Read Khoekhoegowab Levitikus 17 Bible Online

Levitikus 17 - Khoekhoegowab bible

Levitikus 17

¹ǃAruǀîb ge ǃKhūba Moseb ǀkha ge ǃhoa:

²ǃHoa re Aronni tsî ǁîb di ôagu ǃoa tsî Israeli ôan hoan ǃoa îts ǁîna mîba: Nēs ge mîs ǃKhūb ge mîmāsa, mî raǃâ:

³Mâ-i hoa-i Israeli ommi di-i, goma-i kas, ǁkhao-i kas, piri-i kas hoasa ga ǂā ǂgao-i, ǁgoeǃkhais ǃnâs kas, ǁgoeǃkhais ǃaugas kas xawe,

⁴tsî i ga ǁî-e tentoms ǀhûs di dao-ams tawa ūsī tama io, ǁguibase i nî ǃKhūba ǁguibaga ǃKhūb di tabernakeli aiǃâ, ǀaob ǀhapises ge ǁnā khoeba nî ǃgôabahe; ǀao-eb ge ǁîba ge ǂnâxū; ob ge ǁnā khoeba ǁîb ǁaes di ǁaeguba xu nî ǃhomǂuihe.

⁵Israeli ôan ge ǁîn di ǂāǁguibadi, ǃaub ain ga ǂāde ǃKhūba nî ūhāba, tentoms ǀhûs dis di dao-ams tawa pristeri ǃoa, ǁîden nî ganganǁguibase ǃKhūba ǂābaga.

⁶Tsî pristeri ge ǀaoba ǃKhūb di altars ai nî ǀgapi, tentoms ǀhûs dis di dao-ams tawa; tsîb ge kauba nî ǂhubi ǀnamǀnamsa ǁamab ǃKhūb dib ase.

⁷Tsîn ge ǁkhāti ǃaruǀî ǁîn di ǂāǁguibade ǁgâuagu, ǁîgan ra ǀaiǃgonga ǁguiba tide. ǁÎs ge ǁîna ǀamo ǂnûiǂgāse nî ība ǁîn di ǃhaodi ǃnâ.

⁸Îts ǁnâi mî ǁîna ǃoa: Mâ-i Israeli ommi di-i hoa-i tsî ǃhaokhoen, ǁîn ǁaegu hân di-i hoa-i ga khauǁguibas kas, ǂāǁguibas kas hoasa ǁguiba ǂgao-o,

⁹tsî i ga ǁîsa tentoms ǀhûs dis di dao-ams tawa ūsī tama io, ǃKhūba i nî ǁîsa ǁāǁābase, ǁnā khoe-i ge ǁî-i di ǁaesa xu nî ǃhomǂuihe.

¹⁰Tsî mâ-i Israeli ommi di-i tsî ǃhaokhoen, ǁîn ǁaegu hân di-i, ǀaoro-i xa ga ǂû-i hoa-i, ǁî-i ǁnā ǀaoba ga ǂû-i di oms ǃoagu ta ge tita ti aisa ǂnûi tsî nî ǁîsa ǁîs di ǁaes ǁaeguba xu ǃhomǂui.

¹¹ǀOms ǁgans dis ge ǀaob ǃnâ hâ amaga ta ge tita ǁîba altars ai ge mā du, sadu ǀomdi nî ǂkhîbagusa dībahese; ǁîb ge ǁnā ǀaob ǀomsa ǂkhîbagusa nî dībaba xui-ao.

¹²ǁNā-amaga ta ge tita Israeli ôan ǃoa ge mî: ǀOms sadu dis xares ge ǀao-e ǂû tide; tsî ǁkhāti ǃhaokhoe-i, sadu ǁaegu hâ-i ge ǀao-e ǂû tide.

¹³Tsî ǁkhāti mâ-i Israeli ôan di-i hoa-i tsî ǃhaokhoen, ǁîn ǁaegu hân di-i hoa-e ga amǀnē-i kas, ani-i ǂûhe ra-i kas hoasa ǃkhō i, ǃaub ǃnâ, ǁî-i ge ǁnā-i di ǀaoba ǂnâxū tsî nî ǁîba tsarab ǀkha ǃgū-ai.

¹⁴ǁGans hoas di ǀoms a ǁî xui-ao, ǁnā-i di ǀaob ge ǁî-i di ǀomsa hâba; ǁnā-amaga ta ge tita Israeli ôan ǃoa ge mî: Sadu ge ǁgans xares di ǀaoba ǂû tide; ǀoms ǁgans hoas dis ge a ǀao amaga; ǁîba ga ǂû-i hoa-i ge nî ǃhomǂuihe.

¹⁵Tsî mâ ǀoms ǃhūb ǃnaesaben ǃnâs kas, ǃhaokhoen ǃnâs kas hoas, hîa ǁō hâ soro-i karao, ǀkhauǃāhe hâ xū-i karao ga ǂûs hoas, ǁîs ge ǁîs di sarana ǁā tsî ǁgam-i ǀkha khōsen tsî nî ǃanuoǃnâse ī, ǃuis kōse; ǁnās khaoǃgâs ge nî ǃanu.

¹⁶Xawe ǁînas ga ǁā tama io tsî ǁgans âsa khō tama io, os ge ǁîs di ǂhanuoǃnâsiba nî tani.