Read Khoekhoegowab Levitikus 16 Bible Online

Levitikus 16 - Khoekhoegowab bible

Levitikus 16

¹Tsî ǃKhūb ge Moseb ǀkha ge ǃhoa, ǀgam ǀgôakha Aronni dikha ge ǁōs khaoǃgâ, ǀgū kha geo ǃKhūb di ais aiǃâ tsî ǁō kha geo.

²ǃNubaib ge ǃKhūba Moseb ǃoa ge mî: Sa ǃgâsab Aronna mîba îb tā mâ ǁaeb hoab ai ǃanusib ǃnâ ǂgâ, ǂgāmâisab ǃgâb ai, ǃgū-ais ǂkhîbagus dis, ǂgaes ai hâs aiǃâ, îb tā ǁō, tita ge ǀnanus ai ra ǂhai ǂkhîbagus ǃgū-ais ai xuige.

³Nēn ǀkhab ge Aronna ǃanusib ǃnâ nî ǂgâ: ǁGōb, ǂkham ǁgōb ǀkha ǁoreǁguibase tsî bairab ǀkha khauǁguibase.

⁴ǁÎb ge ǃanu linesaraba nî ana, tsî lineǀnūsarab ge ǁgans âb ai nî hâ, tsî lineǃgaesenni ǀkhab ge nî ǃgaesen tsî lineǀgapasa nî ǀgapa. Nēn ge ǃanu sarana; ǁnā-amagab ge ǁgans âba ǁgam-i ǀkha nî khō, ǁînab ga anao.

⁵Tsî ǀhaohâb Israeli ôan dib xab ge ǀgam pirikha nî ū ǁoreǁguibase tsî bairaba khauǁguibase.

⁶ǁNās khaoǃgâb ge Aronna ǁoreǁguibas di ǁgōb, ǁîb di nîba nî ǁguiba tsî ǁîb ǂûb tsî ommi âba ǂkhîbagusa nî dība.

⁷Tsîb ge ǀgam pirikha ū tsî ǁîkha ǃKhūb di ais aiǃâ nî mâi, tentoms ǀhûs dis di dao-ams tawa.

⁸Tsî Aronni ge ǂnōgusa nî ao ǁnā ǀgam pirikha ǂama, ǀgui ǂnōgusa ǃKhūb dise tsî nau ǂnōgusa ǃgûbē ra pirib dise.

⁹ǃNubaib ge Aronna ǁnā pirib, ǁîb ais nî ǃKhūb di ǂnōgusa hāba ūhā, tsî nî ǁîba ǁoreǁguiba kai.

¹⁰Xawe ǁnā pirib, ǁîb ais nî ǃgûbē ra pirib di ǂnōgusa ǁnāb ge ûitsamase ǃKhūb di ais aiǃâ nî mâihe, ǁîb ǀkha nî ǂkhîbagusa dīhese; ǃgûbē ra pirib aseb nî ǃgaroǃhūb ǃoa ǃgûǂoa kaihese.

¹¹Ob ge Aronna ǁoreǁguibas di ǁgōb, ǁîb di nîba nî ūhā tsî nî ǁîb ǂûb tsî ǁîb di omma ǂkhîbagusa dība, tsî nî ǁoreǁguibas di ǁgōb, ǁîb ǂûb di nîba ǂā.

¹²Tsîb ge wiroksoa-i, ǀaexa ǂnomdi ǀkha ǀoa hâ-e altarsa xu nî ū, ǃKhūb di ais aiǃâba xu, tsî ǁîb di ǃomkha hoakha nî ǀoaǀoa ǃgâihamxūn, xontsautsauhe hân xa; tsîb ge ǁîna ǂgāmâisab ǃgâba ai nî taniǂgā.

¹³Tsîb ge ǁnā ǃgâihamxūna ǀaes ai nî ǁgui ǃKhūb di ais aiǃâ; îs ǀnanus ǃgâihamxūn disa ǃgū-ais ǂkhîbagus dis, ǀhûǀguitimîs ai hâsa ǃgū-ai, ǁōb tidega.

¹⁴Tsîb ge ǁgōb di ǀaob xa ū tsî nî ǀkhunub âb ǀkha ǃgū-ais ǂkhîbagus dis ai ǀgapi aiǂoasǀî, tsî ǃgū-ais ǂkhîbagus dis aiǃâ hû ǃnādi kōse ǀkhunub âb ǀkha ǁnā ǀaob xa nî ǀgapi.

¹⁵ǁNās khaoǃgâb ge pirib ǁoreǁguibas dib hîa nî ǁaes diba ǂā tsî ǀaob âba ǂgāmâisab ǃgâb ai taniǂgā, tsî nî ǁîb di ǀaob ǀkha dī, ǁgōb di ǀaob ǀkhab ge dī khami, tsî nî ǁîba ǀgapi ǃgū-ais ǂkhîbagus dis ai tsî ǃgū-ais ǂkhîbagus dis aiǃâ.

¹⁶Nētib ge ǃanusiba nî ǂkhîbagusa dība ǃanuoǃnâsigu Israeli ôan digu ǃaroma tsî ǁîn di ǃûǂamdi ǃaroma, ǁoren ân hoan ǃoa; tsî nētib ge tentoms ǀhûs dis tawa nî dī, ǁîn ǁaegu ǁan hâs, ǁîn di ǃanuoǃnâsigu ǃnâ hâs tawa.

¹⁷Tsî khoe-i xare-i ge tentoms ǀhûs dis ǃnâ hâ tide, ǂgâb kao ǃanusib ǃnâb nî ǂkhîbagusa dīse, ǂoaxab nîs kōse. Nētib ge ǁîb ǂûb tsî ǁîb di ommi tsî Israeli ǀhaohâb hoaba ǂkhîbagusa nî dība.

