀkha khōsen tsî nî ǃanuoǃnâ, ǃuis kōse.

¹⁹Tsî tara-i ga ǂnâsa ūhâ, ǀaoǂnâs âsa ǁgans âs ǃnâ hâǃâ, os ge hû tsēde khais âs ǃnâ nî hâ; tsî ǁîsa ga tsâǀkhā-i hoa-i ge nî ǃanuoǃnâ, ǃuis kōse.

²⁰Tsî khais âs ǃnâs ga ǁgoe-ai xū-i hoa-i ge nî ǃanuoǃnâ; tsî ǁkhāti ǂnû-ais ka xū-i hoa-i ge nî ǃanuoǃnâ.

²¹Tsî ǁîs di ǁgoeǃkhaisa ga tsâǀkhā-i hoa-i ge ǁî-i di sarana ǁā tsî ǁgam-i ǀkha nî khōsen tsî nî ǃanuoǃnâ, ǃuis kōse.

²²Tsî mâ xū-i ǁîs ge ǂnû-ai hâ i-e ga tsâǀkhā-i hoa-i ge saran â-e ǁā tsî nî khōsen ǁgam-i ǀkha tsî nî ǃanuoǃnâ, ǃuis kōse.

²³Tsî xū-i ga ǁgoeǃkhais ais kas, ǁîs ge ǂnû-ai hâ i xū-i ais kas ai hâ io, tsî i ga ǁî-e tsâǀkhāo, o i ge nî ǃanuoǃnâ, ǃuis kōse.

²⁴ǁNās ǁkhās khami khoeb ga ǂanǂansase ǁîs ǀkha ǁgoeo, ǁîs di ǁaebas ūhâ hîa, ob ge hû tsēdi kōse nî ǃanuoǃnâ; tsî ǁgoeǃkhais, ǁîs aib nî ǁgoes ge nî ǃanuoǃnâ.

²⁵Tsî tara-i ga ǂomxase, ǁîs di ǁaeb ai tamase ǀaoǂnâsa ūhâo, ǂnâs kao ǁîs di ǀhawe ǁaeb ǃnā hâse, os ge ǃanuoǃnâsib âs di ǂnâtsēdi hoadi kōse, ǁîs di ǁaeb ais ī khami nî ǃanuoǃnâ.

²⁶ǁÎs ais ga ǂnâs âs di tsēdi hoadi kōse ǁgoe ǃkhais hoas ge khais âs di ǁgoeǃkhais khami nî ī; tsî xūn, ǁîs ais ga ǂnûn ge nî ǃanuoǃnâ, khais âs di ǃanuoǃnâsib ǃoa.

²⁷Tsî ǁnā xūna ga tsâǀkhā-i hoa-i ge nî ǃanuoǃnâ; ǁnā-amaga i ge saran â-e ǁā tsî ǁgam-i ǀkha nî khōsen tsî nî ǃanuoǃnâ, ǃuis kōse.

²⁸Xawe ǂnâs âsa xus ga ǃanuo, os ge hû tsēde nî ǃgôabasen, tsî ǁnās khaoǃgâs ge nî ǃanu.

²⁹Tsî ǁkhaisaǁî tsēs ais ge ǀgam ǂnaira kas, ǀgam ǂkham ǂnabura kas hoasa ū tsî nî ǁîra pristeri tawa ūsī, tentoms ǀhûs dis di dao-ams tawa.

³⁰ǃNubaib ge pristera ǀguisa ǁoreǁguibase tsî nausa khauǁguibase nî ǁāǁā; tsî pristeri ge ǁîsa ǃanuoǃnâsib âs di ǂnâs ǃaroma ǂkhîbagusa nî dība, ǃKhūb di ais aiǃâ.

³¹Nēti kho ge Israeli di ôana ǁîn di ǃanuoǃnâsiba xu nî khai, ǁîn di ǃanuoǃnâsib ǃnân ǁō tidega, ti tabernakeli ǁîn ǁaegu hâban ga ǀuriǀurio.

³²Nēb ge ǂhanub ǁnā-i, ǂnâsa ūhâ-i tsî ǁgoeǀkhās di ǃkhommi ǁî-e xu ra ǂoab diba, ǁîba xub nî ǃanuoǃnâse;

³³tsî ǂkhabusa taras diba khais âb ǃnâ tsî ǁnāb, ǂnâs âba ra ǂnâb diba, aob dib karao, taras dib karao; tsî aob hîa ǃanuoǃnâs ǀkha nî ǁgoeb diba.