¹⁸ǁNās khaoǃgâb ge altars, ǃKhūb di ais aiǃâ hâs ǃoa ǂoaxa tsî nî ǁîsa ǂkhîbagusa dība; tsîb ge ǁgōb di ǀaob tsî pirib di ǀaob xa ū tsî nî altars di ǁnâgu ǂnamipe dī.

¹⁹Tsîb ge ǁîb ai ǁnā ǀaoba ǀkhunub âb ǀkha hû ǃnādi kōse nî ǀgapi, tsîb ge ǁîba nî ǃanuǃanu tsî khai ǃanuoǃnâsigu Israeli ôan digu xa.

²⁰Tsî ǃanusib tsî tentoms ǀhûs dis tsî altars tsîn ǂkhîbagusab ga dītoao, ob ge ûitsama piriba nî ūhā.

²¹Ob ge Aronna ǃomkha hoakha âba ûitsama pirib di danas ai ǁgui tsî nî ǁîs ai ǁguiǁnâ, Israeli ôan di ǂhanuoǃnâsigu hoaga tsî ǁîn di ǃûǂamdi hoade, ǁîn di ǁoren hoan ǃoa; tsîb ge ǁîna pirib di danas ai ǁgui tsî nî ǁîba khoeb hîa hâb di ǃomǁaeba xu ǃgaroǃhūb ǃoa ǂoa kai.

²²Nē dommi aib ge ǁnā piriba ǁîb ai ǂhanuoǃnâsigu hoaga ǀguri ǁgoe ǃhūb ǃoa nî tanibē; tsîb ge ǁnā piriba ǃgaroǃhūb ǃoa nî ǂoa kai.

²³ǁNās khaoǃgâb ge Aronna tentoms ǀhûs dis ǃnâ sī tsî nî linesarana ǂgaeǂui, ǁîb ge anana, ǃanusib ǃnâb ge ǂgâ ǃnubai, tsîb ge ǁîna ǁnāpa ge ǁnāxū.

²⁴Tsîb ge ǁgans âba ǃanu ǃkhais tawa ǁgam-i ǀkha khō tsî nî saran âba ǂgaeǂgā. ǃNubaib ge ǂoa tsî nî ǁîb di khauǁguibas tsî ǁaes di khauǁguibas tsîra ǁāǁā, tsî nî ǁîb ǂûb tsî ǁaes tsîna ǂkhîbagusa dība.

²⁵ǁKhātib ge ǁoreǁguibas di kauba altars ai nî ǂhubi.

²⁶Tsî ǁîb, ǁnā pirib hîa ǃgûbē ra piri ge iba ge ǃgûǂoa kaib ge saran âba nî ǁā tsî ǁgans âba ǁgam-i ǀkha nî khō; ǁnās khaoǃgâb ge ǁgoeǃkhais ǃnâ nî hā.

²⁷Xawe ǁgōb ǁoreǁguibas dib tsî pirib ǁoreǁguibas dib tsîkha, ǀaob âkha go ūǂgâhekha, ǂkhîbagus nî dīhega ǃanusib ǃnâ, ǁîkha ge ǁgoeǃkhais ǃaugaba ǃoa nî ūǂuihe, tsî ǁîkha di khōkha tsî ǁîkha di ǁgans tsî ǁîkha di ǀharab tsîn ge ǀaes ǀkha nî khauǃkhūhe.

²⁸Tsî ǁîna ga khauǃkhūb ge nî saran âba ǁā tsî nî ǁgans âba ǁgam-i ǀkha khō; tsî ǁîs khaoǃgâb ge ǁgoeǃkhais ǃnâ nî hā.

²⁹Tsîs ge nēsa ǀamo ǂnûiǂgāse sado nî ība: Hûǁî ǁkhâb ǃnâ, disiǁî tsēs ǁkhâb dis ai du ge sadu di ǀomde nî ǃgamǃgam tsî sîsenna dī tide, ǃhūb ǃnaesabe-i kao, ǃhaokhoese sadu ǁaegu hâ-i kao.

³⁰ǁNātsēb ge ǁîba ǂkhîbagusa nî dība du, sadob nî ǃanuǃanuse; sadu di ǁoren hoana xu du ge ǃKhūb di ais aiǃâ nîra ǃanuǃanuhe.

³¹ǁÎb ge sadu sâb di sâtsēse nî ība du, sadu di ǀomde du nî ǃgamǃgamse. ǁÎs ge a ǀamo ǂnûiǂgā.

³²Tsî ǁnā pristeri, ǁîban ge ǂkhauǀkhāb tsî ǃommi âban ge ǀoaǀoab, ǁgûb di amǃnâs aib nî pristersîsenǃâsa ǃoabase, ǁîb ge ǂkhîbagusa nî dī, linesaran, ǃanu saranab ga ǂgaeǂgāo,

³³nētib ge ǃanun di ǃanusiba nî ǂkhîbagu kai tsî tentoms ǀhûs dis tsî altars tsîrab nî ǂkhîbagu kai; ǁnās ǁkhās khamib ge pristergu tsî ǀhaohâb di ǁaes hoasa ǂkhîbagusa nî dība.

³⁴Tsî nēs ge sado ǀamo ǂnûiǂgāse nî îba, Israeli ôan nî ǁoren ân hoan ǂama kurikorobe ǀgui ǃnâs ai ǂkhîbagusa dībahese. Tsîn ge ge dī, ǃKhūb ge Moseba mîmā khami.